လါယူၤလံ(၈)သီ, ၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၄), ကီၢ်ရ့ၣ်ဘျံးဒ၀ဲၢ်ဒီးကၠီၣ်တဲၣ်ကီၢ်ဆၢဟီၣ်က၀ီၤအပူၤအိၣ် သုးကီၣ်ကးသုးခးသုးကလၢၤအံၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲအဂ့ၢ် ကီၢ်ရ့ၣ်ဘျံးဒ၀ဲၢ် နဲၣ်ရွဲၣ် ပဒိၣ်စီၤအဲၣ်နၤစံး၀ဲန့ၣ်လီၤ.
ဖဲအပူၤကွံၥ် လါအ့ဖြ့ၣ်သၢနွံအတီၢ်ပူၤန့ၣ် ထီၣ်ဒုးမၤန့ၢ်ထံထၣ်သုးတၢ်တိၥ်ကျဲၤသုးကလၢၤ၀ံၤအလီၢ်ခံ ကၠီၣ်တဲၣ်-ကီၢ်ရ့ၣ်ဘျံးဒ၀ဲၢ်ကီၢ်ဆၢဒီတကျိၤအိၣ် သုးကီၣ်ကးသုးကလၢၤတဖၣ်ဒ်အမ့ၢ် ထံခံကီၢ်ဆၢသုးကလၢၤ, ဘီတံးသုးကလၢၤဒီး ငယးနံၣ်သုးကလၢၤတဖၣ်အံၤ (KNLA)ဒီးတၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲကွ့ၢ်ကွ့ၢ်န့ၣ်လီၤ.
မဟါအနံၤ လါယူၤလံ(၇)သီအနံၤစ့ၢ်ကီးန့ၣ် ထီၣ်ဒုးမၤန့ၢ်ကဒီး၀ဲ သုးခးကီၢ်ဆၢသုးကလၢၤလၢ အိၣ်ဖဲ ထံခံကီၢ်ဆၢသုးကလၢၤ ကလံၤစိးတပၤ, ကလ့အီၣ်၀့ၢ် မုၢ်ထီၣ်ဟီၣ်တပၤအဂ့ၢ် တၢ်သ့ၣ်ညါဘၣ်န့ၣ်လီၤ.
“ဒုးမၤန့ၢ်၀ဲ တနံၤညါအံၤလီၤ. တၢ်ဒုးကဲထီၣ်သးတသီလီၤ၀ံၤ စကစတဖၣ် ဃ့ၢ်ပဒ့ၣ်အသးဆူကၠီၣ်တဲၣ်တပၤန့ၣ်လီၤ.”အဂ့ၢ် ကီၢ်ရ့ၣ်ဘျံးဒ၀ဲၢ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲန့ၣ်လီၤ.
သုးခးသုးကလၢၤအံၤ မ့ၢ်သုးကလၢၤတဖျၢၣ်လၢ သုးကီၣ်ကးဆီလီၤဃၥ်အပှၤအဂံၢ်အဘါ(၃၀)ဃၣ်ဃၣ်အဂ့ၢ် တၢ်သ့ၣ်ညါဘၣ်လၢ တၢ်ပၢၢ်ဆၢသိၣ်ဒုတဖၣ် စံး၀ဲအဖီခိၣ်န့ၣ်လီၤ.
တၢ်ထီၣ်ဒုးသုးကလၢၤအပူၤခံခီခံကပၤသံဒီးတၢ်ဘၣ်ဒိဘၣ်ထံးတၢ်အိၣ်သးဒီးတၢ်မၤန့ၢ်စုက၀ဲၤကျိချံပှၥ်သၣ်တၢ်အိၣ်သးတဖၣ်တခီ တၢ်တသ့ၣ်ညါဒံး လီၤတံၢ်လီၤဆဲးဒံးဘၣ်.
“သုးကီၣ်ကးအပှၤသုးဖိလၢအိၣ်ဖဲ သုးခးသုးကလၢၤတဖၣ်စ့ၢ်ကီး အသ့ၣ်ညါဆိပၥ်လၢ တၢ်ကဟဲထီၣ်ဒုး၀ဲလီၤ. လီၤဂၥ်ဒ်သိးလၢ ကဃ့ၢ်ပဒ့ၣ်အသးအဂီၢ်အိၣ်ခိး၀ဲအသိးလီၤ”အဂ့ၢ် မုၢ်ထီၣ်ဟီၣ်က၀ီၤ လီၢ်က၀ီၤဖိတဂၤစံး၀ဲန့ၣ်လီၤ.
ခီဖျိတၢ်ထီၣ်ဒုးမၤန့ၢ်ကွံၥ် သုးခးသုးကလၢၤအံၤအဃိ ကၠီၣ်တဲၣ်-ကီၢ်ရ့ၣ်ဘျံးဒ၀ဲၢ်ကီၢ်ဆၢဒီတကျိၤအပူၤ အိၣ်တ့ၢ်ဒၣ်ထဲ နးအ့ၣ်တီၣ်သုးကလၢၤတဖျၢၣ်လီၤအဂ့ၢ် တၢ်သ့ၣ်ညါဘၣ်န့ၣ်လီၤ.
နးအ့ၣ်တီၣ်သုးကလၢၤန့ၣ် အိၣ်ဆီလီၤဃၥ်အသးဖဲ နးအ့ၣ်တီၣ်သ၀ီ(ကၠီၣ်တဲၣ်ကိး အံၣ်တီၣ်သ၀ီ)လၢ မံၤဟူသၣ်ဖျါဒ် ကၠီၣ်တဲၣ်ဒီးကီၢ်ပယီၤပှၤဟးကသုၣ်ဖိတဖၣ်အဘၢၣ်စၢၤ၀ံၤဂၥ်သ၀ံပီၤဘိလၢတၢ်တီၣ်သွီနုၥ်လီၤဆူကၠီၣ်တဲၣ်အပူၤစ့ၢ်ကီးန့ၣ် ဟဲခီဖျိအသးဖဲတၢ်လီၢ်အံၤတဆီန့ၣ်လီၤ.
KNU အစုတီၤဖီလၥ် (KNLA)ဒီးတၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်ဃၥ် သုးကီၣ်ကးသုးကလၢၤတဖၣ် ဖဲထံခံကီၢ်ဆၢပၣ်ဃုၥ် ကီၢ်ရ့ၣ်ဘျံးဒ၀ဲၢ်ကီၢ်ဆၢဒီတကျိၤဃၣ်ဃၣ်ဘၣ်ဆၣ် မ့မ့ၢ်လၢတၢ်ကူလဲၤမၤကၢ်တခီ ကတီၢ်ခဲအံၤန့ၣ် မၤတၢ်ကူလဲၢ်မၤကၤဒီးကၠီၣ်တဲၣ်တခီ တအိၣ်ထီၣ်ဒံး၀ဲအဖိးသဲစးဒံးဘၣ်.
KNU ပှၤကတီၤတၢ်ပၢ ပဒိၣ်စီၤတီနံတခီ ဒ်သိးတၢ်အိးထီၣ်ကဒါက့ၤ ထံခံကီၢ်ဆၢတၢ်ကူလဲၢ်မၤကၤတၢ်သမံသမိးတြဲၤကန့ၢ်အဂီၢ် အိၣ်ကတဲၥ်ကတီၤဃၥ်၀ဲအဂ့ၢ်န့ၣ် စံးဆၢဃၥ်၀ဲဆူ BBC တၢ်ကစီၣ်သန့အအိၣ်န့ၣ်လီၤ.
ref: the tanintharyi
