လါနိၣ်၀့ဘၢၣ် ၂၅သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၣ်စဲၣ်,ကၠီၣ်တဲၣ်-ပယီၤကီၫ်ဆၢကပၤ ကီၣ်ပယီၤပှၤမၤတၫ်ဖိပိာ်မုၣ်(၃)ဂၤလၢမၤတၫ်ဖဲအိၣ်လဲတၫ်လံၣ်တၫ်လီ ကျိာ်စ့တၫ်မၤလီၫ်အပူၤတဖၣ် ဖဲလါနိၣ်၀့ဘၢၣ်(၂၃)သီအနံၤ,ဂီၤအကတီၫ်န့ၣ် သုးခီၣ်မံးရှၢၣ်အသုးခးသံကွံာ်၀ဲအဂ့ၫ် တၫ်သ့ၣ်ညါဘၣ်လၢတၫ်ပၢၫ်ဆၢသုးဖိတဖၣ်အိၣ်န့ၣ်လီၤ.
၀့ၫ်ရၤမတံကလံၤထံး စီၤစုာ်ယံၤ (၁၀)မဲၣ်ဃၣ်ဃၣ် မ့လဲးပၣ်သ၀ီ ထံကျိကၢၫ်နံၤ DKBAပၢ အိၣ်လဲတၫ်လံၣ်အီၣ်ကျိာ်စ့ တၫ်မၤလီၫ်ကရၢၫ်အပူၤ မၤတၫ်ဖဲန့ၣ်ဒီးကီၫ်ပယီၤပှၤမၤတၫ်ဖိလၢကက့ၤဆူအတၫ်အိၣ်ဆိးလီၫ်ကျဲတဖၣ် သုးခီၣ်မံးရှၢၣ် သုးဖိ ခးသံကွံာ်၀ဲ ဖဲမ့လဲးပၣ်ဒီးအ့ၣ်ကၠ့မၠဲၣ်သ၀ီအဘၢၣ်စၢၤန့ၣ်လီၤ.
“ပှၤမၤတၫ်ဖိလၢအိၣ်ဟးထီၣ်ဖဲအိၣ်လဲတၫ်လံၣ်တၫ်လီတၫ်မၤလီၫ်ကရၢၫ်ပူၤလီၤ.ကက့ၤဆူအ့ၣ်ကၠ့ၣ်မၠဲၣ်ဒီးရၤမတံလီၤ.ဖဲန့ၣ် သုးခီၣ်မံးရှၢၣ်သုးဖိခးသံကွံာ်၀ဲ ပိာ်မုၣ် ၃ဂၤလီၤ.အစိၣ်တဖၣ်န့ၣ် အိၣ်ဒၣ်လၢကျဲမုၫ်ခိၣ်လီၤ.ပလဲၤထုးက့ၤတဘူၣ် ဘၣ်.မ့ၫ်လဲၤထုးန့ၣ် တၫ်ခးပှၤသ့လီၤ.တနီၤဘၣ်ဒိဘၣ်ထံးဒီးက့ၤဆူဖလူတကပၤအဂ့ၫ်”တဲ၀ဲလီၤ.
ဖဲလါနိၣ်၀့ဘၢၣ်(၂၁)သီအနံၤန့ၣ် မ့လဲပၣ်သ၀ီ DKBAသုးဖိတနီၤ ခးကျိ,ခးလီၤတဲာ်တၫ်ပၢၫ်ဆၢသုးဖိတဖၣ်အဒြိအဃိ DKBAသုးဖိတနီၤ ဘၣ်တၫ်ဖီၣ်ဃာ်၀ဲဒီးDKBAပၢ အိၣ်လဲတၫ်လံၣ်အီၣ်လီအီၣ်ကျိာ်စ့တၫ်မၤလီၫ်ကရၢၫ် ဘၣ်တၫ်နုာ်လီၤဖီၣ် ၀ဲလီၤ.
တၫ်လံၣ်တၫ်လီတၫ်မၤလီၫ်ကရၢၢ်ပူၤ ပှၤမၤတၫ်ဖိတဖၣ်န့ၣ် ဖဲက့ၤဆူအတၫ်အိၣ်ဆိးလီၫ်ကျဲအကတီၫ် သုးခီၣ်မံးရှၢၣ်သုး ဖိခး၀ဲဒ်သိးအံၤအဃိ ပိာ်မုာ် ၃ဂၤဘၣ်သံဒီးတနီၤဘၣ်ဒိဘၣ်ထံး၀ဲလီၤ.
ပှၤလၢဘၣ်ဒိဘၣ်ထံးတနီၤ ဘၣ်ဒိးကူစါယါဘျါအသးလၢတၫ်ပၢၫ်ဆၢကရၢအတၫ်ပၢဟီၣ်က၀ီၤအဂ့ၫ် တၫ်သ့ၣ်ညါဘၣ်လီၤ.
“ဟးလၢအခီၣ်ဒီးက့ၤ၀ဲလီၤ.မ့ၫ်ပှၤလီအီၣ်ကျိာ်စ့ဧါဒုတလီၤတံၫ်ဘၣ်.တၫ်မၤလီၫ်အပူၤ ပှၤမၤကဆှီတၫ်,ဖီမ့ၤ,ကၣ်စံၣ်နိၣ် ပှၤမၤတၫ်ဖိ,ဒီးပှၤလၢမၤတၫ်မၤဃၢတဖၣ်အိၣ်၀ဲလီၤ.အ၀ဲသ့ၣ်န့ၣ်မ့ၫ်ကမျၢၫ် ပှၤမၤတၫ်ဖိတဖၣ်လီၤ.တၫ်အံၤစ့ၫ်ကီးတန့ၫ် ဘၣ်.သုးခးသံကွံာ်၀ဲအဂ့ၫ်”လီၫ်က၀ီၤဂ့ၫ်ခီၣ်ထံးတၫ်ကစီၣ်တဂၤတဲ၀ဲလီၤ.
တကးဘၣ် ဖဲလါနိၣ်၀့ဘၢၣ်(၂၂)သီအနံၤ မုၫ်ဃ့ၫ်လီၤအကတီၫ် မိၫ်ဒၢဖဲလဲၤလၢမ့လဲးပၣ်ဆူအ့ၣ်ကၠ့မၠဲၣ်သ၀ီအကတီၫ် သုးခီၣ်မံးရှၢၣ်သုးခးသံကွံာ်၀ဲဒံးန့ၣ်လီၤ.
မိၫ်ဒၢ၀ဲန့ၣ် ဖဲလဲၤခီဂာ်၀ဲ တၫ်ပၢၫ်ဆၢကရၢအတြဲၤလၢလ့ၫ်ယီၫ်စဲးအကတီၫ် တၫ်ပၢၫ်ဆၢကရၢတကပၤ တၫ်ဘံၣ်တၫ်ဘၢ အဖီခိၣ် တၫ်တြီဃာ်၀ဲဘၣ်ဆၣ် တတူၫ်လိာ်၀ဲဘၣ်ဒီးဟးထီၣ်၀ံၤ ဖဲဘၣ်သဂၢၫ်ဒီးသုးခီၣ်မံးရှၢၣ်သုးတဖၣ်အကတီၫ် ဘၣ်တၫ်ခးသံကွံာ်၀ဲန့ၣ်လီၤ.
သုးခီၣ်မံးရှၢၣ်သုးဒီးသုးခိးကီၫ်ဆၢBGFတဖၣ်ပာ်ဖှိၣ်လိာ်သးဒီးတြီဆၢ၀ဲ တၫ်ပၢၫ်ဆၢသုးပာ်ဖှိၣ်လၢထီၣ်ဒုးမ့လဲးပၣ်တ ဖၣ်၀ံၤ မ့လဲးပၣ်သ၀ီဒီးယသ့းကူၣ်သ၀ီတဖၣ်အပူၤ တၫ်ဒုးဆူၣ်၀ဲန့ၣ်လီၤ.
သုးခီၣ်မံးရှၢၣ်န့ၣ် လၢမ့လဲးပၣ်ဒီးဖလူသ၀ီတဖၣ်အပူၤ ခးလီၤကျိဖးဒိၣ်တဖၣ်ဒီးဒုးဃီၤတၫ်လၢကၣ်မံၣ်ကၣ်စ့ၣ်ဒြိ တဖၣ်ကိးမုၫ်နံၤဒဲးအဃိ လီၫ်က၀ီၤကမျၢၫ်ဘၣ်သံတစှၤန့ၫ်(၆)ဂၤဒီးဘၣ်ဒိဘၣ်ထံး(၁၅)ဂၤဃၣ်ဃၣ်န့ၣ်လီၤ.
ခံကပၤတၫ်ဒုးအဃိ ပှၤလီၫ်က၀ီၤကမျၢၫ် ၅၀၀ဂၤဘျဲၣ် ဘၣ်လဲၤဃ့ၫ်အိၣ်ကဒုကၠီၣ်တဲၣ်တကပၤန့ၣ်လီၤ.
ကျိဖးဒိၣ်ဒီးကျိဖိလၢသုးခီၣ်မံးရှၢၣ်ခးလီၤ၀ဲတဖၣ် လီၤတဲာ်ဆူကၠီၣ်တဲၣ်တကပၤဒီးကၠီၣ်တဲၣ်သုးတကပၤစ့ၫ်ကီး ခးဟ့ၣ်ပလီၫ်၀ဲလၢ မ့ၣ်အူလုၫ်ကျိ ၁၂၀မမအဂ့ၫ် တၫ်သ့ၣ်ညါဘၣ်လီၤ.
မ့လဲးပၣ်သ၀ီဒီးဖလူသ၀ီတဖၣ်အပူၤ DKBAပၢ အိၣ်လဲတၫ်လံၣ်အီၣ်လီအီၣ်ကျိာ်စ့တၫ်မၤလီၫ်တၫ်သူၣ်ထီၣ်အိၣ်၀ဲ တၫ်လီၫ်(၅)တီၤအဂ့ၫ် တၫ်သ့ၣ်ညါဘၣ်လီၤ.
