လါယူၤလံ(၁၀)သီ,၂၀၂၅နံၣ်
ပကိကီၢ်ခီ, တီအူ၀့ၢ်အိၣ်သူၣ်လီၤ သုးကီၣ်ကးအသုးနီၣ်ဂံၢ်(၃၉)ခီၣ်သုးရ့ၣ်(ခလရ)အံၤ တၢ်လဲၤဒုးအီၤလၢ(၁၀၇-မမ)မျိၥ်အဃိ လီၢ်လၤအိၣ်(၂)ဂၤပၣ်ဃုၥ်(၅)ဂၤသံ၀ဲဒီး ဘၣ်ဒိ၀ဲ(၇)ဂၤအဂ့ၢ် Brave Warriors for Myanmar (BWM)ကရၢထုးထီၣ်ပၥ်ဖျါဃၥ်၀ဲဖဲလါယူၤလံ(၈)သီအနံၤန့ၣ်လီၤ.
ဖဲလါယူၤလံ(၈)သီအနံၤ, မုၢ်ထူၣ်အဆၢကတီၢ် တၢ်ပၢၢ်ဆၢသုးပၥ်ဖှိၣ်တဖၣ် လဲၤဒုး ၀့ၢ်တီအူ, (၄)မံၤလၤအိၣ် သုးကီၣ်ကး(ခလရ-၃၉)လၢ (၁၀၇-မမ)မျိၥ်(၃)ဖျၢၣ်ဒီး (၃)ဖျၢၣ်စလၢၥ်န့ၣ် လဲၤလီၤတဲၥ်ပိၢ်ဖးထီၣ်၀ဲဒၣ်ဖဲ ဒူၣ်ဒါသုးကလၢၤအပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်လဲၤဒုးတၢ်အံၤအပူၤ သုးကီၣ်ကးသုးရ့ၣ်သုးကလၢၤအပူၤအိၣ် သုးရ့ၣ်တၢ်အီၣ်တၢ်ပၥ်ကီၤအလီၢ်, စဲးဖီကဟၣ်တၢ်ပၥ်ကီၤအလီၢ်ဒီး သုးရ့ၣ်ဖိၣ်သၣ်ခွါအိၣ်တၢ်လီၢ်တဖၣ် မ့ၣ်အူအီၣ်ဟးဂီၤကွံၥ်၀ဲ၀ံၤ လီၢ်လၤအိၣ်(၂)ဂၤဒီးပတီၢ်အဂၤအိၣ်(၃)သံ၀ဲတဘျီဃီအသိး လီၢ်လၤအိၣ်(၁)ဂၤဒီးပတီၢ်အဂၤအိၣ်(၆)ဂၤ ဘၣ်ဒိ၀ဲအဂ့ၢ် တၢ်သ့ၣ်ညါဘၣ်၀ဲအဂ့ၢ် BWMစံး၀ဲန့ၣ်လီၤ.
၀့ၢ်တီအူ, (၄)မံၤလၤအိၣ်သူၣ်လီၤ သုးကီၣ်ကးနီၣ်ဂံၢ်(၃၉)ခီၣ်သုးရ့ၣ် (ခလရ-၃၉)န့ၣ် အိၣ်၀ဲလၢ သုးကီၣ်ကးကလံၤထံးကီၢ်ခီသုး၀ဲၤလီၢ်ခိၣ်သ့ၣ်(တပခ)အစုတီၤဖီလၥ်ဒီး ဟီၣ်က၀ီၤအပူၤ ကဲထီၣ်တၢ်နိးတၢ်ဘျးလၢ တၢ်ပၢၢ်ဆၢတၢ်ဟူးတၢ်ဂဲၤအဃိ KNLAသုးက့(၂), သုးရ့ၣ်(၅)အံၤ ဟီၣ်က၀ီၤပူၤ သုးဂ့ၢ်၀ီတၢ်လိၣ်ဘၣ်အဖီခိၣ် ပၥ်ဖှိၣ်ထီၣ်သးဒီးသိၣ်မှံတဖၣ်၀ံၤ လဲၤဒုးတၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
လၢတၢ်လဲၤဒုးတၢ်တဘျီအံၤ KNLAသုးက့(၂), သုးရ့ၣ်(၅)ဒီးBrave Warriors for Myanmar (BWM)တဖၣ်တီခိၣ်ရိၣ်မဲ၀ဲ၀ံၤ ပၥ်ဖှိၣ်ထီၣ်သးဒီး သိၣ်မှံသိၣ်ပၥ်ဖှိၣ်တဖၣ်ဒ်အမ့ၢ် Mountain Knights Civilian Defense Force (MKCDF)ကရၢ, Anti-Coup People’s Liberation Force (ACPLF)ကရၢတဖၣ်ဒီး လဲၤဒုးတၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ပၢၢ်ဆၢသုးပၥ်ဖှိၣ်တဖၣ် လဲၤဒုး ခလရ ၃၉သုးရ့ၣ်တသီဃီအတီၢ်ပူၤန့ၣ် တၢ်လဲၤဒုး သုးကီၣ်ကး တီအူ(က့ၣ်တူးမတံၣ်)ကလံၤသုးကလၢၤအံၤတကတီၢ်ဃီလၢ (၁၀၇)မမလၢမျိၥ်(၁၁)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
