လါအီကူာ်(၂၀)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ရၤမတံကီၫ်ဆၢတြဲၤပတုာ်ကွံာ်သးအဃိ ပယီၤ-ကၠီၣ်တဲၣ်ကီၫ်ဆၢတၫ်ကူၣ်လဲၫ်မၤကၤပနံာ်ပတုာ်ကွံာ်အသးဒီးသုးကီၣ် ကးအတၫ်တြီဃာ်ပနံာ်တဖၣ်အဃိ ကီၫ်ပူၤတၫ်ဆါတၫ်ပှ့ၤအပူၤစ့ၫ်ကီး ပနံာ်ကၤထီၣ်ဒီးအပှ့ၤကလံၤဒိၣ်ထီၣ်ကဲထီၣ်၀ဲ န့ၣ်လီၤ.
လါအီကူာ်(၁၈)သီနံၤ,ဂီၤအကတီၫ် သိလ့ၣ်တီၣ်ပနံာ်လၢလ့ၤလိၤလ့ၤထီၣ်ဖဲကၠီၣ်တဲၣ်-ပယီၤ တၫ်ရ့လိာ်တိၤ နီၫ်ဂံၫ်(၂)န့ၣ် လၢတၫ်ဂ့ၫ်တအိၣ်ဘၣ်အပူၤ သုးကီၣ်ကးတကပၤ ကးတံာ်ကွံာ်၀ဲတစိၤတတလီၫ်အဃိ တၫ်ကူၣ်လဲၫ်မၤကၤပနံာ်ပတုာ် ကွံာ်အသိး,သုးကီၣ်ကးတကပၤ တြီဃာ်တၫ်တီၣ်သွီနုာ်ပနံာ်အဃိ ကီၫ်ပူၤတၫ်ဆါတၫ်ပှ့ၤအပူၤ ပနံာ်ကၤထီၣ်ဒီးအပှ့ၤက လံၤတဖၣ်စ့ၫ်ကီးဒိၣ်ထီၣ်၀ဲလီၤ.
ပှၤတီၣ်သွီနုာ်ပနံာ်တၫ်မၤကစၫ်တဂၤတဲ၀ဲလၢ”ကတီၫ်ခဲအံၤဒု မ့ၫ်ဘၣ်ဃးဒီးတၫ်တီၣ်သွီနုာ်ပနံာ် ပတုာ်ကွံာ်၀ဲလီၤ.ပနံာ် လၢလီၫ်က၀ီၤဖိသူ၀ဲတဖၣ် လၢတသီ,ခံသီအတီၫ်ပူၤဒုကၤထီၣ်တအိၣ်ဒံးဘၣ်.ဘၣ်ဆၣ်တၫ်မ့ၫ်ကးတံာ်ကွံာ်တၫ်ဆၢက တီၫ်ယံာ်ဒု လၢ၀့ၫ်ရၤမတံတကပၤ ပနံာ်ကၤထီၣ်၀ဲသ့န့ၣ်လီၤ.လၢခံတခါ အခဲအံၤ တၫ်တီၣ်ဆှၢနုာ်တခီ ကးတံာ်ဃာ်၀ဲ လီၤ.ဘၣ်ဆၣ်နာ်က့ ထဲဒၣ်လီၫ်က၀ီၤဖိသူ၀ဲတခီ ကသမံသမိး၀ဲ၀ံၤကဟ့ၣ်တၫ်ပျဲအဂ့ၫ်နၫ်ဟူဘၣ်ဆၣ် အခဲအံၤဒုကး တံာ်ဃာ်၀ဲအဂ့ၫ်”န့ၣ်လီၤ.
ထံကီၫ်ခံဘ့ၣ်တၫ်ရ့လိာ်တိၤ နီၫ်ဂံၫ်(၂)အကပၤ လၢကီၫ်ကၠီၣ်တဲၣ်,မဲဆီးတကပၤ ပနံာ်သိလ့ၣ်တဖၣ်စ့ၫ်ကီး အိၣ်ကတာ် ထီတ့ၫ် လၢအနွံဃၣ်ဃၣ်လံန့ၣ်လီၤ.
တကးဘၣ် သုးကီၣ်ကးန့ၣ် တြီဃာ်ကီၫ်ချၢတၫ်တီၫ်သွီနုာ်ပနံာ်ဒီးဖီၣ်၀ဲပနံာ်လၢတဖိးသဲစးတဖၣ်အဃိ ကီၫ်ပူၤတၫ်ဆါ တၫ်ပှ့ၤအပူၤ ထံဂုၤကီၫ်ဂၤပနံာ်လၢပှၤသူ၀ဲတဖၣ် ကၤထီၣ်ဒီးအပှ့ၤကလံၤဒိၣ်ကဲထီၣ်၀ဲန့ၣ်လီၤ.
၀့ၫ်တကူၣ် ပိာ်မုၣ်တဂၤတဲ၀ဲလၢ”ယိဒယါတၫ်ဖိတၫ်လံၤခဲလၢာ် အပှ့ၤကလံၤထီၣ်လီၤ.ချါသိကမူာ်,ကသံၣ်ထူမဲ,ဆီညၣ် ကမူာ်တဖၣ်အပှ့ၤကလံၤဒိၣ်ထီၣ်လီၤ.အလီၫ်ခံ ပနံာ်တဖၣ်အံၤန့ၣ် ကကၤထီၣ်အဃိ ပှၤလူၤပှ့ၤဃာ်၀ဲန့ၣ်လီၤ.ပလဲၤပှ့ၤ ဒၢးအပှ့ၤကလံၤထီၣ်လီၤ.မ့ၫ်တလဲၤပှ့ၤဘၣ်ဒု ပနံာ်မ့ၫ်ကၤထီၣ်န့ၣ်ဘၣ်ယိၣ်၀ဲလၢကထံၣ်ဘၣ်တၫ်ကီတၫ်ခဲအဂ့ၫ်”န့ၣ်လီၤ.
လၢကတီၫ်အံၤတၫ်ဆါတၫ်ပှ့ၤအပူၤ ကၠီၣ်တဲၣ်ပနံာ်လၢပှၤသူအါတဖၣ်ဒ်အမ့ၫ် တၫ်ဆၢကမူာ်,ဆီညၣ်ကမူာ်,သိ,ခၠိၣ်သိ,ခၠါ သိကမူာ်,ခၠါသိထံ,ကသံၣ်ထူးမဲ ပနံာ်လၢပှၤသူ၀ဲတဖၣ် ကၤထီၣ်ဒီးအပှ့ၤကလံၤဒိၣ်ထီၣ်၀ဲအဂ့ၫ် တၫ်သ့ၣ်ညါဘၣ်လီၤ.
ကၠီၣ်တဲၣ်လီၫ်က၀ီၤတၫ်ကစီၣ်၀ဲၤကျိၤ The Nation Thandland အတၫ်ပာ်ဖျါအဖီခိၣ် တၫ်ကးတံာ်ကွံာ်တၫ်ကူၣ်လဲၫ် မၤကၤတိၤဒ်သိးအံၤအဃိ ပနံာ်တၫ်ယွၤလီၤပတုာ်ကွံာ်အသးဒီးထံကီၫ်(၂)ဘ့ၣ် တၫ်ကူၣ်လဲၫ်မၤကၤ အလုၫ်အပှ့ၤ ဘၣ်ဒိ ၀ဲအကကွဲၫ် ၁၃၀ သ့အဂ့ၫ် ပာ်ဖျါဃာ်၀ဲဒီးတၫ်ကကးတံာ်တိၤတၫ်ဂ့ၫ်န့ၣ် ဟ့ၣ်ဒုးသ့ၣ်ညါဆိ၀ဲ ၀့ၫ်မဲဆီးခိသွဲ၀ဲၤကျိၤဒီး ပဒိၣ်ပှၤဘၣ်မူဘၣ်ဒါတဖၣ်တအိၣ်ဘၣ်စ့ၫ်ကီးအဂ့ၫ် တၫ်သ့ၣ်ညါဘၣ်န့ၣ်လီၤ.
Ref: DVB
