ခီဖျိသုးကီၣ်ကးကျိဖးဒိၣ်အဃိ ကမျၢၢ်လၢအိၣ်ဖဲ ဖဲၣ်ခိၣ်မုၢ်ထီၣ်တပၤ ဘၣ်သံ၀ဲ(၅)ဂၤ

လါယူၤလံ(၂၁)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်

သုးကီၣ်ကးအသုး ခးတပျူၤတပျီၤကျိဖးဒိၣ်တဖၣ် ဆူယိၤဒိၣ်ကီၢ်စဲၣ်ဒီးကရ့ၣ်နံၣ်ကီၢ်စဲၣ်အဆၢ ဖဲၣ်ခိၣ်မုၢ်ထီၣ်တပၤဒူသ၀ီတဖၣ်ပူၤအဃိ ကမျၢၢ်(၅)ဂၤသံ၀ဲ၀ံၤ ဘၣ်ဒိ၀ဲ(၇)ဂၤအဂ့ၢ် ကရ့ၣ်နံၣ်ဒီကလုၥ်တၢ်ဒီသဒၢသုး(KNDF) ထုးထီၣ်ပၥ်ဖျါဃၥ်၀ဲဖဲ လါယူၤလံ(၁၉)သီအနံၤန့ၣ်လီၤ.

လါယူၤလံ(၁၈)သီအနံၤ, မုၢ်ထူၣ်(၁၂)နၣ်ရံၣ်ဃၣ်ဃၣ်အဆၢကတီၢ် သုးကီၣ်ကးအမျိၥ်သုးလၢအိၣ်ဆီလီၤဃၥ်သးဖဲ ၀့ၢ်လွဲၢ်ကီၢ်, လွဲၢ်လ့ၣ်လ့၀့ၢ်ဒီး၀့ၢ်မိပၠဲတဖၣ် ခးလီၤ၀ဲကျိဖးဒိၣ်တဖၣ်တပယူၥ်ဃီအဃိ ဒူသ၀ီ(၂)ဖျၢၣ်အပူၤ ပိၥ်မုၣ်(၂)ဂၤ, ပိၥ်ခွါ(၃)ဂၤဘၣ်သံ၀ဲ၀ံၤ ဘၣ်ဒိ၀ဲ(၇)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.

“သုးကီၣ်ကးခးလီၤကျိဖးဒိၣ်တဖၣ်ဆူ ဖဲၣ်ခိၣ်မုၢ်ထီၣ်တပၤအဃိ ကမျၢၢ်သံဒီးဘၣ်ဒိတဖၣ်အိၣ်ထီၣ်၀ဲလီၤ. ပှၤသံတဖၣ်န့ၣ် ပှၤလၢအိၣ်ဖဲဖဲၣ်ခိၣ်မုၢ်ထီၣ်တပၤဒီးဟဲဃီၤဆူ တၢ်ပၢၢ်ဆၢသုးတဖၣ်ပၢဆှၢဟီၣ်က၀ီၤတန့ၢ်တဖၣ်လီၤ. ပှၤလၢအိၣ်ကးတံၥ်သးတဖၣ်မီၤ.သုးကီၣ်ကးပၢဆှၢက့ၤမိပၠဲ,လွဲၢ်ကီၢ်ကျဲမုၢ်ခိၣ်၀ံၤအလီၢ်ခံကမျၢၢ်လၢတဟဲခီဘၣ်ဒံးဆူမုၢ်နုၥ်တဖၣ်အိၣ်၀ဲအဂ့ၢ်” (KNDF)တၢ်ကစီၣ်ဒီးတၢ်ဘိးဘၣ်ရၤလီၤမူဒါခိၣ် တၢ်အဲၣ်စိစံး၀ဲန့ၣ်လီၤ.

တၢ်ဒုးတဖၣ်ကဲထီၣ်သးလၢ ဖဲၣ်ခိၣ်မုၢ်ထီၣ်တပၤတအိၣ်၀ဲဘၣ်ဆၣ် ခီဖျိသုးကီၣ်ကးအသုး ခးလီၤကျိဖးဒိၣ်တဖၣ်တပယူၥ်ဃီအဃိ ကမျၢၢ်သံဒီးဘၣ်ဒိဘၣ်ထံးတဖၣ်အိၣ်ထီၣ်၀ဲတကးဘၣ် ဒူသ၀ီတဖၣ်အပူၤ ဟံၣ်ဃီတဖၣ်ဒီးတၢ်ဘူၣ်တၢ်ဘါတၢ်သူၣ်ထီၣ်တနီၤစ့ၢ်ကီး ဘၣ်ဟးဂီၤကွံၥ်၀ဲန့ၣ်လီၤ.

ပှၤလၢမၤစၢၤပှၤစံၣ်သုးပှၤလီၢ်အိၣ်ကမှံဖိတဖၣ် မၤပူၤဖျဲးထီၣ်န့ၢ်၀ဲကမျၢၢ်လၢအိၣ်ဖဲဖဲၣ်ခိၣ်မုၢ်ထီၣ်တပၤတဖၣ်ဘၣ်ဆၣ် ဖဲလါယူၤလံ(၁၀)သီအနံၤန့ၣ် သုးကီၣ်ကးအသုး ပၢဆှၢက့ၤ၀ဲ တၢ်မၤပူၤဖျဲးထီၣ်ကျဲအဃိ တၢ်မၤပူၤဖျဲးထီၣ် ကမျၢၢ်ဖိတဖၣ်တန့ၢ်လၢၤဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.

“ပှၤလၢသံဒီးဘၣ်ဒိဘၣ်ထံးတဖၣ်အိၣ်၀ဲလီၤ.ပှၤလၢအိၣ်တ့ၢ်တဖၣ်န့ၣ်ပှၤတနီၤလၢတဃ့ၢ်ပူၤဖျဲးသူတဖၣ်ဒီးအိၣ်ကးတံၥ်သးတဖၣ်လီၤ. ပတဲသ့လၢ အိၣ်ကးတံၥ်သးတဖၣ်မီၤ. ကျိဖးဒိၣ်န့ၣ် ခးလီၤ၀ဲတပယူၥ်ဃီဒီး ခးလီၤ၀ဲဒၣ်ဖဲ ဖဲၣ်ခိၣ်ဒီးလွဲၢ်ကီၢ်”အဂ့ၢ် ပှၤလၢသ့ၣ်ညါတၢ်အိၣ်သးအံၤတဂၤ စံး၀ဲန့ၣ်လီၤ.

သုးကီၣ်ကးအသုးဒီး တၢ်ပၢၢ်ဆၢဂံၢ်ဘါကရူၢ်တဖၣ်အဘၢၣ်စၢၤ တၢ်ဘၣ်သဂၢၢ်ခးလိၥ်သးတဖၣ် အိၣ်ထီၣ်၀ဲဒၣ်ဖဲ လွဲၢ်ကီၢ်-ကိသၣ်-မိပၠဲကျဲမုၢ်ဒီတကျိၤဒီး သုးကီၣ်ကးအသုးန့ၣ် ပညိၣ်ဒုးကမျၢၢ်လိၤလိၤ လၢခးကျိဖးဒိၣ်, ဟဲဒုးခးလီၤတၢ်လၢကလံၤကျါတဖၣ် တပယူၥ်ဃီအဃိ တၢ်ကလ့ၤလိၤဟးထီၣ်ဘၣ်လၢ တၢ်ပလီၢ်ပဒီအပူၤအဂ့ၢ် ဟ့ၣ်ပလီၢ်ဃၥ်၀ဲန့ၣ်လီၤ.

Ref: DVB