လါအီးကထိဘၢၣ်(၁၄)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
၀့ၫ်တီအူအဖီခိၣ် တၫ်ဖီၣ်ညၣ်game တဖိးသဲစးလၢဘၣ်တၫ်သ့ၣ်ညါဒ်ကၣ်စံၣ်နိၣ် တၫ်တၤကျိာ်တၤစ့တၫ်လီၫ်တဖၣ် ကီၫ်ဆၣ် ဟီၣ်က၀ီၤပၢၤကီၫ်ဒီး၀ဲၤကျိၤလၢဘၣ်ထွဲတဖၣ် ဟ့ၣ်ဃာ်တၫ်ပျဲအဂ့ၫ် ပှၤ၀့ၫ်ဖိတဖၣ်တဲ၀ဲလီၤ.
တၫ်တၤကျိာ်တၤစ့ တၫ်လိာ်ကွဲလီၫ်လၢတဖိးသဲစးအံၤ လၢ၀့ၫ်တီအူ,က၀ီၤဒ့တဖၣ်အပူၤ တၫ်ထံၣ်ဘၣ်၀ဲဒီးကိးမုၫ်နံၤအိၣ် ပှဲၤဒီးပှၤဟဲလိာ်ကွဲတဖၣ်အဂ့ၫ် တၫ်သ့ၣ်ညါဘၣ်လီၤ.
၀့ၫ်တီအူအဖီခိၣ် က၀ီၤဒ့(၂၃)ခါအပူၤ တၫ်လိာ်ကွဲအလီၫ်လၢအဖိးသဲစးဒ်သိးန့ၣ် အိၣ်၀ဲ(၅၀)ဘျဲၣ်အဂ့ၫ် တၫ်သ့ၣ်ညါ ဘၣ်လၢပှၤ၀့ၫ်ဖိတဖၣ်အိၣ်န့ၣ်လီၤ.
“အပူၤကွံာ် လၢ၀့ၫ်တီအူအပူၤ ကၣ်စံၣ်နိၣ် တၫ်တၤကျိာ်တၤစ့ကျးတဖၣ်တအိၣ်အါဘၣ်.အိၣ်ထဲ(၂)ခါလီၤ.သုးဟံးန့ၫ် ထံကီၫ်တၫ်စိတၫ်ကမီၤ၀ံၤအလီၫ်ခံ လၢက၀ီၤဒ့ကိးဘ့ၣ်အပူၤ အိၣ်ထဲတၫ်လိာ်ကွဲအလီၫ်လီၤ.ပှၤလၢကဟဲဖီၣ် တၫ်စ့ၫ်ကီး တအိၣ်ဘၣ်.မၤ၀ဲပျီပျီလီၤအဂ့ၫ်”ပှၤ၀့ၫ်တီအူဖိတဂၤတဲ၀ဲလီၤ.
တၫ်တၤကျိာ်တၤစ့အလီၫ်လၢဘၣ်တၫ်သ့ၣ်ညါအီၤဒ်တၫ်ဖီၣ်ညၣ်gameအံၤ အိးထီၣ်၀ဲပျီပျီဒ်ဒိးန့ၫ်ဃာ် လဲၣ်စ့ၣ်အသိး လီၤဒီးတၫ်လိာ်ကွဲတဖၣ်အံၤအဃိ ပှၤဂ့ၫ်၀ီတၫ်သဘံၣ်သဘုၣ်တဖၣ် ဘၣ်ကဲထီၣ်၀ဲလီၤ.၀့ၫ်တီအူအပူၤ ပှၤပိာ်ခွါတဂၤ အကျိာ်စ့လၢာ်ကွံာ်လၢ တၫ်ဖီၣ်ညၣ်gameအလီၫ်ဒီးထုးထီၣ်ကဒါက့ၤအလ့ၣ်ယီၫ်စဲးတန့ၫ်လၢၤဘၣ်အဃိ ဖဲအပူၤကွံာ် လါယူၤလံ(၁၀)သီအနံၤန့ၣ် မၤသံလီၤအနီၫ်ကစၫ်အသးန့ၣ်လီၤ.
“ပလဲၤလိာ်ကွဲကိးမုၫ်နံၤဃၣ်ဃၣ်လီၤ.တဘျီတခီၣ်နၢၤလီၤ.အါလၢတနၢၤလီၤ.လၢ Money Gameကျးန့ၣ် ပှၤလၢဟဲဒိး လဲလီၤတၫ်အိၣ်၀ဲအဃိ လ့ၣ်ယီၫ်စဲးလၢဟဲပာ်ဃုာ်အံၤ လဲၤဒိးလဲလီၤဒီးလိာ်ကွဲလီၤ. Money Gameအဃိ ပှၤအါတက့ၫ် ထံၣ်ဘၣ်တၫ်ကီလီၤ.တုၤလၢဒီမါ၀ၤလီၤဖးအပတီၫ်ညါအဂ့ၫ်”ပှၤ၀့ၫ်တီအူဖိသးစၫ်လၢလိာ်ကွဲဘၣ်တ့ၫ်၀ဲလၢအနီၫ်ကစၫ်တဂၤ တဲ၀ဲန့ၣ်လီၤ.
