လါအီးကထိဘၢၣ်(၂၇)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ပယီၤသုးခီၣ်မံးရှၢၣ်အခိၣ် မ့အီၣ်လဲၣ်န့ၣ် လၢ၀့ၫ်ကွၣ်လၣ်လၣ်ပူၣ်အပူၤ တၫ်ကမၤ၀ဲ(၄၇)၀ီတ၀ီ အၣ်စံၣ်ယၣ်ပတီၫ်ထီ တၫ်အိၣ်ဖှိၣ်န့ၣ် တန့ၫ်ခွဲးလၢကဟဲထီၣ်၀ဲဘၣ်အဂ့ၫ် မလ့ရှါကိတိာ်ခိၣ်ကျၢၫ် အၣ်၀ၣ်အံၣ်ဘရၣ်ဟ့ၣ် ပာ်ဂၢၫ်ပာ်ကျၢၤ၀ဲ လီၤ.
ကီၫ်ပယီၤဂ့ၫ်၀ီတၫ်ဃံးတၫ်စ့ၤ တၫ်ပညိၣ်ဘှါဆှဲ၀ဲအဂီၫ် တၫ်အၢၣ်လီၤ(၅)ထံၣ်န့ၣ် အၣ်စံၣ်ယၣ်ကရၢ လူၤပိာ်မၤထွဲ၀ဲ ဂၢၫ်ဂၢၫ်ကျၢၤကျၢၤအဂ့ၫ် တဲ၀ဲလီၤ.
ရၢးရှၢၣ်ကီၫ်ခိၣ် ဘလၣ်ဒံၣ်မံၣ်ယၣ်ပူၣ်တ့ၣ်စ့ၫ်ကီး တဟဲထီၣ်အၣ်စံၣ်ယၣ်ပတီၫ်ထီတၫ်အိၣ်ဖှိၣ်ဘၣ်အဂ့ၫ် အၣ်၀ၣ်အံၣ်ဘရၣ်ဟ့ၣ် တဲဃာ်၀ဲဖဲလါအီးကထိဘၢၣ်(၂၂)သီအနံၤန့ၣ်လီၤ.
လၢပူၣ်တ့ၣ်အခၢၣ်စး ကိတိာ်ခိၣ်ကျၢၫ်ခံ အလဲးစဲဒါနိၣ်ဘဲးန့ၣ် လၢကီၫ်ရှရှၢၣ်အခၢၣ်စး ကဟဲထီၣ်အၣ်စံၣ်ယၣ် တၫ်အိၣ်ဖှိၣ်အဂ့ၫ် အ၀ဲတဲ၀ဲလီၤ.
လါအီးကထိဘၢၣ်(၂၆)သီတုၤ(၂၈)သီအနံၤ အၣ်စံၣ်ယၣ်ပတီၫ်ထီတၫ်အိၣ်ဖှိၣ်အပူၤ အမဲရကၤကီၫ်ခိၣ်ဒီနၢၣ်ထရၢး ပာ်ဃုာ် ခိၣ်နၫ်လၢမံၤဟူသၣ်ဖျါတဖၣ်ကဟဲထီၣ်၀ဲလီၤ.
ဖဲသုးလီၣ်ဘံၣ်တဖၣ် ကွဲးဖျါထီၣ်၀ဲလၢသုးခီၣ်မံးရှၢၣ်အခိၣ်မ့အီၣ်လဲၣ် ကဟဲထီၣ်အၣ်စံၣ်ယၣ်တၫ်အိၣ်ဖှိၣ်အကတီၫ် အၣ်၀ၣ်အံၣ်ဘရၣ်ဟ့ၣ် တဲပာ်ဂၢၫ်ပာ်ကျၢၤ၀ဲဒ်သိးအံၤန့ၣ်လီၤ.
၂၀၂၁နံၣ်,ဖ့ၤဘြူၤအါရံၤ တၫ်ဟံးန့ၫ်တၫ်စိတၫ်ကမီၤအပူၤ လၢဒံၣ်မိၣ်ကရ့ၣ်စံၣ်ကျဲကမျၢၫ်ပဒိၣ်လၢတၫ်ဃုထၢထီၣ်အီၤ သုးခိၣ်နၫ်တဖၣ်လၢထုးလီၤတဲာ်၀ဲအံၤ ဟီၣ်က၀ီၤပူၤဒီးအၣ်စံၣ်ယၣ်ပတီၫ်ထီတၫ်အိၣ်ဖှိၣ်တဖၣ် ကဟဲထီၣ်၀ဲအဂီၫ် ဘၣ်တၫ်တြီဃာ်၀ဲန့ၣ်လီၤ.
