လါစဲးပထ့ဘၢၣ်(၁၈)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၫ်စဲၣ်,ကြုၫ်တု-ကီးတရံးကျဲအကပၤဒူသ၀ီတဖၣ် သုးခီၣ်မံးရှၢၣ် ကမၤန့ၫ်ပၢဆှၢကဒါက့ၤ၀ဲအဂီၫ် ဂဲၤလိာ်၀ဲအဃိတၫ်ဒုးကဲထီၣ်၀ဲကိးမုၫ်နံၤဒဲးဃၣ်ဃၣ်လၢကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)တီခိၣ်ရိၣ်မဲသုးပာ်ဖှိၣ်တဖၣ်အဂ့ၫ် ပှၤလီၫ်က၀ီၤဖိတဖၣ်တဲ၀ဲလီၤ.
ပှၤလီၫ်က၀ီၤဖိတဂၤတဲ၀ဲလၢ”တၫ်ဒုးဆူၣ်၀ဲလီၤ.ကြုၫ်တုအဆၢခိၣ်အ့ရှၢၣ်ကျဲလီၤ.တၫ်ဒုးကဲထီၣ်ကိးမုၫ်နံၤဃၣ်ဃၣ်လီၤ.ကိးမုၫ်နံၤဒဲး သုးကဘီယူၤHelicopterဟဲထီၣ်လွံၫ်ဘျီ,ယဲၫ်ဘျီလီၤ.ပှၤလီၫ်က၀ီၤဖိတဖၣ်ဒု ပဒ့ၣ်ဟးဆှဲးအသးလံ.အခဲ အံၤ ပှၤလီၫ်က၀ီၤဖိလၢက့ၤဆူဒူသ၀ီတန့ၫ်အိၣ်၀ဲအါမးအဂ့ၫ်”တဲ၀ဲလီၤ.
လၢ၀့ၫ်ကြုၫ်တုအကပၤ ကၠိၣ်ဘဲသ၀ီ,ပၠဲးခးသံၣ်ဟး တၫ်လူၫ်ခိၣ်စ့ၫ်ကီး သုးခီၣ်မံးရှၢၣ်အသုး ဂဲၤလိာ်၀ဲလၢကမၤန့ၫ်ကဒါ က့ၤ၀ဲအဃိ စးထီၣ်ဖဲလါစဲးပထ့ဘၢၣ်(၁၀)သီအနံၤန့ၣ် ခံကပၤတၫ်ဒုးဆူၣ်၀ဲလီၤ.သုးခီၣ်မံးရှၢၣ်အသုးတဖၣ် ဘၣ်ခးစၢၤ ၀ဲလၢကလံၤကျါဒီးကျိဖးဒိၣ်တဖၣ်န့ၣ်လီၤ.
သုးဂ့ၫ်၀ီဂ့ၫ်ခီၣ်ထံးတၫ်ကစီၣ်တဲ၀ဲလၢ”အ၀ဲသ့ၣ်တကပၤ ဟဲထီၣ်ဒုးဃီၤတၫ်လၢကိးကပၤဒဲးလီၤ.ပ၀ဲဒုတၫ်လၢပကြၢး မၤတဖၣ် ပအိၣ်ကတဲာ်ကတီၤဆိသးလီၤ.ဒုးဒါတကပၤမၤအါထီၣ်အသုးဂံၫ်ဘါန့ၣ် ပဒိးန့ၫ်ဃာ်တၫ်ကစီၣ်အိၣ်အဂ့ၫ် ”တဲ၀ဲလီၤ.
ကြုၫ်တု ၅၄၅,၅၄၆ သုးကလၢၤန့ၣ် ဒူသ၀ီလၢတယာ်၀ဲလၢတၫ်ပၢၫ်ဆၢသုးဖိအိၣ်တဖၣ်န့ၣ် ခးလီၤ၀ဲလၢကျိဖးဒိၣ် တဖၣ်အဃိ ဟံၣ်ဃီဘၣ်ဟးဂီၤ,ဆၣ်ဖိကီၫ်ဖိဘၣ်သံဒီးပှၤဘၣ်ဒိဘၣ်ထံးအိၣ်၀ဲန့ၣ်လီၤ.
ဒ်န့ၣ်အသိး လၢကၠဲးမရီကီၫ်ဆၣ်,ကီးပနီးသ၀ီဒီးလၢခၠီနးခွးတကပၤ သုးခီၣ်မံးရှၢၣ်အသုး ခးလီၤကျိဖးဒိၣ်ကိးနံၤဒဲးဃၣ် ဃၣ်ဒီးဂဲၤလိာ်၀ဲလၢကမၤအါထီၣ်သုးဂံၫ်ဘါအဂ့ၫ် တၫ်သ့ၣ်ညါဘၣ်လၢသုးဂ့ၫ်၀ီဂ့ၫ်ခီၣ်ထံးတၫ်ကစီၣ်ဒီးပှၤလီၫ်က၀ီၤဖိ တဖၣ်အိၣ်န့ၣ်လီၤ.
