လါအီးကထိဘၢၣ်(၂၉)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ပကိကီၫ်ခီ သ၀ီတနီၤ သးစၫ်(၁၀)ဂၤအကျါ(၈)ဂၤဃၣ်ဃၣ်န့ၣ် ပာ်တ့ၫ်ကွံာ်တၫ်အိၣ်ဆိးလီၫ်ဒီးဟးထီၣ်ကွံာ်လၢဟီၣ် က၀ီၤပူၤအဂ့ၫ် ဟီၣ်ခိၣ်လိၤတၫ်ဂ့ၫ်တၫ်ကျိၤတဖၣ်အဖီခိၣ်တၫ်သ့ၣ်ညါဘၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤအလီၫ်ခံ ကီၫ်ပယီၤပူၤ တၫ်ဖံးတၫ်မၤကၤထီၣ်ဒီးသးစၫ်လၢတအဲၣ်တၫ်ထၢန့ၫ်ဆူၣ်သုးတဖၣ် ဟးထီၣ်လၢဟီၣ်က၀ီၤပူၤ အါထီၣ်၀ဲကွ့ၫ်ကွ့ၫ်အဂ့ၫ် သၣ်ယၣ်၀တံၣ်ကီၫ်ဆၣ်,စယးကွ့သ၀ီ သးနံၣ်(၄၀)နံၣ် အိၣ်ပိာ်ခွါတဂၤတဲ၀ဲလီၤ.
“အခဲအံၤလၢသ၀ီန့ၣ် သးစၫ်တအိၣ်လၢၤဘၣ်.အါလၢပှၤဟးထီၣ်တၫ်ချၢလီၤ.တနံၣ်ဒီးတနံၣ် န့ၣ်အါထီၣ်၀ဲလီၤ.အခဲအံၤ လၢသ၀ီန့ၣ်တၫ်ဘၣ်မိၫ်ဘၣ်မးဒၣ်တၫ်လဲၣ် ပှၤလၢမၤ၀ဲတအိၣ်လၢၤဘၣ်.မ့ၫ်လဲၤဆူကီၫ်ကၠီၣ်တဲၣ် လၢတဖိးသဲစးအကျဲဒၣ်လဲၣ် လၢာ်အကလီၫ်၆၀,၇၀ဘၣ်ဆၣ် လဲၤ၀ဲလီၤအဂ့ၫ်”တဲ၀ဲလီၤ.
သးစၫ်ဟးထီၣ်ကွံာ်လၢဟီၣ်က၀ီၤအပူၤန့ၣ် မ့ၫ်လၢတၫ်ဖံးတၫ်မၤကၤထီၣ်ဒီးပနံာ်အပှ့ၤကလံၤတဖၣ်ဒိၣ်ထီၣ်အဃိ ဟံၣ် ဖိဃီဖိလၢမၤအီၣ်တလၢတဖၣ် တၫ်ကက့ၤဆီၣ်ထွဲက့ၤ၀ဲအဂီၫအဂ့ၫ် လဲပၣ်တါကီၫ်ဆၣ်,ယွၣ်သၣ်ယွၣ်သ၀ီပိာ်မုၣ်တဂၤ တဲ၀ဲလီၤ.
“လၢအံၤန့ၣ် လါလဲလၢန့ၫ်ဒီးပနံာ်အပှ့ၤကလံၤတဖၣ်န့ၣ် လူၤတချူးလၢၤဘၣ်.တဘၣ်လိာ်ဖိးဒ့လၢၤဘၣ်အဃိ စးထီၣ်လၢပိာ်မုၣ် ပှၤဟးထီၣ်ကိးဂၤလီၤအဂ့ၫ်”တဲ၀ဲလီၤ.
သုးဟံးန့ၫ်တၫ်စိတၫ်ကမီၤ၀ံၤအလီၫ်ခံ ဒူသ၀ီတဖၣ်အပူၤ သးစၫ်လၢပာ်တ့ၫ်ကွံာ်တၫ်အိၣ်ဆိးလီၫ်တဖၣ်အါထီၣ် ၀ဲကွ့ၫ်ကွ့ၫ်အဂ့ၫ် မိညိၣ်ကီၫ်ဆၣ်,စံတီသ၀ီ သးနံၣ်(၄၀)နံၣ်အိၣ် ပိာ်မုၣ်တဂၤတဲ၀ဲလီၤ.
“ကိးပှၤမၤတၫ်ဖိကီခဲထီၣ်၀ဲလီၤ.ကသူၣ်မိၫ်ဟဲ,တကီၤဆံၣ်အဂီၫ် ဃုကိးပှၤတန့ၫ်လီၤဘၣ်.ကိးဆိပှၤမၤတၫ်ဖိ လၢ တနွံအတီၫ်ပူၤဒၣ်လဲၣ် တအဲၣ်ဒိးန့ၫ်ဘၣ်.၀့ၫ်ပူၤဒီးဒူသ၀ီတကပၤတဒံသိးဘၣ်.သ၀ီပူၤပှၤအါတက့ၫ်န့ၣ် လဲၤမၤတၫ်ဆူ ကၠီၣ်တဲၣ်လီၤ.အခဲအံၤလၢသ၀ီန့ၣ်သးစၫ်တအိၣ်လၢၤဘၣ်.အိၣ်တ့ၫ်ဒၣ်ထဲ၄၀ဘျဲၣ်,၅၀ဘျဲၣ်တဖၣ်လီၤအဂ့ၫ်”တဲ၀ဲလီၤ.
တၫ်ဖံးတၫ်မၤကၤဒီးပနံာ်အပှ့ၤကလံၤတဖၣ်ထီၣ်အဃိ ဖဲသးစၫ်တဖၣ်အကျဲလီၤမၫ်အကတီၫ် ပယီၤသုးန့ၣ် ပာ်လီၤတၫ် ဘျၢလၢသးစၫ်ဘၣ်ကဲသုးဒီးလူၤဖီၣ်ဒုးကဲန့ၫ်ဆူၣ်သုးအါထီၣ်အဃိ သးစၫ်လၢပဒ့ၣ်ဟးဆှဲးကွံာ်အသးအါထီၣ်၀ဲကွ့ၫ်ကွ့ၫ် န့ၣ်လီၤ.
“စးထီၣ်လၢကမျၢၫ်တၫ်ဘၣ်ကဲသုးအိၣ်ထီၣ်န့ၣ် တၫ်ကနုာ်လီၤသုးအဂီၫ်တၫ်ဘၣ်ဖီၣ်တၫ်ဖးလီၤ.သုးတဖၣ်န့ၣ် လူၤဖီၣ်ဒုးကဲန့ၫ်ဆူၣ်သုးလီၤ.မ့ၫ်ထံၣ်လၢကျဲဒီးဖီၣ်၀ဲ,လၢဟံၣ်ဒၣ်လဲၣ်နုာ်လီၤဖီၣ်၀ဲလီၤ.ပှၤတနီၤဟးထီၣ်ကွံာ်ဒီဟံၣ်လီၤ.အိၣ်လၢအံၤတဘၣ်ဂီၫ်လၢၤဘၣ်အဃိ ဘၣ်လဲၤ၀ဲလီၤအဂ့ၫ်”ပှၤလၢအိၣ်ဖဲမ့လးကီၫ်ဆၣ်,စံးကွ့းပူၤ သးနံၣ်(၅၀)နံၣ်အိၣ် ပိာ်ခွါတဂၤတဲ၀ဲလီၤ.
သးစၫ်ဟးထီၣ်အါအါဂီၫ်ဂီၫ်လၢတၫ်ချၢဒ်သိးအံၤ ပယီၤသုးတကပၤမၤဃံးထီၣ်ကီၫ်ဆၢတြဲၤတဖၣ်ဒီး ပှၤလဲၤဆူ ကၠီၣ်တဲၣ်လၢတဖိးသဲစးအကျဲအဃိ ပှၤဘၣ်တၫ်ဖီၣ်လၢကၠီၣ်တဲၣ်ပှၤဘၣ်မူဘၣ်ဒါတဖၣ်အိၣ်၀ဲတလီၫ်လီၫ်န့ၣ်လီၤ.
