လါယူၤလံ(၁)သီ,၂၀၂၅နံၣ်
အ့ၣ်ယၣ်၀တံၣ်ကီၫ်ခီ,မၠၣ်အီၣ်ကီၫ်ရ့ၣ် သ၀ီတနီၤ လၢသုးကီၣ်ကးဆီလီၤဃာ်အသုးန့ၣ် ရၢၫ်ခၢၣ်သုးမုၫ်ဒိၣ်(AA)ဒီးသုးပာ်ဖှိၣ်တဖၣ် ထီၣ်ဒုးမၤန့ၫ်၀ဲန့ၣ်လီၤ.
ဒူသ၀ီလၢအိၣ်ဘူးလိာ်သးဒီးလ့မၠဲးနၣ်ကီၫ်ဆၣ် လၢတၫ်ဒုးဆူၣ်အံၤအပူၤ သုးကလၢၤလၢသုးကီၣ်ကးသုးဆီလီၤဃာ်အသးတဖၣ် ဖဲလါယူၤထီၣ်သီန့ၣ် စးထီၣ်ထီၣ်ဒုး၀ဲလီၤ.
အ့ၣ်ယၣ်၀တံၣ်ကီၫ်ခီ,ဂ့ၫ်ခီၣ်ထံးတၫ်ကစီၣ်တဂၤတဲ၀ဲလၢ”သုးကီၣ်ကးသုးတကပၤသံ၀ဲအိၣ်အါမးလီၤ.တၫ်မၤန့ၫ်စ့ၫ်ကီးတၫ်စုက၀ဲၤအါအါဂီၫ်ဂီၫ်လီၤ”န့ၣ်လီၤ.
တၫ်လီၫ်လၢAAဒီးသုးပာ်ဖှိၣ်တဖၣ်ထီၣ်ဒုးမၤန့ၫ်၀ဲန့ၣ် ဘူးလိာ်သးဒီး ဟ့သဒးကီၫ်ရ့ၣ်ပူၤ,၀့ၫ်ကွ့ကီး,သုးကီၣ်ကးတီၤထီ သုးတၫ်ဂဲၤလိကၠိ တတက(၅) ထဲဒၣ်စှၤမံၤလာ်လီၤအဂ့ၫ် တၫ်သ့ၣ်ညါဘၣ်လီၤ.ဘၣ်ထွဲဒီးတၫ်ထီၣ်ဒုးမၤန့ၫ်သုးကလၢၤ တၫ်ဂ့ၫ်တခီ AAတထုးထီၣ်ဘိးဘၣ်ရၤလီၤတၫ်ကစီၣ်ဒံးဘၣ်.
AAဒီးသုးပာ်ဖှိၣ်တဖၣ်န့ၣ် ဖဲအပူၤကွံာ် လါယနူၤအါရံၤဒီးလါဖ့ၤဘြူၤအါရံၤအကတီၫ် တၫ်ဒုးကဲထီၣ်အပူၤ ၀့ၫ်ရွှ့ၣ်သီၣ် ယၣ်ဒီး၀့ၫ်သၣ်ပီတဖၣ်အပူၤ သုးကီၣ်ကးသုးကလၢၤတနီၤစ့ၫ်ကီး ထီၣ်ဒုးမၤန့ၫ်ဃာ်၀ဲလီၤ.
သုးကီၣ်ကးသုးဒီးAAတီခိၣ်ရိၣ်မဲသုးပာ်ဖှိၣ်တဖၣ်အဘၢၣ်စၢၤန့ၣ် လၢကတီၫ်အံၤ တၫ်ဒုးကဲထီၣ်၀ဲဒၣ်ဖဲအ့ၣ်ယၣ်၀တံၣ် ကီၫ်ခီပူၤ,ယ့ၣ်ကၠံၣ်ကီၫ်ဆၣ်,လ့မၠဲးနၣ်ကီၫ်ဆၣ်,အ့ကပူၣ်ကီၫ်ဆၣ်တဖၣ်အပူၤန့ၣ်လီၤ.ယ့ၣ်ကၠံၣ်ကီၫ်ဆၣ်ပူၤ ဖဲ(၃၄၄)ကျိ ဖးဒိၣ်သုးကလၢၤအကပၤစ့ၫ်ကီး တၫ်ဒုးဆူၣ်၀ဲန့ၣ်လီၤ.
“ကတီၫ်ခဲအံၤ တၫ်ဒုးကဲထီၣ်ဆူၣ်ဆူၣ်ကိၤကိၤလီၤ.တၫ်ခးကျိဖးဒိၣ်တပယူာ်လီၤ.လၢမုၫ်နၤခီန့ၣ် ခးစၢၤ၀ဲလၢကလံၤကျါလီၤ.လီၤဂာ်လၢAAဒီးသုးပာ်ဖှိၣ်တဖၣ် ဟဲထီၣ်ဆူတၫ်မဲာ်ညါအဂ့ၫ်”ဟ့သဒး၀့ၫ်ဖိတဂၤတဲ၀ဲလီၤ.
တၫ်ဒုးဆူၣ်ထီၣ်အကတီၫ် သုးကီၣ်ကးန့ၣ် ၀့ၫ်တကူၣ်တကပၤ ကျဲလၢကနုာ်လီၤဆူအ့ၣ်ယၣ်၀တံၣ်ကီၫ်ခီဒီး၀့ၫ်အတြဲၤ နုာ်လီၤဟးထီၣ်တဖၣ် သုးကီၣ်ကးမၤတၫ်သမံသမိးဃံးဃံးန့ၣ်လီၤ.
ref: people spring
