လါယူၤလံ(၈)သီ, ၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၃), ကီၢ်ရ့ၣ်ချၢၣ်လွံၢ်ထူၣ်, လၢၢ်ဒိၣ်ကီၢ်ဆၣ်အပူၤ ခီဖျိသုးကီၣ်ကးအသုး ဟဲဒုးတၢ်လၢဒြိ, ခးကျိဖးဒိၣ်တဖၣ်အဃိ တနွံအတီၢ်ပူၤ ကမျၢၢ်(၆)ဂၤဘၣ်သံ၀ဲဒီး ဘၣ်ဒိ၀ဲတစှၤန့ၢ်(၃)ဂၤဘၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲတၢ်ကစီၣ်န့ၣ်လီၤ.
ဖဲလါယူၤလံ(၅)သီအနံၤ, ဟါ(၆)နၣ်ရံၣ်ဃၣ်ဃၣ်အဆၢကတီၢ်န့ၣ် သုးကီၣ်ကးအသုးလၢအိၣ်ဖဲ မုၢ်ဃါပျီ(နးသၣ်ကွ့)အံၤ ဟဲတ့ၢ်လီၤ(၁၂၀-မမ)ကျိဖးဒိၣ်တဖျၢၣ်လၢဒြိအဃိ ဖိသၣ်(၂)ဂၤပၣ်ဃုၥ် ကမျၢၢ်(၆)ဂၤသံ၀ဲ၀ံၤ ဘၣ်ဒိ၀ဲ(၃)ဂၤအဂ့ၢ် ပၥ်ဖျါဃၥ်၀ဲန့ၣ်လီၤ.
တကးဘၣ် ဖဲလါယူၤလံ(၂)သီအနံၤ, ဂီၤအဆၢကတီၢ်စ့ၢ်ကီးန့ၣ် (ခမရ-၃၅၁)လၢအိၣ်ဖဲ ဆ့ၣ်မးတီၣ်ခးလီၤကျိဖးဒိၣ်(၂)ဖျၢၣ်အဃိ လဲၤလီၤတဲၥ်ပိၢ်ဖးထီၣ်၀ဲဒၣ် ဖဲညီၣ်ပ့ၣ်ကိသ၀ီ, မူကီၢ်ဆၣ်ပူၤအဃိ ရှါခၠီသ၀ီဖိကမျၢၢ်ပိၥ်ခွါလၢ စံၣ်သုးဒီးဟဲအိၣ်ကဒုတဂၤ ဘၣ်ဒိ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုးအံၤ ခးလီၤ၀ဲကျိဖးဒိၣ်တဖၣ် ဆူခ့ၣ်အဲၣ်ယူၣ်-ကီၢ်ရ့ၣ်ချၢၣ်လွံၢ်ထူၣ်, ကီၢ်ဆၣ်(၃)ဘ့ၣ်အပူၤအိၣ် ဒူသ၀ီတဖၣ်အပူၤကိးမုၢ်နံၤဃၣ်ဃၣ်န့ၣ်လီၤ. ခီဖျိသုးကီၣ်ကးအသုး ပညိၣ်ဒုးလီၢ်က၀ီၤကမျၢၢ်ဒ်အံၤအဃိ လီၢ်က၀ီၤကမျၢၢ် တၢ်ဘၣ်ဒိဘၣ်ထံးဒီးတၢ်သံတၢ်ပှၢ်တဖၣ်အိၣ်ထီၣ်၀ဲ ကွ့ၢ်ကွ့ၢ်လီၤအဃိ လီၢ်က၀ီၤကမျၢၢ်ဖိတဖၣ်အံၤ ဘၣ်အိၣ်၀ဲဒၣ်လၢ တၢ်ဘၣ်ယိၣ်ဘၣ်ဘှီအပူၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးတၢ်ကစီၣ်အပူၤ ပၥ်ဖျါဃၥ်၀ဲန့ၣ်လီၤ.
