လါစဲးပထ့ဘၢၣ် ၂၄သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကၠီၣ်တဲၣ်ကလံၤစိး, ၀့ၢ်ကံၢ်မဲ, မဲးခၠါအပူၤ ဖဲလါစဲးပထ့ဘၢၣ် ၂၂သီအနံၤန့ၣ် မူခိၣ်စူၤဒိၣ်အဃိ မဟါအနံၤ,ဂီၤအဆၢကတီၢ် မဲးခၠါထံကျိထံဒိၣ်၀ံၤ ဟံၣ်ဃီအါအါဂီၢ်ဂီၢ် ထံလူၢ်ဘၢကွံၥ်၀ံၤ ဂ့ၢ်ဂီၤအူ ဘၣ်သုးကစီၤအသးအဂ့ၢ် ကံၢ်မဲတၢ်ကစီၣ် ပၥ်ဖါဃၥ်၀ဲန့ၣ်လီၤ.
မဟါဂီၤအဆၢကတီၢ်န့ၣ် မဲးခၠါထံကျိထံဒိၣ်နိယွၤအဃိ မဲးခၠါကီၢ်ဆၣ်, ခၠၣ်ခါက၀ီၤဒ့အပူၤအိၣ် ဟံၣ်ဃီတဖၣ်, တၢ်သိၣ်လိကၠိတဖၣ်တကးဘၣ် စံၣ်လီၢ်တဖၣ်အပူၤစ့ၢ်ကီး ထံဒိၣ်နိယွၤကဲထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ခီဖျိထံဒိၣ်နိယွၤအဃိ မုၥ်ကျိၤ၀ဲၤကွၥ်အဂီၢ် တၢ်လီၢ်လၢအရ့ဒိၣ်တဖၣ်ဒ်အမ့ၢ် ပဒိၣ်၀ဲၤဒၢးတဖၣ်, ကၠိတဖၣ်, မုၥ်ကျိၤ၀ဲၤကွၥ်တၢ်လီၢ်တဖၣ်တကးဘၣ် ဟံၣ်ဃီအါအါဂီၢ်ဂီၢ် ထံလူၢ်ဘၢကွံၥ်၀ံၤ Tha Phaကီၢ်ဆၣ်အဒ့ဒီး Chang Khoengကီၢ်ဆၣ်အဒ့ တၢ်လီၢ်တနီၤအပူၤအိၣ် တၢ်သူၣ်တၢ်ဖျးဟီၣ်ခိၣ်လီၢ်တဖၣ် ထံလူၢ်ဘၢကွံၥ်၀ဲအဃိ လီၢ်က၀ီၤပှၤမၤအီၣ်၀ဲၤဖိတဖၣ် တၢ်ဘၣ်ဒိၣ်ဘၣ်ထံးတဖၣ်အိၣ်ထီၣ်၀ဲအဂ့ၢ် စံး၀ဲန့ၣ်လီၤ.
ကတီၢ်ခဲအံၤန့ၣ် ဂ့ၢ်ဂီၤအူပှၤမၤပူၤဖျဲးတၢ်ဖိတဖၣ် သုးကစီၤန့ၢ်၀ဲ လီၢ်က၀ီၤဖိတဖၣ်ဆူ တၢ်လီၢ်လၢအပူၤဖျဲးတဖၣ်အအိၣ်အသိး သုးကစီၤန့ၢ်စ့ၢ်ကီး ပှၤလၢဘၣ်ကွၢ်ဆၢၣ်မဲၥ်သ့ဒီးတၢ်လီၤဘၣ်ယိၣ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ရၤကၤဆၣ် (RAGASA)တဲၣ်ဖိကလံၤမုၢ်လၢ အကဲထီၣ်သးဖဲ ကလံၤထံးတရူးပီၣ်လဲၣ်နံၤအပူၤအံၤ အသဟီၣ်အဃိ မိးသိၣ်ကလံၤအဂံၢ်ဆူၣ်၀ဲ၀ံၤ မူခိၣ်စူၤဒိၣ်သ့လၢ ကၠီၣ်တဲၣ်ကလံၤစိးတပၤအဂ့ၢ် ကၠီၣ်တဲၣ်မူခိၣ်ကလံၤသီၣ်ဂီၤ၀ဲၤကျိၤ ဟ့ၣ်ဒုးသ့ၣ်ညါထုးထီၣ်ပၥ်ဖျါဃၥ်၀ဲန့ၣ်လီၤ.
