လါအီးကထိဘၢၣ် ၂၉သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကၠီၣ်တဲၣ်-ပယီၤကီၢ်ဆၢ သူမွဲကျိၤအပူၤ မဟါအနံၤတသီအတီၢ်ပူၤန့ၣ် ပှၤကီၢ်ချၢဖိတၢ်သံအစိၣ် ၄စိၣ် ဟဲလီၤထွံ၀ဲအဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
“တၢ်ထံၣ်ဘၣ်လၢ အဟဲလီၤထွံလၢ ရၤမတံ၀့ၢ်ဃၢၤ သူမွဲကျိအပူၤလီၤ. လၢဂီၤန့ၣ် အစိၣ်၁စိၣ်, မုၢ်ထူၣ်န့ၣ် ၂စိၣ်, ဟါလီၤခီန့ၣ် ၁စိၣ်ဟဲလီၤထွံ၀ဲ” အဂ့ၢ် ပှၤ၀့ၢ်ရၤမတံ ပိၥ်ခွါတဂၤ စံး၀ဲန့ၣ်လီၤ.
တၢ်သံအစိၣ်တဖၣ်အံၤန့ၣ် အကဲ မတၤအထံဖိကီၢ်ဖိတဖၣ်လဲၣ်န့ၣ် တၢ်တသ့ၣ်ညါဘၣ်၀ဲဒံးဘၣ်အသိး ခီဖျိတၢ်ဂ့ၢ်မနုတဖၣ်အဃိ သံ၀ဲလဲၣ်အဂ့ၢ် တၢ်ပၥ်ဂၢၢ်ပၥ်ကျၢၢ်အီၤတန့ၢ်ဒံးဘၣ်.
ဖဲအပူၤကွံၥ် လါအီးကထိဘၢၣ် ၂၅သီအနံၤစ့ၢ်ကီး ပှၤကီၢ်ချၢဖိ ၂ဂၤ ဃ့ၢ်ပူၤဖျဲးထီၣ်လၢ KK Parkအပူၤ၀ံၤ ကလဲၤခီဆူ ကီၢ်ကၠီၣ်တဲၣ်အဂီၢ် လဲၤခီ၀ဲသူမွဲကျိအဆၢကတီၢ် ဘၣ်လီၤအုးသံလၢထံန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကရူၢ်အံၤ နုၥ်လီၤဖီၣ်၀ဲ ကၠါဖၠးတၢ်ဖံးတၢ်မၤတဖၣ်အိၣ်အလီၢ် KK Parkအဂ့ၢ် သုးကရူၢ်အံၤန့ၢ်ပၢ အမံၣ်ဒံၣ်ယၣ်တဖၣ် ရၤလီၤ၀ဲတၢ်ကစီၣ်တဖၣ် ဖဲလါအီးကထိဘၢၣ် ၁၉သီအနံၤ၀ံၤအလီၢ်ခံ ဖဲလါအီးကထိဘၢၣ် ၂၂သီအနံၤ ဂီၤအဆၢကတီၢ်န့ၣ် အိးထီၣ်၀ဲ KK Parkတၢ်နုၥ်လီၤဟးထီၣ် တြဲၤတဖၣ်န့ၣ်လီၤ.
၀ံၤအလီၢ်ခံ ပှၤလၢဖံးမၤ ကၠါဖၠးအိၣ်လဲတၢ်လံၣ်တၢ်လီကဲတဖၣ်အံၤ လဲၤနုၥ်လီၤဆူ ကၠီၣ်တဲၣ်ပူၤလၢ ရၤမတံ၀့ၢ် တိၤ နီၣ်ဂံၢ် ၁တဆီလၢ အဖိးသဲစးအပူၤန့ၣ်လီၤ. ဖဲန့ၣ်အကျါ တနီၤစ့ၢ်ကီးန့ၣ် ဟဲနုၥ်လီၤခူသူၣ်လၢ တဖိးသဲစးအပူၤအိၣ်၀ဲန့ၣ်လီၤ.
ကတီၢ်ခဲအံၤန့ၣ် ပှၤလၢဟဲစံၣ်ဖျိးထီၣ်လၢ KK Parkဒီး လဲၤခီဆူ ကၠီၣ်တဲၣ်ပူၤတဖၣ် ကအိၣ်ဆိးအဂီၢ် တၢ်ရဲၣ်ကျဲၤန့ၢ်ဃၥ်၀ဲ တၢ်လီၢ် ၄တီၤ၀ံၤ ပှၤကီၢ်ချၢဖိလၢ ဟဲဃ့ၢ်ဟးထီၣ်လၢ ကၠါဖၠးတၢ်မၤလီၢ်ပူၤ ၁ကထိဘျဲၣ်တဖၣ် ကအိၣ်ဆိးအဂီၢ် တၢ်ဟ့ၣ်ပျဲအိၣ်ဆိး၀ဲတစိၢ်တလီၢ်အဂ့ၢ် ကၠီၣ်တဲၣ်တၢ်ကစီၣ်သန့တဖၣ် ပၥ်ဖျါဃၥ်၀ဲန့ၣ်လီၤ.
