လါယူၤလံ(၂၁)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တနီသရံၣ်ကီၢ်ခီ, ကီးသီကီၢ်ဆၣ်အပူၤ ခီဖျိမူခိၣ်စူၤဒိၣ်ဒီးကလံၤအူတၢ်အဃိ သ့ၣ်ထူၣ်တဖၣ်လီၤတကူၢ်၀ံၤ ဟံၣ်ဃီဒီးကျဲမ့ၣ်အူတၢၣ်တဖၣ် ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်လၢ ကီးသီလီၢ်က၀ီၤဖိတဖၣ်အအိၣ်န့ၣ်လီၤ.
မူခိၣ်စူၤဒိၣ်ဒီးကလံၤအူတၢ်အဃိ လါယူၤလံ(၁၉)ဒီး(၂၀)သီအနံၤန့ၣ် ကီးသီ၀့ၢ်, အ့ယ့းည့ၣ်, အန၀ၣ်, ရွ့ၣ်စ့ၣ်ယီၢ်ဒီး အ့မၠးကၣ်သၣ်က၀ီၤဒ့တဖၣ်အပူၤ တၢ်ဟးဂုၤဟးဂီၤတဖၣ်အိၣ်ထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“မူခိၣ်စူၤဒီးကလံၤအူတၢ်န့ၣ် ဟဲကဲထီၣ်သးသတူၢ်ကလၥ်လီၤ. ဟံၣ်ခိၣ်အဒုးတဖၣ် ဖျိးကွံၥ်၀ဲလီၤ. ကလံၤဖိအူတၢ်တကတီၢ်ဃီ သတူၢ်ကလၥ်အပူၤ ကလံၤအူတၢ်ဆူၣ်ထီၣ်ဒီးမူခိၣ်စူၤတၢ်ဒီး ဆူၣ်ဒိၣ်မးန့ၣ်လီၤ. ကလံၤအူတၢ်အဃိ ဟံၣ်လီၤပှီၢ်ကွံၥ်တစှၤဖျၢၣ်ဘၣ်. ပှၤကညီတၢ်ဘၣ်ဒိဘၣ်ထံးတခီ တၢ်တသ့ၣ်ညါဘၣ်ဒံးဘၣ်.” အဂ့ၢ် လီၢ်က၀ီၤကမျၢၢ်ပိၥ်မုၣ်တဂၤ စံး၀ဲန့ၣ်လီၤ.
မူခိၣ်စူၤဒီးကလံၤမုၢ်လီၤတၢ်သ့အဂ့ၢ်န့ၣ် မူခိၣ်ကလံၤသီၣ်ဂီၤဒုးသ့ၣ်ညါဃၥ်၀ဲတအိၣ်နီတမံၤဘၣ်ဆၣ် လီၢ်က၀ီၤပူၤကမျၢၢ်တဖၣ် ဒုးသ့ၣ်ညါလိၥ်သးကဒဲကဒဲအဂ့ၢ် စံး၀ဲန့ၣ်လီၤ.
ဟံၣ်ဃီတၢ်ဟးဂုၤဟးဂီၤတၢ်အိၣ်သးတဖၣ်ဒီး တၢ်ဟးဂုၤဟးဂီၤတဖၣ်အပူၤ ပှၤလၢဘၣ်ဒိဘၣ်ထံးတၢ်အိၣ်သးတဖၣ်တခီ တၢ်တသ့ၣ်ညါဘၣ်ဒံး တၢ်ဂ့ၢ်တၢ်ကျိၤလီၤတံၢ်လီၤဆဲးဒံးဘၣ်အဂ့ၢ် စံး၀ဲန့ၣ်လီၤ.
တကးဘၣ် ဘိးပၠ့ကီၢ်ဆၣ်ပီၢ်လဲၣ်အပူၤအိၣ် အလဲၢ်မၣ်ကီးပူၤစ့ၢ်ကီး ခီဖျိမူခိၣ်စူၤဒိၣ်ဒီးကလံၤအူတၢ်အဃိ တၢ်ဘၣ်ဒိဘၣ်ထံးတဖၣ်အိၣ်ထီၣ်၀ဲအဂ့ၢ် စံး၀ဲန့ၣ်လီၤ.
လါယူၤလံ(၂၁)သီတုၤ(၂၆)သီအတီၢ်ပူၤ တနီသရံၣ်ပၣ်ဃုၥ် ကီၢ်ခီဒီး ကီၢ်ပယီၤအပူၤ ကီၢ်စဲၣ်ဒီးကီၢ်ခီတဖၣ်အပူၤ မူခိၣ်စူၤဒိၣ်ဒီးကလံၤအူတၢ်ဆူၣ်သ့ ပူၤတီၤပူၤတီၤအဂ့ၢ်, တၢ်ကိၢ်အသဟီၣ်ကလံၤမုၢ် ၀ံၣ်ဖၣ်(WIPHA) န့ၣ် အိၣ်ဖဲကလံၤထံးတရူးပီၢ်လဲၢ်ဒီး ကဟဲခီ၀ဲဒၣ်ဆူ ကီၢ်ဘံၣ်ယဲးနၣ်ကလံၤစိးဟီၣ်က၀ီၤတဖၣ်အပူၤသ့ဒီး ကလံၤမုၢ်လၢအိၣ်တ့ၢ်ဒ်တၢ်အၢၣ်တဖၣ်န့ၣ် ဟဲတုၤအိၣ်ဆူ ကီၢ်ပယီၤသ့အဂ့ၢ် သုးကီၣ်ကးမူခိၣ်ကလံၤသီၣ်ဂီၤစ့ၢ်ကီး ဟ့ၣ်ပလီၢ်ဃၥ်၀ဲန့ၣ်လီၤ.
Ref: CB
