လါယူၤလံ(၃၀)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကီၫ်ပယီၤပူၤ ကီၫ်ခီဒီးကီၫ်စဲၣ်(၅)ခါအပူၤ ကီၫ်ဆၣ်အါတက့ၫ် လၢကတီၫ် ထံဒိၣ်နိယွၤအဃိ ကမျၢၫ်ဘၣ်သံဘၣ်ပှၫ်ဒီး ဟံၣ်ဃီတၫ်သူၣ်ထီၣ်ဟးဂီၤ၀ဲအိၣ်န့ၣ်လီၤ.
လၢကတီၫ်အံၤ ကီၫ်ခီဒီးကီၫ်စဲၣ်တဖၣ်လၢကွၫ်ဆၢၣ်မဲာ်ဘၣ်ထံဒိၣ်နိယွၤအကျါတခါလၢအမ့ၫ် ယိၤဒိၣ်ကီၫ်စဲၣ်ကလံၤထံး, လၢပ့တယးကီၫ်ဆၣ်အပူၤ ကစၢၫ်ထံအဃိ ကိစီသ၀ီဒီတဖျၢၣ် ထံလုၫ်ဘၢကွံာ်အသိး,လီၫ်က၀ီၤကမျၢၣ်(၈)ဂၤ လီၤထွံသံလၢထံအဂ့ၫ် ပှၤလီၫ်က၀ီၤဖိတဖၣ်တဲ၀ဲလီၤ.
ယိၤဒိၣ်ကီၫ်စဲၣ်,၀တၣ်ခၠံၣ်လ့းကီၫ်ဆၣ်ဒီးကလီကီၫ်ဆၣ်တဖၣ်အပူၤ အပူၤကွံာ်စးထီၣ်ဖဲလါယူၤလံ(၂၇)သီန့ၣ် ကွၫ်ဆၢၣ်မဲာ်ဘၣ်ထံဒိၣ်နိယွၤဒီးကမျၢၫ်လၢအကထိဂၤ ဘၣ်ကွၫ်ဆၢၣ်မဲာ်ဘၣ်တၫ်ဂ့ၫ်ကီလၢတၫ်အိၣ်ဆိးအီၣ်အီအဂီၫ်န့ၣ်လီၤ.
ကညီကီၫ်စဲၣ်ပူၤတခီ သူမွဲထံကျိထံဒီးဃိၣ်လိာ်ထံကျိထံန့ၣ် အိၣ်လၢထံတၫ်ဘၣ်ယိၣ်တၫ်ပာ်ပနီၣ်အဖီခိၣ်ဒီး ဖၣ်အၣ်ဒီးရၤမတံကီၫ်ဆၣ်တဖၣ်အပူၤ တၫ်လီၫ်လီၤဖုၣ်တဖၣ် ထံဒိၣ်၀ဲအိၣ်န့ၣ်လီၤ.
ရၢၫ်ခၢၣ်ကီၫ်စဲၣ်ပူၤ မၠီးအူဒီးမ့ပၠါကီၫ်ဆၣ်တဖၣ်အပူၤ ဒူသ၀ီခဲလၢာ်ပာ်ဖှိၣ်(၂၀)ဘျဲၣ် လၢကတီၫ်အံၤကွၫ်ဆၢၣ်မဲာ်ဘၣ်ထံ ဒိၣ်နိယွၤ၀ံၤ ကမျၢၫ်လၢအကထိဂၤ ကွၫ်ဆၢၣ်မဲာ်ဘၣ်တၫ်ဂ့ၫ်ကီလၢတၫ်အိၣ်ဆိးအီၣ်အီအဂီၫ်အဂ့ၫ် ပှၤလီၫ်က၀ီၤဖိတဖၣ် တဲ၀ဲလီၤ.
ဒ်န့ၣ်အသိး ရၢၫ်ခၢၣ်ကီၫ်စဲၣ်ပူၤ တီၣ်ကိး,မၠီးအူ,မ့ပၠါ,ကၠီးတီၣ်,ပိၣ်နါကၠိ,ယသ့းတီၣ်,ဘူသံတီၣ်ဒီးမီတီကီၫ်ဆၣ်တဖၣ် အပူၤ အပူၤကွံာ်လါယူၤအလၢာ် ထံဒိၣ်နိယွၤကဲထီၣ်တဘျီဒီးသ၀ီ(၉၀)ဖျၢၣ် တူၫ်ဘၣ်ထံဒိၣ်နိယွၤဒီးပှၤ ၁၂,၀၀၀ဂၤ အဂီၫ် လိၣ်ဘၣ်ဂ့ၫ်ဂီၫ်အူတၫ်မၤစၢၤတဖၣ်အဂ့ၫ် ဟီၣ်ခိၣ်ဖိတၫ်ဒိသူၣ်ဒိသးဒီတၫ်ဂုၤထီၣ်ပသီထီၣ်တၫ်ပာ်ဖှိၣ်မၤသကိး ၀ဲၤဒၢး(HDCO) ထုးထီၣ်ပာ်ဖျါတ့ၫ်၀ဲဖဲယူၤလံ(၂၂)သီအနံၤန့ၣ်လီၤ.
ကီၫ်ပယီၤပူၤ ယိၤဒိၣ်ကီၫ်စဲၣ်,ကညီကီၫ်စဲၣ်,ရၢၫ်ခၢၣ်ကီၣ်စဲၣ်,တလၢၤကီၫ်စဲၣ်ဒီးပကိကီၫ်ခီဟီၣ်က၀ီၤ ကီၫ်ဆၣ်တဖၣ် အပူၤ ထံဒိၣ်နိယွၤအိၣ်ထီၣ်၀ံၤပှၤလၢအိၣ်လၢထံကျိကၢၫ်နံၤဒီးတၫ်လီၫ်လီၤဖုၣ်အလီၫ်တဖၣ် ကသုးဘၣ်အသးဆူ တၫ်ပူၤဖျဲးအလီၫ်အဂီၫ် မူခိၣ်ကလံၤသီၣ်ဂီၤ၀ဲၤကျိၤ ဟ့ၣ်ပလီၫ်ဃာ်၀ဲန့ၣ်လီၤ.
Ref: Burma VJ
