လါအီးကထိဘၢၣ် ၂၇သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၢ်စဲၣ်, ရၤမတံကီၢ်ဆၣ်အပူၤအိၣ် ကၠါဖၠးတၢ်ဖံးတၢ်မၤတဖၣ်အိၣ်အလီၢ်လၢအမ့ၢ် KK Parkအံၤ ကညီဒီကလုၥ်စၢဖှိၣ်ကရၢ (KNU)တခီ တၢ်ဒိးလဲလီၤဟီၣ်ခိၣ်ကပံၥ်တဖၣ်, ခိးန့ၢ်တၢ်ဘံၣ်တၢ်ဘၢဟံတၢ်အလဲဒီးဒိးန့ၢ်ဘၣ်တၢ်ဘၣ်ဘျူးတဖၣ်အိၣ်၀ဲအဂ့ၢ် သုးကီၣ်မံးရှၢၣ်အတၢ်တဲပဲၥ်အၢပဲၥ်သီတဖၣ်အဖီခိၣ် ဂ့ၢ်လိၥ်၀ဲတဲၥ်တဲၥ်ဖျူဖျူအဂ့ၢ် (KNU) ထုးထီၣ်ပၥ်ဖျါဃၥ်၀ဲ မဟါအနံၤန့ၣ်လီၤ.
သုးကီၣ်မံးရှၢၣ် ပှၤကတိၤတၢ်ပၢ စီၣ်မ့ထိ အတၢ်တဲၥ်ပဲၥ်အၢပဲၥ်သီလၢ မူးလအံးခီပနံၥ်လၢ အမၤသကိးတၢ်ဒီး ဟီၣ်ခိၣ်ကပံၥ် အ့ကၢၣ် ၁၀၀ (Trans- Asia International Holding Group (Thailand) ခီပနံၥ်အံၤန့ၣ် ဖဲအပူၤကွံၥ် ၂၀၂၂နံၣ်, လါဒံၣ်စ့ဘၢၣ်လံၤလံၤ ပတုၥ်ကွံၥ်ဟးထီၣ်၀ဲ၀ံၤလံအဂ့ၢ်, အ့ကၢၣ် ၅၀၀အိၣ် ဟီၣ်ခိၣ်ကပံၥ်လၢ တၢ်ဖံးမၤ KK Park အိၣ်လဲတၢ်လံၣ်တၢ်လီကျိၥ်စ့တၢ်လီၢ်အံၤအိၣ်၀ဲလီၤလီၤဆီဆီလီၤအဂ့ၢ်, ဟီၣ်ခိၣ်ကပံၥ်တၢ်လီၢ်တတီၤဒီးတတီၤန့ၣ် အိၣ်စီၣ်စုၣ်လိၥ်သး ယံၤ ၃ကံၣ်လိၣ်မံၣ်ထၢၣ်အဂ့ၢ် KNUစံး၀ဲန့ၣ်လီၤ.
လၢတၢ်န့ၣ်အဃိ KK Park အိၣ်လဲတၢ်လံၣ်တၢ်လီကျိၥ်စ့တၢ်ဖံးတၢ်မၤန့ၣ် လ့ၤတက့ၤ တဘၣ်ထွဲဘၣ်ဃးလိၥ်အသးဒီး KNUဘၣ်အဂ့ၢ် ဘၣ်ထွဲဒီး သုးကီၣ်မံးရှၢၣ် ပှၤကတိၤတၢ်ပၢ အတၢ်တဲပဲၥ်အၢပဲၥ်သီအဖီခိၣ် ဂ့ၢ်လိၥ်၀ဲတဲၥ်တဲၥ်ဖျူဖျူအဂ့ၢ်, သုးကရူၢ်အံၤ ကီၢ်ပယီၤအပူၤအိၣ် အိၣ်လဲတၢ်လံၣ်တၢ်လီကျိၥ်စ့ကဲတဖၣ်အပူၤ ဒိးန့ၣ်ဘၣ်၀ဲ ထံရူၢ်ကီၢ်သဲး, မုၥ်ကျိၤ၀ဲၤကွၥ်ဒီး သုးဂ့ၢ်၀ီတၢ်ဘၣ်ဘျူးတဖၣ်အဖီခိၣ် အဲၣ်ဒိးမၤဘၢကွံၥ်အီၤအဃိ တဲအၢတဲသီ၀ဲ KNU ၀ံၤ ဘိးဘၣ်ရၤလီၤ၀ဲ တၢ်ကစီၣ်အယီၤအဘျၣ် တမ့ၢ်တတီတဖၣ်ဘၣ်အဂ့ၢ် စံး၀ဲန့ၣ်လီၤ.
တလါအံၤအတီၢ်ပူၤန့ၣ် သုးကီၣ်မံးရှၢၣ်အသုး ကနုၥ်လီၤဖီၣ်တၢ်ကဒီး ၀ဲ KK Parkအဂ့ၢ် တၢ်ကစီၣ်တဖၣ်ဟးထီၣ်၀ဲအဃိ KK Parkအပူၤအိၣ် ပှၤကီၢ်ပယီၤဖိပၣ်ဃုၥ် ကၠီၣ်တဲၣ်, တရူးထံဖိကီၢ်ဖိတဖၣ်လၢ အဖံးမၤကၠါဖၠးတၢ်ဖံးတၢ်မၤတဖၣ်အံၤ လါအီးကထိဘၢၣ် ၂၂သီအနံၤ ဂီၤအဆၢကတီၢ်န့ၣ် ဃ့ၢ်ဟးဆှဲထီၣ်ဆူ ၀့ၢ်ရၤမတံဒီး ကၠီၣ်တဲၣ်တခီပၤ ၀့ၢ်မဲဆီးတပၤန့ၣ်လီၤ.
