လါအီးကထိဘၢၣ် ၂၉သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တၢ်ဆဲးလီၤ ကၠီၣ်တဲၣ်-အမဲရကၤ တၢ်ခူၣ်ထုးထီၣ်ဟီၣ်ခိၣ်လီၤဆီဂ့ၢ်၀ီ(MoU)လၢ ကၠီၣ်တဲၣ်ပဒိၣ်အတၢ်ဆၢတဲၥ်အဖီခိၣ် ကၠီၣ်တဲၣ်ထံရူၢ်ကီၢ်သဲးပၣ်တံၣ် ၂ဖုဟ့ၣ်ပလီၢ်၀ဲ အဒိၣ်အယိၥ်န့ၣ်လီၤ.
ကၠီၣ်တဲၣ် အဒံၣ်မိၣ်ကရံးတံဒီး ကမျၢၢ်ပၣ်တံၣ်တဖၣ်အံၤ ဘၣ်ထွဲဒီး ကိတိၥ်ခိၣ်ကျၢၢ် အနူးတ့ၣ် ခၠၣ်ဘံၣ်ရၣ်ကူၣ်တီခိၣ်ရိၣ်မဲ ပဒိၣ် ဆဲးလီၤ တၢ်ပၥ်ဖှိၣ်ထုးထီၣ်ဟီၣ်ခိၣ်လီၤဆီ MoUဒီး အမဲရကၤအံၤန့ၣ် တၢ်ပိၥ်ထွဲအအၢလၢ တကြၢးတဘၣ်တဖၣ် ဟဲပိၥ်ထွဲထီၣ်အခံသ့အဂ့ၢ် နဲၣ်ပၠး၀ဲန့ၣ်လီၤ.
လါအီးကထိဘၢၣ် ၂၆သီအနံၤလံၤလံၤ ကီၢ်အမဲရကၤကီၢ်ခိၣ် ဒီၣ်နၢၤထရၢး ကဟဲထီၣ် အ့ရှၢမုၢ်ထီၣ်ကလံၤထံးထံကီၢ်တဖၣ် ပတီၢ်ထီတၢ်အိၣ်ဖှိၣ်အဂီၢ် ဟဲတုၤအိၣ်၀ဲဒၣ်ဖဲ ကီၢ်မလ့ရှါ, ကွၣ်လၣ်လၣ်ပူၣ်၀့ၢ်အဆၢကတီၢ် ဆဲးလီၤ၀ဲ MoUအံၤန့ၣ်လီၤ.
ဟံၣ်၀ါ ပၥ်ဂၢၢ်ပၥ်ကျၢၢ် ဘိးဘၣ်ရၤလီၤ၀ဲ တၢ်ဆဲးလီၤ ကၠီၣ်တဲၣ်-အမဲရကၤ တၢ်ပၥ်ဖှိၣ်ထုးထီၣ်ဟီၣ်ခိၣ်လီၤဆီ MoUအဆၢကတီၢ် ကဲထီၣ်၀ဲလီၤကမၢကမၣ်လၢ ပှၤပဲၥ်ထံနီၤဖး ကၠီၣ်တဲၣ်ထံရူၢ်ကီၢ်သဲးဂ့ၢ်၀ီတဖၣ်အဂီၢ်န့ၣ်လီၤ.
ဒံၣ်မိၣ်ကရံးတံၣ်ပၣ်တံၣ် ခိၣ်နၢ်အဒိၣ်ကတၢၢ် ခံဂၤတဂၤလၢအမ့ၢ် ၀ံၣ်ရၣ်ပီၣ်ပရၣ်ဖၣ်န့ၣ် ဒ်သိး တၣ်စတၣ်ဟီၣ်ခိၣ်လီၤဆီတဖၣ်န့ၣ် အရ့ဒိၣ်လၢ တၢ်ထုးထီၣ်လီဂံၢ်သိလ့ၣ်တဖၣ်, အံၣ်လဲးထရီန့းတၢ်ပီးတၢ်လီတဖၣ်အဂ့ၢ်ဒီး တၢ်မၤကဆှီ ဟီၣ်ခိၣ်လီၤဆီတၢ်ဆါတၢ်ပှ့ၤအံၤန့ၣ် တရူးဒိၣ်စိဃၥ်၀ဲ၀ံၤ အမဲရကၤစ့ၢ်ကီး ပထိၣ်သတြီၤပၢတၢ်အဂီၢ် ဂုၥ်ကျဲးစၢး၀ဲအဂ့ၢ် အကွဲးဖျါဃၥ်၀ဲလၢ အFacebookလံၥ်ကဘျံးပၤအဖီခိၣ်န့ၣ်လီၤ.
တၢ်ဂ့ၢ်တၢ်ကျိၤလၢ အပၣ်ဃုၥ်လၢ MoUအပူၤအံၤအကျါ တၢ်ဃုထံၣ်ထုးထီၣ်ကၠီၣ်တဲၣ်ဟီၣ်ခိၣ်လီၤဆီတဖၣ်အပူၤ ကီၢ်အမဲရကၤ ကဆီၣ်ထွဲမၤစၢၤအဂ့ၢ် အၢၣ်လီၤ၀ဲဘၣ်ဆၣ် ဃုၥ်ဒီး ကီၢ်ပူၤတၢ်ဘျၢသဲးစးတဖၣ်အဖီခိၣ် ကီၢ်အမဲရကၤကြၢးန့ၢ်ဘၣ်၀ဲ အဆိကတၢၢ်တၢ်ဒိးဘျၢလီၤတၢ်ဘျူးတၢ်ဖှိၣ်အခွဲးအဂ့ၢ် ပၥ်ဃုၥ်၀ဲအဂ့ၢ်, မ့ၢ်ကွၢ်လၢကျဲအဂၤတဘိန့ၣ် ကီၢ်အမဲရကၤ ဂုၥ်ကျဲးစၢး၀ဲလၢ ကထုးထီၣ်အါထီၣ် ဟီၣ်ခိၣ်လီၤဆီ၀ံၤ အဂၤတကပၤတခီ အဲၣ်ဒိးတြီကးတံၥ်ဃၥ် တရူးအခီၣ်ခါအဂီၢ်အဂ့ၢ် ၀ံၣ်ရၣ်ပီၣ်နဲၣ်ပၠး၀ဲန့ၣ်လီၤ.
ကၠီၣ်တဲၣ်မူၤကျိၤ၀ဲၤကွၥ်တဖၣ်န့ၣ် ဘၣ်ဒိၣ်သန့ၤ၀ဲဒၣ်လၢ တရူးအဖီခိၣ်အဃိ တၢ်မ့ၢ်နၢ်ပၢၢ်တၢ်လၢအကဲထီၣ်သးနီၢ်နီၢ်န့ၣ် ပဒိၣ်တခီ ကဘၣ်ပၢၤဃၥ် တၢ်ရ့လိၥ်မုၥ်လိၥ်အဂ့ၤဒီးတရူးအဂ့ၢ်န့ၣ် လိၣ်လၢကဘၣ်ဆိကမိၣ်ပဲၥ်ထံနီၤဖး၀ဲအဂ့ၢ် အ၀ဲစံးအါထီၣ်၀ဲန့ၣ်လီၤ.
ကမျၢၢ်ပၣ်တံၣ် ဘျီၣ်ဒိၣ်ခၢၣ်စးတဂၤလၢအမ့ၢ် ဖဲးတၣ်ရၣ်ပီၤလီလၣ်ဖဲးစ့ၢ်ကီး တၢ်ဆဲးလီၤ တၢ်ထုးထီၣ်ဟီၣ်ခိၣ်လီၤဆီဂ့ၢ်၀ီ MoUဒီးအမဲရကၤန့ၣ် အနူးတ့ၣ်ပဒိၣ်တခီ တလိၣ်လၢ ကဘၣ်ဆဲးလီၤဘၣ်အဂ့ၢ် ပဲၥ်ထံနီၤဖး၀ဲန့ၣ်လီၤ. တၢ်မ့ၢ်မၤနၢ်ပၢၢ် MoUအံၤန့ၣ် ထဲဒၣ်ကီၢ်အမဲရကၤ ကဒိၣ်န့ၢ် တၢ်ဘျူးတၢ်ဖှိၣ်လီၤအဂ့ၢ် အ၀ဲပဲၥ်ထံနီၤဖး၀ဲန့ၣ်လီၤ.
တၢ်မ့ၢ်မၤနၢ်ပၢၢ်ဖးကွၢ် တၢ်အၢၣ်လီၤအံၤအဆၢကတီၢ် အမဲရကၤန့ၣ် ကဒိးန့ၢ်ခွဲးလၢ တၢ်ခူၣ်ထုးထီၣ်ဟီၣ်ခိၣ်လီၤဆီလၢ ကီၢ်ကၠီၢ်တဲၣ်ပူၤ, ဘၣ်ထွဲဒီးဟီၣ်ခိၣ်လီၤဆီတၢ်ဂ့ၢ်တၢ်ကျိၤတဖၣ်စ့ၢ်ကီး ကဒိးန့ၢ်၀ဲအဆိအချ့, တၢ်ဘျၢလီၤတၢ်ဘျူးတၢ်ဖှိၣ်အပူၤစ့ၢ်ကီး ဒိၣ်န့ၢ်ဘၣ်၀ဲ တၢ်ဆၢတဲၥ်တဖၣ်ပၣ်ဃုၥ်၀ဲအဂ့ၢ် ဖၣ်တၣ်ရၣ်ပီၤစံး၀ဲန့ၣ်လီၤ.
စံးလၢ တၢ်နၢ်ပၢၢ်လိၥ်သးလံၥ်ဟံးဃၥ်ဘၣ်ဆၣ် အနီၢ်နီၢ်တခီ MoUန့ၣ် ကီၢ်ကၠီၣ်တဲၣ်ပူၤ အမဲရကၤ တၢ်ခူၣ်ထုးထီၣ် မၤကဆှီဟီၣ်ခိၣ်လီၤဆီအပူၤ ကကဲထီၣ်ပျ့ပျ့ရှီရှီအဂီၢ် အိးထီၣ်န့ၢ်ကျဲလီၤအဂ့ၢ် အ၀ဲစံး၀ဲန့ၣ်လီၤ.
ကၠီၣ်တဲၣ်ပဒိၣ်န့ၣ် လၢတရူးဒီးအမဲရကၤထံကီၢ်ခံဘ့ၣ်အဘၢၣ်စၢၤ ဘၣ်ထွဲဒီး ဟီၣ်ခိၣ်လီၤဆီတၢ်ထိၣ်သတြီၤအပူၤ ကၠီၣ်တဲၣ်န့ၣ် ဘၣ်တၢ်စူးကါအီၤဒ်တၢ်ဂီၤသံအသိးအဂ့ၢ် ဖၣ်တၣ်ရၤပီၣ်ပဲၥ်ထံနီၤဖး၀ဲန့ၣ်လီၤ. တၢ်ဆၢတဲၥ်အံၤအဃိ တၢ်ပိၥ်ထွဲထီၣ်အခံလၢတကြၢးကဲထီၣ်တဖၣ် အိၣ်ထီၣ်သ့အဂ့ၢ် ဟ့ၣ်ပလီၢ်၀ဲန့ၣ်လီၤ.
Ref :Bangkok Post
