လၢမိၤခံ သုးခီၣ်မံးရှၢၣ်အသုး ပညိၣ်ဒုးခးလီၤထံဖိကီၫ်ဖိကမျၢၫ်လၢကလံၤကျါအဃိ တနံၣ်အံၤအပူၤ ကမျၢၫ်ဘၣ်သံ (၆၂)ဂၤဆူအဖီခိၣ်

လါအီကူာ်(၂၅)သီ,၂၀၂၅နံၣ်, အၣ်ထူခ့ၣ်တၢ်ကစီၣ်

ကရ့ၣ်နံၣ်ကီၫ်စဲၣ်,ဖါဆီကီၫ်ဆၣ်,မိၤခံဟီၣ်က၀ီၤန့ၣ် လၢတနံၣ်အံၤ ၂၀၂၅နံၣ် တုၤလါအီကူာ်,(၈)လါအတီၫ်ပူၤ သုးခီၣ်မံးရှၢၣ်အသုး ဒုးတ့ၫ်လီၤမ့ၣ်ပိၫ်လၢကလံၤကျါ(၁၃)၀ီအဂ့ၫ် တၫ်သ့ၣ်ညါဘၣ်လၢ ကရ့ၣ်နံၣ်တၫ်ဘၢၣ်စၢၤပၢပြးကီၣ်ကး (IEC)အအိၣ်န့ၣ်လီၤ.

အ့ၣ်ယၣ်၀တံၣ်တဲတၫ်ကစီၣ်သန့ မၤနီၣ်ထၢဖှိၣ်ဃာ်တၫ်ဂ့ၫ်တၫ်ကျိၤအဖီခိၣ် သုးခီၣ်မံးရှၢၣ်န့ၣ် ပညိၣ်ဒုးခးလီၤထံဖိကီၫ် ဖိကမျၢၫ်လၢကလံၤကျါအဃိ ဖိသၣ်ဆံးပာ်ဃုာ် ကမျၢၫ်(၆၂)ဂၤဆူအဖီခိၣ် ဘၣ်သံတ့ၫ်ဒီးဘၣ်ဒိဘၣ်ထံး(၆၀)ဂၤဃၣ် ဃၣ်န့ၣ်လီၤ.

မိၤခံဟီၣ်က၀ီၤန့ၣ် သုးခီၣ်မံးရှၢၣ်ဒုးတ့ၫ်လီၤမ့ၣ်ပိၫ်အဃိ ကမျၢၫ်တၫ်သံတၫ်ပှၫ်ဘၣ်အိၣ်ထီၣ်၀ဲအဒိၣ်ကတၢၫ်ကဲထီၣ် အသးဖဲအပူၤကွံာ် လါအီကူာ်(၁၇)သီအနံၤ တၫ်ဒုးတ့ၫ်လီၤမ့ၣ်ပိၫ်အဃိန့ၣ်လီၤ.သုးခီၣ်မံးရှၢၣ်အသုးဒုးတ့ၫ်လီၤမ့ၣ်ပိၫ် ဒ်သိးအံၤအဃိ ကမျၢၫ်ဘၣ်သံ(၃၂)ဂၤဒီးဘၣ်ဒိဘၣ်ထံး၀ဲ(၅)ဂၤ၀ံၤ ဟီၣ်က၀ီတၫ်ဆါဟံၣ်စ့ၫ်ကီးဘၣ်ဟးဂီၤ၀ဲအဂ့ၫ်IEC ထုးထီၣ်ဘိးဘၣ်ရၤလီၤ၀ဲန့ၣ်လီၤ.

“ကမျၢၫ်တဖၣ်ဒု ဘၣ်စံၣ်မုၫ်ပြံပြါလီၤ.တနီၤန့ၣ် သုးလီၫ်သုးကျဲဒီးဘၣ်အိၣ်လၢတၫ်ပျံၤတၫ်ဖုးအပူၤလီၤ.တထံၣ်ဘၣ်လၢ ပှၤအိၣ်ဖှိၣ်ရိဖှိၣ်ဒ်သိးဒီးအပူၤကွံာ်လၢၤဘၣ်အဂ့ၫ်”IECနဲၣ်ရွဲၣ်သဃဲၤ(၂)ပညါခိၣ်အီၣ်တဲ၀ဲလီၤ.

တၫ်ဒုးကဲထီၣ်တအိၣ်ဘၣ်အမဲာ်ညါ သုးခီၣ်မံးရှၢၣ်အတၫ်ဒုးတ့ၫ်လီၤမ့ၣ်ပိၫ်လၢတအိၣ်ဒီးတၫ်ဂ့ၫ်ဘၣ်အံၤ တၫ်ပူၤဒီသဒၢမ့ၣ်ပိၫ်အလီၫ်အိၣ်ဘၣ်ဆၣ် ပှၤလီၫ်က၀ီၤဖိအါတက့ၫ်န့ၣ် ကလံၤကျါတၫ်ဒုးခးလီၤတၫ်သတူာ်ကလာ်တခီ ဒီသဒၢ၀ဲတန့ၫ်ဒံးဘၣ်ဒီးလၢကတီၫ်အံၤ မိၤခံပှၤလီၫ်က၀ီၤဖိတဖၣ်န့ၣ် ဘၣ်စံၣ်သုးအဂ့ၫ်တၫ်သ့ၣ်ညါဘၣ်လီၤ.

သုးခီၣ်မံးရှၢၣ်အသုးန့ၣ် လၢကတီၫ်အံၤ ခးလီၤကရ့ၣ်နံၣ်ဟီၣ်က၀ီၤလၢကလံၤကျါတကးဘၣ် သူသုးဂံၫ်ဘါအါအါဂီၫ် ဂီၫ်ဒီးဟဲထီၣ်သုးကျိၤန့ၣ်လီၤ.

ဒံၣ်စ့ဘၢၣ်လါလၢကဟဲအကတၢၫ်အနွံအပူၤ တၫ်ဃုထၢအကူာ်(၁)လၢတၫ်ကမၤ၀ဲန့ၣ် ကရ့ၣ်နံၣ်ကီၫ်စဲၣ်ပူၤ လွဲၫ်ကီၫ်ဒီးဘီၣ်လခဲကီၫ်ဆၣ်တဖၣ်ပာ်ဃုာ်ဒီး၀့ၫ်တဖၣ်၀ဲန့ၣ်အပူၤ ကမၤတၫ်ဃုအဂ့ၫ် သုးခီၣ်မံးရှၢၣ်တဲဃာ်၀ဲလီၤ.

သုးခီၣ်မံးရှၢၣ်န့ၣ် လၢကတီၫ်အံၤ ၀့ၫ်လၢတၫ်ပၢၫ်ဆၢသုးတဖၣ်ပၢဆှၢဃာ်၀ဲတကးဘၣ် လၢထံကီၫ်ဒီတဘ့ၣ်အကတီၫ် မၤဆူၣ်ထီၣ်ကလံၤကျါတၫ်ဒုးခးလီၤတၫ်တဖၣ်ဒီးအပူၤကွံာ် စးထီၣ်ဖဲ၂၀၂၃နံၣ် တုၤ ၂၀၂၅နံၣ်,လါယူၤလံ တၫ်မၤနီၣ်အဖီ ခိၣ် ပှၤဘၣ်သံ(၃,၄၀၅)အဂ့ၫ် ဒီကလုာ်ဃူဖိးပဒိၣ်(NUG) ပှၤဂ့ၫ်၀ီကိတိာ်၀ဲၤကျိၤ ထုးထီၣ်ဘိးဘၣ်ရၤလီၤ၀ဲလီၤ.

Ref: AT