လါစဲးပထ့ဘၢၣ်(၁၇)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကီၫ်ကၠီၣ်တဲၣ်,ကၣ်ခၠးနးဘူၣ်ရံၤ,ထီၣ်ဖၣ်ဖိၣ်အပူၤ ခီကီၫ်ပှၤတၫ်ဖိတဖိးသဲစးလၢအိၣ်ဟဲလၢကီၫ်ပယီၤ ၁၁၀ဂၤဘျဲၣ် ဖဲ လါစဲးပထ့ဘၢၣ်(၁၆)သီအနံၤကၠီၣ်တဲၣ်ပှၤဘၣ်မူဘၣ်ဒါတဖၣ် ဖီၣ်န့ၫ်ကဒီး၀ဲအဂ့ၫ် လီၫ်က၀ီၤကၠီၣ်တဲၣ်တၫ်ကစီၣ်န့တဖၣ် ပာ်ဖျါ၀ဲလီၤ.
ကီၫ်ပယီၤခီကီၫ်ပှၤမၤတၫ်ဖိတဖၣ် ကဟဲနုာ်လီၤဆူ ကီၫ်ကၠီၣ်တဲၣ်လၢတဖိးသဲစးအပူၤဒီးသိလ့ၣ်တဖၣ် ဖဲလါစဲးပထ့ ဘၢၣ်(၁၅)သီအနံၤ,ဟါ(၁၀)နၣ်ရံၣ်ဃၣ်ဃၣ်အကတီၫ် ထီၣ်ဖၣ်ဖိၣ်ကီၫ်ရ့ၣ်ပၢပြးဘၣ်မူဘၣ်ဒါန့ၣ် ဒိးန့ၫ်ဃာ်တၫ်ကစီၣ် ဒီးဒုးအိၣ်ထီၣ်ကရၢလီၤဆီ၀ံၤဟးလူၤဃုသမံသမိး၀ဲအဂ့ၫ်,ဒီးဖဲစဲးပထ့ဘၢၫ်(၁၆)သီနံၤ,ဂီၤ(၁)နၣ်ရံၣ်ဃၣ်ဃၣ်အကတီၫ် ပှၤဘၣ်မူဘၣ်ဒါတဖၣ် ထံၣ်၀ဲသိလ့ၣ်(၃)ခိၣ်လၢတအိးထီၣ်ဃာ်မ့ၣ်အူဒီးပှၤတဒူၣ်အဂ့ၫ် တၫ်ကစီၣ်ပူၤ ပာ်ဖျါ၀ဲလီၤ.
ဖဲကၠီၣ်တဲၣ်ပဒိၣ်တဖၣ် ဟဲသုးဘူးလီၤသးအကတီၫ် သိလ့ၣ်ကစၫ်တဖၣ် ဃ့ၫ်ဖျိကွံာ်အဂ့ၫ်,ဒီးလၢသိလ့ၣ်(၃)ခိၣ်၀ဲန့ၣ် အပူၤ တၫ်ဖီၣ်န့ၣ်၀ဲ ကီၫ်ပယီၤခီကီၫ်ပှၤမၤတၫ်ဖိ(၃၁)ဂၤ,ပိာ်မုၣ်(၂၁)ဂၤဒီးသးနံၣ်(၂)နံၣ်အိၣ် ဖိသၣ်(၂)ဂၤပာ်ဃုာ်အဂ့ၫ် လီၫ်က၀ီၤကၠီၣ်တဲၣ်တၫ်ကစီၫ်တဖၣ်ပာ်ဖျါ၀ဲလီၤ.
ဖီၣ်တၫ်၀ဲန့ၣ်၀ံၤအလီၫ်ခံ ပှၤဘၣ်မူဘၣ်ဒါတဖၣ်န့ၣ် ဒိးန့ၫ်ကဒီးတၫ်ကစီၣ်လၢ ပှၤကဟဲကဒီးလၢသိလ့ၣ်(၃)ခိၣ်အဃိ လူၤဃုသမံသမိး၀ဲဒီးဖီၣ်န့ၫ်ကဒီး၀ဲလီၤ.ဖဲန့ၣ်တၫ်ဖီၣ်န့ၫ်ကဒီး၀ဲခီကီၫ်ပှၤမၤတၫ်ဖိတဖိးသဲစး ပိာ်ခွါ(၇၃)ဂၤ, ပိာ်မုၣ်(၃၈) ဂၤဒီးဖိသၣ်(၂)ဂၤပာ်ဃုာ် ခဲလၢာ် ၁၁၃ဂၤအဂ့ၫ် တၣ်ကစီၣ်ပူၤ ပာ်ဖျါ၀ဲလီၤ.
လၢပှၤကျိာ်ထံတၫ်တဆီ တၫ်သမံသမိးအီၤအပူၤ အိၣ်ဟဲလၢဃိၣ်သၢဖျၢၣ်တဆီအဂ့ၫ်,၀ံၤအလီၫ်ခံဒိးထီၣ်ချံဒီးဟဲတုၤ ဆူစၣ်ခလးဘူၣ်ရံၤအဂ့ၫ်,ကလဲၤမၤတၫ်လၢ အယူးတယးဒီးဆၣ်ရးထၣ်နံၣ်အဂ့ၫ်ဒီးဒိးသန့ၤထီၣ်အသးလၢတၫ်ဒ့စၢၤ အယံၤအဘူးအဖီခိၣ်၀ံၤ နီၫ်တဂၤဘၣ်ဟ့ၣ်၀ဲ ၁၅၀၀၀-၂၀၀၀၀ဘးအဂ့ၫ် တဲဖျါ၀ဲန့ၣ်လီၤ.
ပှၤဘၣ်မူဘၣ်ဒါတဖၣ်န့ၣ် အ၀ဲသ့ၣ်ဟဲနုာ်လီၤလၢတဖိးသဲးစး,တၫ်အိၣ်ဆိးတဖၣ်အဂီၫ် ကအိးထီၣ်တၫ်မူးတၫ်ရၤအဂီၫ် ရဲၣ်ကျဲၤ၀ဲအဂ့ၫ်,ပှၤကီၫ်ကၠီၣ်တဲၣ်ဖိ(၂)ဂၤလၢဟဲကိအ၀ဲသ့ၣ်စ့ၫ်ကီး တၫ်အိးထီၣ်ဃာ်တၫ်မူးတၫ်ရၤအဂ့ၫ်န့ၣ်လီၤ.
ဒ်န့ၣ်အသိး ပှၤဘၣ်မူဘၣ်ဒါတဖၣ်အတၫ်သမံသမိးအပူၤ ဖဲစၣ်ခလးဘူၣ်ရံၤ,ယၣ်သံၣ်တိၤတၫ်သမံသမိးတြဲၤန့ၣ် ကီၫ်ပယီၤခီကီၫ်ပှၤမၤတၫ်ဖိလၢတဖိးသဲစး(၁၄)ဂၤတၫ်ဖီၣ်န့ၫ်ကဒီး၀ဲလီၤ.
သုးဟံးန့ၣ်ထံကီၫ်တၫ်စိတၫ်ကမီၤ၀ံၤအလီၫ်ခံ ကီၫ်ပယီၤထံရူၫ်ကီၫ်သဲးဒီးမုာ်ကျိၤ၀ဲၤကွာ်တၫ်အိၣ်သး လီၤမုၫ်လီၤပှီၫ်ထီၣ် အဃိ ပှၤကီၫ်ပယီၤဖိတဖၣ် ဟဲနုာ်လီၤဆူကီၫ်ကၠီၣ်တဲၣ်ပူၤလၢတဖိးသဲးအကျဲအါထီၣ်၀ဲန့ၣ်လီၤ.
လၢတနွံအံၤအပူၤ အိၣ်လၢကီၫ်ပယီၤဒီး ဟဲခီနုာ်ဆူကၠီၣ်တဲၣ် ဖဲဃိၣ်သၢဖျၢၣ်-ကၣ်ခၠးနးဘူၣ်ရံၤတဆီအဃိ ကီၫ်ပယီၤခီ ကီၫ်ပှၤမၤတၫ်ဖိ ဘၣ်တၫ်ဖီၣ်န့ၫ်၀ဲ(၂၀၀)ဂၤဘျဲၣ်လံန့ၣ်လီၤ.
