လါနိၣ်၀့ဘၢၣ် ၂၅သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကီၢ်ကၠီၣ်တဲၣ်ကလံၤထံး, ကီၢ်ရ့ၣ်၁၆ဘ့ၣ်အပူၤ ခီဖျိထံစးထီၣ်ဒိၣ်ထီၣ်ဖဲနိၣ်၀့ဘၢၣ် ၁၉သီအနံၤအံၤအဃိ ပှၤ၄ကလီၢ်ဘျဲၣ် ဘၣ်ကွၢ်ဆၢၣ်မဲၥ်ဘၣ်ဒီး ထံကီၢ်တၢ်ကီတၢ်ခဲအဂ့ၢ် ကၠီၣ်တဲၣ်တၢ်ကစီၣ်သန့တဖၣ် ပၥ်ဖျါဃၥ်၀ဲန့ၣ်လီၤ.
ဆိၣ်ခလၣ်ကီၢ်စဲၣ် ပၢပြးခိၣ်အတၢ်တဲအဖီခိၣ် လါနိၣ်၀့ဘၢၣ် ၁၉သီအနံၤလၢထံစးထီၣ်ဒိၣ်ထီၣ်အံၤအဃိ ကီၢ်ရ့ၣ် ၁၆ဘ့ၣ်အပူၤအိၣ် ပှၤ ၄၆၅၀၀၀ဘျဲၣ်ဘၣ်ဒိ၀ဲ၀ံၤ ထဲဒၣ်ဟဲးယဲၢ်ကီၢ်ရ့ၣ်အပူၤ ပှၤ ၂၄၃,၀၀၀ဃၣ်ဃၣ် ဘၣ်ကွၢ်ဆၢၣ်မဲၥ်ထံတၢ်ကီတၢ်ခဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဆိၣ်ခလၣ်ကီၢ်စဲၣ်အပူၤ ခီဖျိထံဒိၣ်ထီၣ်ကဒီး၀ဲအဖၢမုၢ်အဃိ လီၢ်က၀ီၤကမျၢၢ်ဖိလၢအိၣ်ကးတံၥ်သးဖဲ ဟံၣ်ပူၤတဖၣ် သုးမုၢ်ဒိၣ်ဒီး ခိၣ်ဃၢၤန့ဆၢၣ်တၢ်လီၤဘၣ်ယိၣ်ပှၤမၤပူၤဖျဲးတၢ်တဖၣ်, လီၢ်က၀ီၤပှၤဘၣ်မူဘၣ်ဒါတဖၣ် ဂုၥ်ကျဲးစၢးမၤပူၤဖျဲးထီၣ်၀ဲအသိး ပှၤလၢကွၢ်ဆၢၣ်မဲၥ်ဘၣ်ထံတၢ်ကီတၢ်ခဲတဖၣ်စ့ၢ်ကီး တၢ်သုးန့ၢ်အလီၢ်အကျဲန့ၣ်လီၤ.
မိၤစူကလံၤလၢအူတၢ်အဂံၢ်ဆူၣ်အဃိ တုၤလၢနိၣ်၀့ဘၢၣ် ၂၆သီအနံၤ ဆိၣ်ခလၣ်ပၣ်ဃုၥ် ကလံၤထံးဟီၣ်က၀ီၤတဖၣ်အပူၤ မူခိၣ်ကစူၤဒိၣ်၀ဲအဂ့ၢ် ကၠီၣ်တဲၣ်မူခိၣ်ကလံၤသီၣ်ဂီၤ၀ဲၤကျိၤ တယၢ်ဃၣ်၀ဲန့ၣ်လီၤ.
ကၠီၣ်တဲၣ်ကိတိၥ်ခိၣ်ကျၢၢ် အနူးတ့ၣ်စ့ၢ်ကီး ဖဲနိၣ်၀့ဘၢၣ်၂၃သီအနံၤန့ၣ် လဲၤဟးဆူ ဟဲးယဲၢ်ကီၢ်ရ့ၣ်အပူၤ၀ံၤ လဲၤထံၣ်လိၥ်အသးဒီး ပှၤကီၢ်ချၢဖိလၢဟးကသုၣ်ကသီတဖၣ်ပၣ်ဃုၥ် ပှၤဟးကသုၣ်ကသီဖိ ၁ကထိဘျဲၣ်လၢအိၣ်ကးတံၥ်အသးဖဲ ကဘီယူၤသန့တဖၣ်အသိး လဲၤဟ့ၣ်ဂံၢ်ဟ့ၣ်ဘါ၀ဲ ပှၤဘၣ်ကီဘၣ်ခဲထံဖိအိၣ်အလီၢ် တစိၢ်တလီၢ်တၢ်အိၣ်ကဒုသုးကလၢၤတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ပှၤကွၢ်ဆၢၣ်မဲၥ်ဘၣ်ဒီးထံတၢ်ကီတၢ်ခဲ ဟံၣ်ဖိဃီဖိ(၁)ဒူၣ်စုၥ်စုၥ်န့ၣ် တၢ်ကဟ့ၣ်ဆီၣ်ထွဲမၤစၢၤ စ့ယိၤ ၉,၀၀၀ဘးတၢ်ရဲၣ်တၢ်ကျဲၤအံၤစ့ၢ်ကီး တၢ်ကမၤဖျါထီၣ်၀ဲအမိၢ်လံမိၢ်ပှၤအဆိအချ့အဂီၢ် ကိတိၥ်ခိၣ်ကျၢၢ်နဲၣ်လီၤဃၥ်၀ဲ ကလံၤထံးကီၢ်စဲၣ်တဖၣ်အအိၣ်န့ၣ်လီၤ.
