လါယူၤလံ(၃)သီ, ၂၀၂၅နံၣ်
ကရ့ၣ်နံၣ်(ကယါ)ကီၫ် တၫ်ထီၣ်ဒုး၀့ၫ်မိပၠဲတၫ်ဒုးအပူၤ Free Burma Ranger(FBR)သုးဖိအကသံၣ်သရၣ်လၢအမ့ၫ် ရ့ကၠါ Benedict Thoန့ၣ် ကျိဖးဒိၣ်ဘၣ်အီၤဒီးသံ၀ဲအဂ့ၫ် ဖဲလါယူၤ(၂)သီအနံၤန့ၣ် အ၀ဲသ့ၣ်အကရၢ ထုးထီၣ်ပာ်ဖျါ၀ဲလီၤ.
FBRကရၢန့ၣ် တၫ်ဒုးအပူၤ ဟ့ၣ်ဆီၣ်ထွဲမၤစၢၤကသံၣ်ကသီတၫ်မၤစၢၤတဖၣ်,ဒုးအိၣ်ထီၣ် တၫ်မၤနီၣ်မၤဃါတၫ်သံတၫ် ပှၫ်သုးကလၢၤ(CCP)ဒီး၀့ၫ်မိပၠဲတၫ်ဒုးအပူၤ သုးဖိလၢဘၣ်ဒိဘၣ်ထံးတဖၣ် ဖဲကူစါယါဘျါ၀ဲအကတီၫ် ရ့ကၠါ Benedict Thoန့ၣ် ကျိဖးဒိၣ်အချံလီၤတဲာ်ဘၣ်အီၤအဃိ ဘၣ်ဒိဘၣ်ထံး၀ံၤ ဖဲလါဖ့ၤဘြူၤအါရံၤ(၅)သီအနံၤန့ၣ် ဘၣ်သံ၀ဲအဂ့ၫ် တၫ်သ့ၣ်ညါဘၣ်လီၤ.
Free Burma Ranger (FBR)န့ၣ် မ့ၫ်ကရၢတဖုလၢ ကလုာ်ခဲလၢာ်ပာ်ဃုာ် လၢမၤ၀ဲပှၤတ၀ၢတၫ်ဖံးတၫ်မၤတဖၣ်န့ၣ်လီၤ.
FBRကရၢန့ၣ် ဖဲသုးကီၣ်ကးဒီးတၫ်ပၢၫ်ဆၢသုးဖိတဖၣ် တၫ်ဒုးအပူၤ ဟ့ၣ်၀ဲဂ့ၫ်ဂီၫ်အူကသံၣ်ကသီတၫ်မၤစၢၤဆူ တၫ်ပၢၫ်ဆၢသုးဖိလၢဘၣ်ဒိဘၣ်ထံးတဖၣ်ဒီးပှၤလီၫ်အိၣ်ကမှံဖိတဖၣ်န့ၣ်လီၤ.FBRကရၢန့ၣ် တၫ်သ့ၣ်ညါဘၣ်လၢ ဟူးဂဲၤဖဲကီၫ်ပယီၤပူၤ ကရ့ၣ်နံၣ်,ကညီကီၫ်စဲၣ်ဒီးကၠီၣ်တဲၣ်ကီၫ်ဆၢဟီၣ်က၀ီၤတဖၣ်အပူၤန့ၣ်လီၤ.
၂၀၂၅နံၣ်,လါမး(၁၂)သီအနံၤစ့ၫ်ကီး ကညီကီၫ်စဲၣ်-ပကိကီၫ်ခီအဆၢ,တီအူကီၫ်ရ့ၣ်,ထီတထူၣ်ကီၫ်ဆၣ်ပူၤ ဖဲကူစါယါဘျါ ဒူသ၀ီဖိလၢဘၣ်ဒိဘၣ်ထံး လၢကလံၤကျါတၫ်ခးလီၤတၫ်အဃိတဖၣ်အကတီၫ် FBR အကသံၣ်သရၣ်မုၣ် နီၫ်ဆ့မူဖီ မ့ၣ်ပိၫ်မ့ၣ်အူဘၣ်အီၤအဃိ ဘၣ်သံအဂ့ၫ် FBRဘိးဘၣ်ရၤလီၤ၀ဲလီၤ.
FBRကရၢန့ၣ် မ့ၫ်စ့ၫ်ကီးကရၢတဖုလၢဆီၣ်ထွဲမၤစၢၤ ပှၤလၢဘၣ်တၫ်ဆီၣ်ဘံၣ်ဆီၣ်ဘၢအီၤတဖၣ် လၢအိၣ်ဖဲကၣ်ဒံးစတၣ်,အံၣ်ရး,ဆံရံယါ,ပယီၤ ထံကီၫ်တဖၣ်အပူၤန့ၣ်လီၤ.
