လါအီးကထိဘၢၣ် ၂၇သီ, ၂၀၂၅နံၣ်, အၣ်ထူခ့တၢ်ကစီၣ်
တနီသရံၣ်ကီၢ်ခီ, ပလီၢ်ကီၢ်ဆၣ်အပူၤ သုးကီၣ်မံးရှၢၣ်အသုးအံၤ ဒ်သိးကဒိၣ်စိက့ၤ ဘျံး-ဒ၀ဲၢ်ကီၢ်စၢဖှိၣ်ကျဲမုၢ်ဖးဒိၣ်အဂီၢ် ဒွဲၣ်အူမၤဟးဂီၤကွံၥ် ဟံၣ်ဃီတဖၣ်, ခးလီၤကျိဖးဒိၣ်တဖၣ်၀ံၤ မၤ၀ဲတၢ်နုၥ်လီၤသုးကျိၤတဖၣ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
လါအီးကထိဘၢၣ် ၂၄သီအနံၤ, ကီၢ်စၢဖှိၣ်ကျဲမုၢ်ဖးဒိၣ်အကပၤအိၣ် သ့ၣ်ကါတီသ၀ီအကပိၥ်ကပၤအဃၢၤ တၢ်ပၢၢ်ဆၢသုးပၥ်ဖှိၣ်ဒီး သုးကီၣ်မံးရှၢၣ်အသုးအဘၢၣ်စၢၤ တၢ်ဘၣ်သဂၢၢ်ဒုးလိၥ်သးအိၣ်ထီၣ်၀ဲ ဒီတနံၤ၀ံၤ သုးကီၣ်မံးရှၢၣ်အသုးန့ၣ် ဟါလီၤခီ ၃နၣ်ရံၣ်အဆၢကတီၢ်ဃၣ်ဃၣ် ဟဲနုၥ်လီၤဒွဲၣ်အူမၤဟးဂီၤကွံၥ် သ့ၣ်ကါတီသ၀ီ ဟံၣ်၆ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ပှၤလၢအိၣ်ဘူးဒီးတၢ်ပၢၢ်ဆၢကရၢတဂၤ စံး၀ဲလၢ” စကစ န့ၣ်ဒ်သိး ကဒိၣ်စိက့ၤ ကီၢ်စၢဖှိၣ်ကျဲမုၢ်ဖးဒိၣ်အဂီၢ် ခးစၢၤကျိဖးဒိၣ်တဖၣ်ဒီး ဟးနုၥ်လီၤသုးကျိၤတဖၣ်လီၤ. ၀ံၤအလီၢ်ခံ ဟးဒွဲၣ်အူမၤဟးဂီၤကွံၥ် ဟံၣ်ဃီတဖၣ်လီၤ. ဒုးတ့ၢ်လီၤ ဒြိမ့ၣ်ပိၢ်တဖၣ်ကိးမုၢ်နံၤလီၤ. ပှၤလၢကျိၥ်စ့အိၣ်တနီၤတခီ လဲၤအိၣ်ဆူ၀့ၢ်တပၤ၀ံၤ လီၢ်က၀ီၤဖိအါတက့ၢ်တခီ လဲၤအိၣ်ကဒု၀ဲဒၣ်ဖဲ ကျီးတဖၣ်အပူၤ” အဂ့ၢ်န့ၣ်လီၤ.
ဖဲအပူၤကွံၥ် လါစဲးပထ့ဘၢၣ်အလၢၥ်ဒီး လါအီးကထိဘၢၣ်အတီၢ်ပူၤ သုးကီၣ်မံးရှၢၣ်အသုး လဲၤနုၥ်လီၤဒွဲၣ်အူမၤဟးဂီၤကွံၥ်၀ဲ ပလးသ၀ီကရူၢ်, မ့ပၠ့ၣ်သ၀ီအပူၤအိၣ် ဟံၣ် ၂၈ဖျၢၣ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
သုးကီၣ်မံးရှၢၣ်အသုး ဟဲဆီလီၤပၥ်အသုးဂံၢ်ဘါ ၂၀၀ဃၣ်ဃၣ် ဖဲ ပလး၀့ၢ်အပူၤ၀ံၤ ခးလီၤ၀ဲကျိဖးဒိၣ်တဖၣ်ဆူ သ၀ီလၢအိၣ်ဘူးဒီးဖဲန့ၣ်အသိး, နုၥ်လီၤသုးကျိၤတဖၣ်, နုၥ်လီၤသုးကျိၤဒွဲၣ်အူမၤဟးဂီၤကွံၥ်ဟံၣ်ဃီတဖၣ်အဃိ ပလးသ၀ီကရူၢ်, တိၣ်သ၀ီကရူၢ်, ကဒဲသ၀ီကရူၢ်, လဲးကၠူသ၀ီကရူၢ်, မ့ထ့ၣ်သ၀ီကရူၢ်တဖၣ်အပူၤ လီၢ်က၀ီၤဖိ ၅ကထိဘျဲၣ် ဘၣ်ဃ့ၢ်ပူၤဖျဲးသးအဂ့ၢ် တၢ်သ့ၣ်ညါဘၣ်န့ၣ်လီၤ.
ပှၤလီၢ်အိၣ်ကမှံဖိတဂၤ စံး၀ဲလၢ” အါတက့ၢ်န့ၣ် ဘၣ်အိၣ်၀ဲဒၣ်လၢ ပျီပူၤတၢ်လီၢ်န့ၣ်လီၤ. သုးကီၣ်မံးရှၢၣ် အသုးကထံၣ်အီၤတၢ်ဆၢကတီၢ်ဖဲလဲၣ်ဒီး ကဖီၣ်အီၤအဆၢကတီၢ်ဖဲလဲၣ်န့ၣ် ဘၣ်ပျံၤဘၣ်၀ဲအဂ့ၢ်” စံး၀ဲန့ၣ်လီၤ.
သုးကီၣ်မံးရှၢၣ်အသုးန့ၣ် ကဒိၣ်စိက့ၤ ပလီၢ်ကီၢ်ဆၣ်အပူၤ ကီၢ်စၢဖှိၣ်ကျဲမုၢ်ဖးဒိၣ်ဒီတကျိၤအဂီၢ် ဒွဲၣ်အူမၤဟးဂီၤကွံၥ် လီၢ်က၀ီၤကမျၢၢ်ဟံၣ်ဃီ ၄၀ဖျၢၣ်ဃၣ်ဃၣ်၀ံၤ နုၥ်လီၤကဒီးသုးကျိၤတဖၣ်၀ံၤ တၢ်ဘၣ်သဂၢၢ်ဒုးလိၥ်အသးဒီး တၢ်ပၢၢ်ဆၢသုးတဖၣ်အဘၢၣ်စၢၤအဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
