လါအီကူာ်(၁၉)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
လၢကီၫ်အံၣ်စရ့အပူၤ ဖဲလါအီကူာ်(၁၇)သီအနံၤန့ၣ် တၫ်ပာ်ဖျါထီၣ်တၫ်ဘၣ်သးကဲထီၣ်၀ဲဒိၣ်ဒိၣ်မုာ်မုာ်ဒီးထံဖိကီၫ်ဖိက မျၢၫ်လၢအကလီၫ် ဟးထီၣ်လၢကျဲမုၫ်ခိၣ်ဒီး တဲဆီၣ်တခူထီၣ်၀ဲလၢ အံၣ်စရ့ပဒိၣ်တကပၤ ပှၤလၢဘၣ်တၫ်ဖီၣ်ဃာ်ခဲလၢာ်ကပူၤဖျဲးထီၣ်အဂီၫ် ပၣ်လဲးစတဲအံၣ်စလၣ်မံးတၫ်ပၢၫ်ဆၢကရၢ(ဟါမးစ်)ဒီးကၣ်စၣ်ကါမၠီၣ်ဟီၣ်က၀ီၤ တၫ်ပတုာ် တၫ်ခးတၫ်အၢၣ်လီၤတဖၣ် တၫ်ကဒိးန့ၫ်ဘၣ်လၢအဆိအချ့အဂီၫ်န့ၣ်လီၤ.
ကီၫ်အံၣ်စရ့တၫ်ခၢၣ်သး၀့ၫ် Tel Avivအပူၤ ပှၤလၢအကလီၫ် ဟဲရိဖှိၣ်အသးဖဲအံၣ်စရ့တၫ်ဒီသဒၢကိတိာ်၀ဲၤကျိၤ တၫ်သူၣ်ထီၣ်ဒီးအကပိာ်ကပၤကျဲတဖၣ်အပူၤန့ၣ်လီၤ.ကမျၢၫ်လၢပာ်ဖျါထီၣ်သးတဖၣ် ကိးသတြီထီၣ်၀ဲလၢ”ပတုာ်ကွံာ် တၫ်ဒုး,ပျဲက့ၤအ၀ဲသ့ၣ်ဆူဟံၣ်တဘျီဃီ”န့ၣ်လီၤ.
လၢကီၫ်အံၣ်စရ့ တၫ်လီၫ်အါတက့ၫ်တပူၤ ကမျၢၫ်တဖၣ်စ့ၫ်ကီး ဖဲတၫ်ပာ်ဖျါထီၣ်တၫ်ဘၣ်သးအနံၤန့ၣ် လၢတၫ်သူၣ်ဆူၣ်သးဂဲၤအပူၤ ပာ်ဃုာ်သကိး၀ဲလီၤ.ပှၤပာ်ဖျါထီၣ်တၫ်ဘၣ်သးတဖၣ်န့ၣ် အံၣ်စရ့တၫ်ခၢၣ်သးဟီၣ်က၀ီၤပူၤ ကျဲမုၫ်လၢအရ့ ဒိၣ်တနီၤ ကးတံာ်ကွံာ်၀ဲခံကပၤလၢာ်ဒီးဒွဲၣ်အူထီၣ်တၫ်လၢကျဲမုၫ်ခိၣ်အဃိ ပၢၤကီၫ်ဖီၣ်ဃာ်ပှၤပာ်ဖျါထီၣ်တၫ်ဘၣ်သး အိၣ်အါမးန့ၣ်လီၤ.
တၫ်ဟူးတၫ်ဂဲၤ၀ဲအံၤန့ၣ် မ့ၫ်ကရၢခၢၣ်စးလၢဟံၣ်ဖိဃီဖိလၢဘၣ်တၫ်ဖီၣ်ဃာ်တဖၣ် ရဲၣ်ကျဲၤ၀ဲအဂ့ၫ် အံၣ်စရ့ Haaretz တၫ်ကစီၣ်ပာ်ဖျါ၀ဲအဖီခိၣ်တၫ်သ့ၣ်ညါဘၣ်လီၤ.”တနံၤအံၤတၫ်ပာ်ဖျါထီၣ်တၫ်ဘၣ်သးန့ၣ် မ့ၫ်ဒၣ်တၫ်အခီၣ်ထံးဖိဒံးလီၤ. ထံဖိကီၫ်ဖိကမျၢၫ်အတၫ်ဆီၣ်ထွဲန့ၣ် မ့ၫ်တၫ်ဂံၫ်တၫ်ဘါလၢပဂီၫ်လီၤ.စးထီၣ်အခဲအံၤကမၤဆူၣ် ထီၣ်”တၫ်ဒုး”အဂီၫ်ရဲၣ် ကျဲၤဃာ်၀ဲလီၤ.တုၤလၢပှၤဘၣ်တၫ်ဖီၣ်ခဲလၢာ်က့ၤဘၣ်ဆူဟံၣ်တစုလီၤ.ပ၀ဲတဖၣ်န့ၣ် တၫ်ဃုထၢအဂၤတအိၣ်ဘၣ်”ဒ် ဟံၣ်ဖိဃီဖိလၢဘၣ်တၫ်ဖီၣ်အသိး ရၣ်ဘံၣ်မံၣ်လၣ် တဲ၀ဲဖဲတၫ်ဟူးတၫ်ဂဲၤအမုၫ်နံၤန့ၣ်လီၤ.
အံၣ်စရ့ကိတိာ်ခိၣ်ကျၢၫ် န့ၣ်တၣ်ယၣ်ဟူတခီ အသးအိၣ်လၢကတၢၣ်ပီၣ်တဲသကိးတၫ်တတီၤဒီးဟါမးစ်အိၣ် ၀ဲအဂ့ၫ်, အ၀ဲဒီးကၣ်စၣ်ကါမၠီၣ်ဟီၣ်က၀ီၤအပူၤ တၫ်ပတုာ်တၫ်ခးကန့ၫ်အဂီၫ်”ပှၤလၢဘၣ်တၫ်ဖီၣ်ဃာ်တနီၤတၫ်ကပျၫ်ကွံာ် တၫ် အၢၣ်လီၤ”န့ၣ် “ကဖၢနုာ်ဆိကမိၣ်၀ဲအဂီၫ် ရဲၣ်ကျဲၤဃာ်၀ဲအဂ့ၫ်”အံၣ်စရ့မံၣ်ဒံၣ်ယၣ်န့ၣ် ဖဲလါအီကူာ်(၁၇)သီနံၤ အံၣ်စရ့ပ တီၫ်ထီခိၣ်နၫ်တဂၤတဲ၀ဲအဖီခိၣ် ပာ်ဖျါ၀ဲလီၤ.
၂၀၂၃နံၣ်,လါအီးကထိဘၢၣ်(၇)သီအနံၤ ဟါမးစ်န့ၣ် ကၣ်စၣ်ကၣ်မၠီၣ်ဟီၣ်က၀ီၤတုၤအံၣ်စရ့တၫ်ပၢဟီၣ်က၀ီၤအပူၤ သုး တကပၤဒီးကမျၢၫ် တၫ်ပနီၣ်လီၫ်တဖၣ် နုာ်လီၤဒုး၀ဲသတူာ်ကလာ်အဃိ ပှၤဘၣ်သံ ၁,၂၀၀ဂၤဃၣ်ဃၣ်ဒီးပှၤ၂၅၀ဂၤ ဃၣ်ဃၣ် ဟါမးစ်,ပၣ်လဲးစတဲပှၤဖီၣ်စုက၀ဲၤကရၢတဖၣ် က့ၤဖီၣ်ကိး၀ဲဆူ ကၣ်စၣ်ကါမၠီၣ်ဟီၣ်က၀ီၤန့ၣ်လီၤ.
အလီၫ်ခံ အံၣ်စရ့တကပၤစ့ၫ်ကီး စးထီၣ်မၤ၀ဲဒုးယၤတၫ်ရဲၣ်တၫ်ကျဲၤဖးဒိၣ်လၢကၣ်စၣ်ဟီၣ်က၀ီၤပူၤန့ၣ်လီၤ.၂၀၂၃နံၣ်, လါအီးကထိဘၢၣ် တဘျီအံၤ ပၣ်လဲးစတဲ-အံၣ်စရ့တၫ်သဘံၣ်သဘုၣ်န့ၣ် စးထီၣ်လၢကဲထီၣ်အသး အံၣ်စရ့အတၫ်မၤ ၀ဲသုးတၫ်ဟူးတၫ်ဂဲၤလၢကၣ်စၣ်အဃိ ပှၤပၣ်လဲးစတဲဖိ ၆၀,၀၀၀ဂၤဘျဲၣ် ဘၣ်သံတ့ၫ်၀ဲအဂ့ၫ် ကၣ်စၣ်ကါမၠီၣ်ဟီၣ်က ၀ီၤ ဆူၣ်ချ့ဂ့ၫ်၀ီကိတိာ်၀ဲၤကျိၤအတၫ်ပာ်ဖျ်အဖီခိၣ် တၫ်သ့ၣ်ညါဘၣ်လီၤ.
