လါယူၤလံ(၂)သီ,၂၀၂၅နံၣ်
ကီၫ်ကၠီၣ်တဲၣ်ပူၤ ပယီၤခီကီၫ်ပှၤမၤတၫ်ဖိပိာ်ခွါ(၉၀၀)ဂၤဘျဲၣ် လၢတၫ်ဖီၣ်အီၤခီဖျိတၫ်အိၣ်ဆိးတဖိးသဲစးဒီး တၫ်က့ၤဆှၢ၀ဲတဖၣ် ကကဲသုးအဂီၫ် ဘၣ်တၫ်ရိဖှိၣ်ဃာ်၀ဲအဂ့ၫ် ကီသီပှၤလီၫ်က၀ီၤဖိတဖၣ်တဲ၀ဲလီၤ.
တနံၣ်အံၤ လါယနူၤအါရံၤတုၤလါယူၤလၢ(၆)လါအတီၫ်ပူၤ ခီကီၫ်ပှၤမၤတၫ်ဖိ (၁,၀၁၅)ဂၤ လၢအိၣ်လၢယနီဃိၣ်ပူၤဒီး ဘၣ်တၫ်ဟ့ၣ်လီၤက့ၤဆူကီၫ်ပယီၤတဖၣ် ပိာ်ခွါ (၉၀၀)ဂၤဘျဲၣ်န့ၣ် တၫ်ကကဲသုးအဂီၫ် ဘၣ်တၫ်ဖီၣ်ဃာ်၀ဲအဂ့ၫ် တဲ၀ဲလီၤ.
ပိာ်ခွါလၢတၫ်ဖီၣ်ဃာ်၀ဲတဖၣ်န့ၣ် သးနံၣ်အိၣ်အကလုာ်ကလုာ်ပာ်ဃုာ်၀ံၤ တၫ်ဟ့ၣ်အီၤနံၤဖုၣ်သုးတၫ်မၤလိဒီး တၫ်ဆှၢ၀ဲဆူ တၫ်မဲာ်ညါတၫ်ဒုးပျီအဂ့ၫ် ကီးသီပှၤလီၫ်က၀ီၤဖိ လၢသ့ၣ်ညါတၫ်အိၣ်သးတဂၤတဲ၀ဲလီၤ.
“လါယူၤ(၂၅)သီနံၤန့ၣ် လၢယနီတကပၤဆှၢက့ၤ၀ဲ ပှၤ(၉၈)ဂၤလီၤ.လၢအကျါ ပိာ်ခွါ(၉၂)ဂၤ,ပိာ်မုၣ်(၆)ဂၤပာ်ဃုာ်လီၤ. ပိာ်မုၣ်တဖၣ်တခီပျဲက့ၤ၀ဲဆူအတၫ်အိၣ်ဆိးအလီၫ်လီၤ.ပိာ်ခွါ(၉၂)ဂၤလၢာ်တခီ လၢကီးသီတကပၤ မီၫ်သီခၢၣ်စးတဖၣ် ပာ်ဃုာ်(လ၀က)သမံသမိးတၫ်ဂ့ၫ်တၫ်ကျိၤလီၤ.၀ံၤအလီၫ်ခံ သုးကီၣ်ကးက့ၤကိးအ၀ဲသ့ၣ်ဆူ ခမရ-၂၆၂အပူၤလီၤ. မၤကသံၣ်တၫ်သမံသမိး(၃)ဘျီ ဖဲ(၈)မဲၣ်တၫ်ဆါမ့ၫ်၀ံၤန့ၣ် ဟ့ၣ်၀ဲနံၤဖုၣ်သုးတၫ်မၤလိတနွံဒီး ဆှၢ၀ဲဆူတၫ်မဲာ်ညါတၫ်ဒုးပျီတဘျီဃီလီၤ.”
အပူၤကွံာ် လါမးရှးအပူၤ ပှၤတဂၤလၢဟဲက့ၤဃ့ၫ်ပူၤဖျဲးထီၣ်ဖဲဒုးယၤဒီးတၫ်ကရၢကရိတၫ်သိၣ်လိကၠိ လၢအိၣ်ဆီလီၤအသးဖဲ မၠ့း,ရွှ့ၣ်ဒူသ၀ီ တဲ၀ဲလၢ တၫ်ကကဲသုးအဂီၫ် သုးကီၣ်ကးသုးတကပၤ သံကွၫ်ပှၤတၫ်ဘၣ်သးတအိၣ်ဘၣ်အဂ့ၫ်န့ၣ်လီၤ.
“ပသကိးတဖၣ် ဖဲလါယနူၤအါရံၤ(၂၁)သီအနံၤန့ၣ် လၢကနီတကပၤ ဆှၢက့ၤပှၤဆူကီၫ်ပယီၤတကပၤလီၤ.ပိာ်ခွါခဲလၢာ် ပာ်ဃုာ်(၇၀)ဂၤလီၤ.သမံသမိးကသံၣ်ခဲလၢာ်ဒီးပှၤလီၤတဲာ်အိၣ်ထဲတဂၤလီၤ.သမံသမိးကသံၣ်၀ံၤ ဆှၢ၀ဲဆူ ခလရ-၄၃၁ န့ၣ်လီၤ.ဖဲန့ၣ်တဆီ ဆှၢကဒီး၀ဲဆူ မၠ့းကီၫ်ဆၣ်,ရွှ့ၣ်ဒူသ၀ီ ဒုးယၤဒီးတၫ်ကရၢကရိတၫ်မၤလိကၠိ၀ံၤ ဘၣ်ထီၣ်သုး တၫ်မၤလိ(၁၀)သီဘျဲၣ်လီၤ.ဃ့ၫ်ဟးထီၣ်လၢတၫ်သိၣ်လိကၠိအံၤလၢတၫ်ကီတၫ်ခဲဒီးသးသမူတၫ်လီၤဘၣ်ယိၣ်အပူၤလီၤ.”
လၢကတီၫ်အံၤ က့ၤဆူဟံၣ်ဖိဃီဖိလၢအိၣ်လၢကၠီၣ်တဲၣ်တကပၤတန့ၫ်ဘၣ်ဆၣ် အိၣ်လၢတၫ်ပူၤဖျဲးအလီၫ်တတီၤအပူၤလံအဂ့ၫ် အ၀ဲတဲ၀ဲလီၤ.
ကလုာ်ဒူၣ်ဖီၣ်စုက၀ဲၤကရၢဒီးကမျၢၫ်တၫ်ဒီသဒၢသုးတဖၣ် အတၫ်ဘိးဘၣ်ရၤလီၤအဖီခိၣ် ဟံးန့ၫ်အခီၣ်တဃာ်၀ံၤ DVB မၤနီၣ်ထၢဖှိၣ်စရီတဖၣ်အဖီခိၣ် ၂၀၂၅နံၣ်,အဆိကတၢၫ်(၃)လါအတီၫ်ပူၤ သုးဖိသီလၢဃ့ၫ်ပူၤဖျဲးထီၣ်က့ၤ လၢသုးကီၣ် ကးအသုးပူၤ အိၣ်ထီၣ်လံ(၁၃၆)ဂၤလံအဂ့ၢ် DVBတၢ်ကစီၣ်ပၥ်ဖျါဃၥ်၀ဲန့ၣ်လီၤ.
ref: dvb
