လါအီးကထိဘၢၣ် ၃၁သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့၅ဟီၣ်က၀ီၤ, ဒွဲၣ်လိကီၢ်ဆၣ်အပူၤ လါအီးကထိဘၢၣ် ၂၉သီအနံၤန့ၣ် သုးကီၣ်မံးရှၢၣ်အသုးဒီး KNLAသုးပၥ်ဖှိၣ်အဘၢၣ်စၢၤ တၢ်ဒုးကဲထီၣ်၀ဲဆူၣ်ဆူၣ်ကိၤကိၤအဂ့ၢ် ဟီၣ်က၀ီၤဂံၢ်ခီၣ်ထံးတၢ်ပၢၢ်ဆၢကရၢစံး၀ဲန့ၣ်လီၤ.
“မဟါဂီၤအဆၢကတီၢ်န့ၣ် သုးကီၣ်မံးရှၢၣ်အသုးဒီးBGFသုးပၥ်ဖှိၣ်တဖၣ် အိၣ်ဟးထီၣ်လၢ၀ါဒူဒီးလဲၤထီၣ်ဆူ ကတၢးတံးအကတီၢ် တၢ်ဘၣ်သဂၢၢ်ဒုးလိၥ်သးအိၣ်ထီၣ်၀ဲဒီးKNLAသုးပၥ်ဖှိၣ်အဘၢၣ်စၢၤဖဲ၀ါဒူဒီး၀ၣ်သိခိၣ်အဘၢၣ်စၢၤ တုၤလၢအီးကထိဘၢၣ်၃၀သီအနံၤန့ၣ်လီၤ.ခဲအံၤဒၣ်လဲၥ်တၢ်နၢ်ဟူဘၣ်တၢ်ခးကလုၥ်တဖၣ်လီၤ.သုးကီၣ်မံးရှၢၣ်အသုးဒီးBGFသုးပၥ်ဖှိၣ်တပၤ ဘၣ်ဒိ၀ဲဒိၣ်ဒိၣ်မုၢ်မုၢ်” အဂ့ၢ် ဟီၣ်က၀ီၤသုးဂ့ၢ်၀ီတၢ်ကစီၣ်စံး၀ဲန့ၣ်လီၤ.
“မဟါအနံၤဟါလီၤခီအဆၢကတီၢ်န့ၣ် သုးကီၣ်မံးရှၢၣ်အပှၤသုးဖိလၢ အဘၣ်ဒိဘၣ်ထံးတဖၣ် ဘၣ်တၢ်ဟဲက့ၤစိၥ်အီၤလီၤ. လဲၤခီ၀ဲ အိတီ၀ၣ်ဘၣ်ခီမၠဲၣ်ကၠံငူၣ်တဖၣ်၀ံၤ က့ၤစိၥ်၀ဲဆူ ဖၣ်အၣ်တပၤအဂ့ၢ်” ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
ခ့ၣ်အဲၣ်ယူၣ်-သုးက့ ၅ဟီၣ်က၀ီၤအပူၤ သုးကလၢၤဒီးဟီၣ်က၀ီၤတဖၣ်လၢ ဘၣ်တၢ်ဒုးန့ၢ်၀ဲတဖၣ် ကမၤန့ၢ်က့ၤဒီးဒိၣ်စိက့ၤကန့ၢ်အဂီၢ် မၤပှဲၤသုးဂံၢ်ဘါအါအါဂီၢ်ဂီၢ်ဒီးဟဲထီၣ်ဒုးတၢ်အသိး စူးကါ၀ဲစ့ၢ်ကီး ကျိဖးဒိၣ်ဒီး ဒြိတၢ်မၤစၢၤတဖၣ်န့ၣ်လီၤ.
သုးကီၣ်မံးရှၢၣ်အသုးဒီးBGFသုးပၥ်ဖှိၣ်တဖၣ်လၢ ဂုၥ်ကျဲးစၢးလၢကလဲၤထီၣ်သုးကျိၤဆူ ကတၢးတံးအံၤ လဲၤထီၣ်သုးကျိၤအဘျီတဖၣ်အဘျီဘၣ်ဆၣ် ဘၣ်တၢ်ခိးဒုးအီၤဖဲ ၀ါဒူဒီး၀ၣ်သိခိၣ်အဘၢၣ်စၢၤအဃိ ဘၣ်ဒိနးဒိၣ်ဒိၣ်မုၢ်မုၢ်အဃိ ဘၣ်ဂုၤက့ၤအခံဆူ ၀ါဒူတပၤန့ၣ်လီၤ.
ဖဲ ၂၉သီအနံၤဂီၤတုၤ ၃၀သီအနံၤ သုးကီၣ်မံးရှၢၣ်အသုးဒီးBGFသုးပၥ်ဖှိၣ်တဖၣ် ဟဲထီၣ်သုးကျိၤလၢသုးဂံၢ်ဘါအါအါဂီၢ်ဂီၢ်ဒီး ဟဲထီၣ်ဒုး၀ဲဘၣ်ဆၣ် အိၣ်ပတုၥ်အသးဖဲ ၀ါဒူဒီး ၀ၣ်သိခိၣ်အဘၢၣ်စၢၤန့ၣ်လီၤ.
တကးဘၣ် ကညီကီၢ်စဲၣ်, ကီးတရံးကီၢ်ဆၣ်, အီးဘိၣ်တဲ, ထံဖိစၣ်ဟီၣ်က၀ီၤတဖၣ်အပူၤစ့ၢ်ကီး သုးကီၣ်မံးရှၢၣ်သုးပၥ်ဖှိၣ် ဟဲထီၣ်သုးကျိၤလၢ BGF,KNLA-PCတၢ်မၤစၢၤအဃိ ခဲအံၤစှၤသီအတီၢ်အပူၤ တၢ်ဘၣ်သဂၢၢ်ဒုးလိၥ်သးအိၣ်ထီၣ်၀ဲဒီး KNLAသုးပၥ်ဖှိၣ်အဘၢၣ်စၢၤအဂ့ၢ် ပှၤလၢအိၣ်ဘူးဒီး ပှၤလၢအမၤတၢ်လၢ ပှၤတ၀ၢတၢ်မၤစၢၤကရၢတဂၤ စံး၀ဲန့ၣ်လီၤ.
“ခီဖျိတၢ်ဒုးတဖၣ်ဆူၣ်၀ဲအဃိ လီၢ်က၀ီၤကမျၢၢ်လၢအိၣ်ဖဲန့ၣ်တဖၣ်န့ၣ် ဘၣ်ဃ့ၢ်ပူၤဖျဲးသးဆူ အီးဘိၣ်တဲတပၤန့ၣ်လီၤ. ခဲအံၤစှၤသီအတီၢ်ပူၤန့ၣ် ပှၤလီၢ်အိၣ်ကမှံဖိတဖၣ် ဟဲအါထီၣ်ကွ့ၢ်ကွ့ၢ်အဂ့ၢ်” ပှၤလၢအိၣ်ဘူဒီး ပှၤလၢအမၤတၢ်လၢ ပှၤတ၀ၢတၢ်မၤစၢၤကရၢတဂၤ စံး၀ဲန့ၣ်လီၤ.
“ခဲအံၤစှၤသီတဖၣ်အပူၤ တၢ်ဒုးတဖၣ်က့ၤကဲထီၣ်အသးလီၤ. က့ၤကဲထီၣ်သး ကိးမုၢ်နံၤဃၣ်ဃၣ်၀ံၤ သုးကီၣ်မံးရှၢၣ်တကပၤ BGF,KNLA-PC,DKBAဘိၣ်ဘံးတီၣ်ခိၣ်ရိၣ်မဲကရၢ တဖၣ် ဒုးစၢၤတၢ်အဂ့ၢ်” KNLAဂံၢ်ခီၣ်ထံးသုးဂ့ၢ်၀ီတၢ်ကစီၣ် စံး၀ဲန့ၣ်လီၤ.
