လါအီကူာ်(၂၁)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၫ်စဲၣ်,၀့ၫ်ရၤမတံကလံၤထံးတကပၤ သုးခီၣ်မံးရှၢၣ်အ၀ီၫ်လ့ၫ်ဒုးယၤန့ၣ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ် (KNLA)သုးပာ်ဖှိၣ်တဖၣ် က၀ီၤကးတံာ်ဒုး၀ဲအဃိ တၫ်ဒုးဆူၣ်ထီၣ်၀ဲအဂ့ၫ် ဟီၣ်ခိၣ်လိၤတၫ်မဲာ်ညါဂ့ၫ်ခီၣ်ထံးတၫ်ကစီၣ် တဲ၀ဲန့ၣ်လီၤ.
သုးခီၣ်မံးရှၢၣ်အအီၣ်စ့ၣ်ယးသုးကျိၤန့ၣ် ဒ်သိးကထီၣ်မၤန့ၫ်ပၢဆှၢကဒါက့ၤအ့ရှၢၣ်ကျဲမုၫ်ဒိၣ်ဒီး၀ီၫ်လ့ၫ်ဒုးယၤသုတလီၤ အဂီၫ် ဒ်သိးမၤပှဲၤဂံၫ်ဘါကန့ၫ်အဂီၫ် ဂဲၤလိာ်တိဖျိ၀ဲ ကီးတရံး-ရၤမတံ(အ့ရှၢၣ်ကျဲ)ဒီးကီးတရံးကျဲလီၫ်လံၤတကပၤ အဃိ တၫ်ဒုးဆူၣ်၀ဲဒီးKNLAသုးပာ်ဖှိၣ်တဖၣ်န့ၣ်လီၤ.
၀ီၫ်လ့ၫ်ဒုးယၤ ဘၣ်တၫ်ဒုးအီၤအဃိ သုးခီၣ်မံးရှၢၣ်အသုးတကပၤ တၫ်သံတၫ်ပှၫ်တၫ်ဘၣ်ဒိဘၣ်ထံးအိၣ်၀ဲအဂ့ၫ် ကညီတၫ်မဲာ်ညါဂ့ၫ်ခီၣ်ထံးတၫ်ကစီၣ်တဲ၀ဲလီၤ.
“ခးလိာ်သးဒုကိးမုၫ်နံၤလီၤ.နၤခးယၤခးလီၤ.မ့ၫ်အဲၣ်ဒိးတိဖျိရၤမတံန့ၣ်တလိၣ်တိဖျိညီညီဖိဘၣ်.အ၀ဲသ့ၣ်အပှၤတဖၣ် ဟဲတုၤပာ်စၢၤလံလီၤ.ရၤမတံန့ၣ် ခီဖျိ BGFတၫ်မၤစၢၤအဃိကျိချံဂံၫ်ဘါတုၤဃာ်လံ.မ့ၫ်ခီ၀ီၫ်လ့ၫ်န့ၣ် သိထးကွ့းတဖၣ် ကမၤ၀ဲဒ်လဲၣ်.ဖးယံၤလီၤ.ဂံၫ်ဘါဒု မ့ၫ်ဒုးယၤဒီးအိၣ်၀ဲလီၤ.ပတၫ်ဒုးပျီစ့ၫ်ကီးလဲၫ်၀ဲန့ၣ်လီၤ.လၢ၀ီၫ်လ့ၫ်န့ၣ် အ၀ဲသ့ၣ်သ့ဒီးဘၣ်ဒိဘၣ်ထံးအိၣ်၀ဲန့ၣ်လီၤ.အ၀ဲသ့ၣ်န့ၣ်အိၣ်ကးတံာ်အသးလံ.ဟးထီၣ်တသ့လၢၤဘၣ်.ပှၤဘၣ်ဒိဘၣ်ထံတဖၣ်တခီ ဘူးကသံလံဧါသၢၣ်” အဂ့ၫ် ကညီတၫ်မဲာ်ညါဂ့ၫ်ခီၣ်ထံးတၫ်ကစီၣ်တဲ၀ဲလီၤ.
လၢကတီၫ်အံၤ သုးခီၣ်မံးရှၢၣ်န့ၣ် ဆှတၫ်အီၣ်ဒီးစုက၀ဲၤပီလီတဖၣ်လၢကလံၤကျါအဖၢမုၫ်ဒံးန့ၣ်လီၤ.
တၫ်ဒုးအဃိ ၀ီၫ်လ့ၫ်သ၀ီဒီးအူကရ့းထၣ်သ၀ီဖိ(၃,၀၀၀)ဂၤဘျဲၣ် ဘၣ်လဲၤဃ့ၫ်အိၣ်ကဒုဆူသူမွဲကျိ၀ၫ် ကၠီၣ်တဲၣ် တကပၤန့ၣ်လီၤ.
ပှၤလီၫ်အိၣ်ကမှံဖိလၢကစၢၤကလိပှၫ်ပူၤတဖၣ်န့ၣ် ဘၣ်ဃ့ၫ်သုးလၢတၫ်စူၤခါအကတီၫ်အဃိ ကွၫ်ဆၢၣ်မဲာ်ဘၣ်တၫ်ကီ တၫ်ခဲအဂ့ၫ် ကီၫ်ဆၢဂ့ၫ်၀ီပှၤမၤစၢၤတၫ်တဂၤတဲ၀ဲလီၤ.
“ပှၤလီၫ်အိၣ်ကမှံဖိတဖၣ်န့ၣ် မ့ၫ်လၢမူခိၣ်စူၤခါအကတီၫ်အဃိ လိၣ်ဘၣ်အိၣ်ဆိးအဂီၫ်ဒီးတၫ်ဘံၣ်တၫ်ဘၢအလီၫ်န့ၣ် လီၤ.တၫ်အီၣ်တၫ်အီဒီးတၫ်အိၣ်ဆိးအဂီၫ်ဒု မ့ၫ်ဂ့ၫ်ဂီၫ်အူတၫ်လိၣ်ဘၣ်လီၤ.ဒုးအီၣ်ထီၣ်တၫ်ဒုး၀ံၤမၤသံမၤ၀ီကမျၢၫ်တဖၣ် ဒ်သိးအံၤမ့ၫ်တပတုာ်န့ၣ် တၫ်အံၤကကဲထီၣ်အသးတပယူာ်ဃီန့ၣ်လီၤ.”
လၢကတီၫ်အံၤ ဖိသၣ်တဖၣ်,မိၫ်ဒၢတဖၣ်,သူၣ်က့သးပှၫ်တဖၣ်ဒီးပှၤလီၫ်အိၣ်ကမှံဖိတဖၣ်အတၫ်အိၣ်ဆူၣ်အိၣ်ချ့အဂီၫ် န့ၣ် KNUအဆူၣ်ချ့မၤစၢၤ၀ဲၤကျိၤ ဟံးန့ၫ်မူဒါ ကူစါညါဘျါန့ၫ်၀ဲလီၤ.
တကးဘၣ် ထံဂုၤကီၫ်ဂၤတၫ်ကရၢကရိလၢဟ့ၣ်မၤစၢၤ ပှၤဂ့ၫ်၀ီတၫ်မၤစၢၤဆီၣ်ထွဲတဖၣ်ဒီးကမျၢၫ်တၫ်ကရၢကရိတဖၣ် တကပၤ ကြၢးပတုာ်ကွံာ်တၫ်ပာ်ဖှိၣ်မၤသကိးတၫ်ဒီးသုးခီၣ်မံးရှၢၣ်၀ံၤ ကပာ်ဖှိၣ်မၤသကိးဘၣ်တၫ်ဒီး ကညီဒီကလုာ်စၢ ဖှိၣ်ကရၢ (KNU)လၢဟ့ၣ်ဆီၣ်ထွဲမၤစၢၤ ကီၫ်သူလ့ၤ ပှၤတ၀ၢတၫ်မၤစၢၤတဖၣ်အဂီၫ် တဲဆီၣ်တခူထီၣ်၀ဲလီၤ.
