လါအီးကထိဘၢၣ် ၃၁သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကၠီၣ်တဲၣ်-ပယီၤကီၢ်ဆၢ အိၣ်လဲတၢ်လံၣ်တၢ်လီကျိၥ်စ့တၢ်ဖံးတၢ်မၤ ကၠါဖၠးတၢ်မၤလီၢ်တဖၣ်အပူၤ ပှၤလၢအိၣ်ခိးလၢ တၢ်ကမၤပူၤဖျဲးထီၣ်အီၤတဖၣ်အိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
BGF ဒီး DKBAတၢ်ပၢဆှၢဟီၣ်က၀ီၤ, ကၠါဖၠးတၢ်ဖံးတၢ်မၤလီၢ်တဖၣ်အပူၤ ပှၤကီၢ်ချၢဖိအါအါဂီၢ်ဂီၢ်လၢ ဘၣ်တၢ်မၤဆူၣ်မၤဆါအီၤအဂ့ၢ်အကျိၤတဖၣ် ကီၢ်ကၠီၣ်တဲၣ်, ၀့ၢ်ဘီကီၥ်ထံဂုၤကီၢ်ဂၤတၢ်ထၢတၢ်ကစီၣ်ကရၢ ရဲၣ်ကျဲၤမၤ၀ဲ ဒုးနဲၣ်ဖျါထီၣ်မူးတၢ်ရဲၣ်တၢ်ကျဲၤတဖၣ်လီၤ.
ကၠီၣ်တဲၣ်-ပယီၤကီၢ်ဆၢ, ၀့ၢ်ရၤမတံကီၢ်ဆၣ်, ကၠါဖၠးတၢ်မၤလီၢ်အပူၤ ပှၤလၢဘၣ်တၢ်မၤပူၤဖျဲးထီၣ်အီၤ၀ံၤ ဘၣ်တၢ်ဆီတလဲဟ့ၣ်လီၤဆူ ကၠီၣ်တဲၣ်အအိၣ် ပှၤကီၢ်ချၢဖိ ၁၂,၀၀၀အိၣ်၀ဲဘၣ်ဆၣ် တၢ်အနီၣ်ဂံၢ်နီၣ်ဒွးလၢ အိၣ်ကးတံၥ်အသးလၢ ကီၢ်ပယီၤ, ကၠါဖၠးတၢ်မၤလီၢ်ပူၤန့ၣ် အိၣ်ဒၣ် ၁၀မျးကယၤလီၤအဂ့ၢ် ပှၤဂ့ၢ်၀ီခွဲးယၥ်ကရၢတဖၣ် ဒုးနဲၣ်ဖျါထီၣ်၀ဲလီၤ.
တကးဘၣ် ပှၤလၢဘၣ်တၢ်မၤပူၤဖျဲးထီၣ်အီၤ ဖဲကၠါဖၠးတၢ်မၤလီၢ်တဖၣ်၀ံၤ တၢ်ကဆီတလဲဟ့ၣ်လီၤအီၤဆူ ထံကီၢ်ဘၣ်ထွဲတဘ့ၣ်စုၥ်စုၥ်အဂီၢ် ဘၣ်အိၣ်ခိး၀ဲဒၣ်ယံၤလၢအလါတဖၣ်လၢ တစိၢ်တလီၢ်သုးကလၢၤတဖၣ်အပူၤန့ၣ်လီၤ.
ဖဲန့ၣ်အကျါ မိၢ်ဒၢဒီး ပှၤလၢတအိၣ်ဆူၣ်ချ့တဖၣ် တဒိးန့ၢ်၀ဲ ဆူၣ်ချ့တၢ်ကဟုးကယၥ်လၢလၢလီၢ်လီၢ်ဘၣ်အဂ့ၢ် ကမျၢၢ်ကရၢသဘျ့လၢအမၤစၢၤပှၤလၢဘၣ်တၢ်ကူလဲၢ်မၤကၤတဖၣ်ဂ့ၢ်၀ီ (CSNHTV)စံး၀ဲန့ၣ်လီၤ.
တကးဘၣ် ပှၤတဖၣ်န့ၣ် တဒိးန့ၢ်ဘၣ် သဲစးတၢ်ဘျၢတၢ်ဒီသဒၢဘၣ်အသိး ခီဖျိ တၢ်တဲအီၤလၢ ကၠါဖၠးပှၤလံၣ်အီၣ်လီအီတၢ်တဖၣ်အဃိ ဘၣ်တၢ်မၤကမၣ် ဂံၢ်ခီၣ်ထံးပှၤဂ့ၢ်၀ီခွဲးယၥ်တဖၣ်အဂ့ၢ် ကရၢအံၤနဲၣ်ဖျါ၀ဲန့ၣ်လီၤ.
