လါယူၤ(၂၃)သီ,၂၀၂၅နံၣ်
အ့ၣ်ယၣ်၀တံၣ်ကီၢ်ခီ, သၣ်ပီကီၢ်ဆၣ်, သ၀ီတနီၤလီၢ်က၀ီၤဖိတဖၣ်အံၤ ဒ်သိးကပှ့ၤပနံၥ်တၢ်ဖိတၢ်လံၤတဖၣ်လၢ ၀့ၢ်ပသံၣ်ပၣ်ဃုၥ်လီၢ်က၀ီၤတဖၣ်အအိၣ်အဂီၢ် ဘၣ်ဟ့ၣ်ပၢပြးခိၣ်တဖၣ်ကျိၥ်စ့၀ံၤ တၢ်ဘၣ်မၤ၀ဲလံၥ်အုၣ်သးတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
သၣ်ပီကီၢ်ဆၣ်, သယဲးကိသ၀ီကရူၢ်အပူၤ ပှၤမၤပနံၥ်ဖိတဖၣ်အံၤ ဒ်သိးကမၤလိၥ်ပနံၥ်တၢ်ဖိတၢ်လံၤတဖၣ်လၢ ပသံၣ်, သၣ်ပီ,ယ့ၣ်ကၠံၣ်ကီၢ်ဆၣ်အပူၤအဂီၢ် စးထီၣ်လၢလါယူၤအသီ(၂၀)သီအနံၤန့ၣ် တၢ်ဘၣ်လဲၤမၤ၀ဲလံၥ်အုၣ်သးလၢ ပၢပြးခိၣ်တဖၣ်အအိၣ်၀ံၤ ဘၣ်ပှ့ၤပနံၥ်တၢ်ဖိတၢ်လံၤတဖၣ်ဒီးဘၣ်ဆါလီၤက့ၤ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“မ့ၢ်မးလိၣ်တၢ်ဖိတၢ်လံၤတဘျီန့ၣ် တၢ်ဘၣ်လဲၤမၤလံၥ်အုၣ်သးတဘျီ”အဂ့ၢ် လီၢ်က၀ီၤ ပှၤမၤပနံၥ်ဖိတဂၤ စံး၀ဲန့ၣ်လီၤ. လံၥ်အုၣ်သးန့ၣ်တဘ့ၣ်န့ၣ် ၅၀၀၀န့ၣ်လီၤ. ဘၣ်မနုအဃိ တၢ်ဘၣ်မၤ၀ဲဒ်လဲၣ်တခီတသ့ၣ်ညါဘၣ်. ပနံၥ်တၢ်ဖိတၢ်လံၤတဖၣ်န့ၣ် တၢ်ဘၣ်မၣ်လိၣ်၀ဲကီမးလီၤ. တၢ်မ့ၢ်မၤ တၢ်ပှ့ၤလံၥ်အုၣ်သးတဘျီန့ၣ် တၢ်ဘၣ်ဟ့ၣ်၀ဲ ၅၀၀၀အဃိ ကီဒိၣ်မး”အဂ့ၢ် စံး၀ဲန့ၣ်လီၤ.
သယဲးကိသ၀ီကရူၢ်အပူၤ သယဲးကိ, အလဲၣ်စူး, ယ့ၣ်လဲကၠံ, ဆ့းကၠံ, ပီးလိး, ဘယါကၠံ, ရွ့ၣ်ယ့ၣ်မၠီၣ်, လ့ၣ်ဘွ့ၣ်ကိ, ကွ့လၢၢ်စူး, ညီၣ်ကွ့သ၀ီ(၁၀)ဖျၢၣ်ပၣ်ဃုၥ်၀ံၤ ရၢၢ်ခၢၣ်သုးမုၢ်ဒိၣ် AAသုးပၥ်ဖှိၣ်ဒီး သုးကီၣ်ကးအသုးအဘၢၣ်စၢၤ တၢ်ဒုးတဖၣ်ဆူၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“ဘၣ်မနုအဃိလဲၣ် ခီဖျိပနံၥ်တၢ်ဖိတၢ်လံၤတဖၣ် သုတလဲၤတုၤဆူ PDFဒီးတၢ်ပၢၢ်ဆၢသုးတဖၣ်အအိၣ်အဂီၢ် မၤ၀ဲဒ်အံၤန့ၣ်လီၤ. တၢ်ဂ့ၢ်အဂၤတအိၣ်ဘၣ်. ပၢပြးခိၣ်တခီ ခီဖျိတၢ်နဲၣ်လီၤအဃိ တၢ်ဘၣ်မၤ၀ဲအဂ့ၢ်စံး၀ဲန့ၣ်လီၤ. လၢတပၤန့ၣ်အဘူးဒီး တၢ်ဒုးကဲထီၣ်အလီၢ်”အဂ့ၢ် စံး၀ဲန့ၣ်လီၤ.
သုးကီၣ်ကးအစုတီၤဖီလၥ် ပၢပြးခိၣ်တဖၣ်န့ၣ် ဒ်သိးတၢ်ကမၤ၀ဲ တၢ်ပှ့ၤပနံၥ်တၢ်ဖိတၢ်လံၤလံၥ်အုၣ်သးအဂီၢ်အသိး တၢ်မ့ၢ်တမၤဘၣ်ဒီးတၢ်မ့ၢ်ဟဲက့ၤပှ့ၤတၢ်ဖိတၢ်လံၤတဖၣ်န့ၣ် တၢ်ကဟံးကွံၥ်ခဲလၢၥ်အဂ့ၢ် ဟ့ၣ်ပလီၢ်ဃၥ်၀ဲအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
တကးဘၣ် သုးကီၣ်ကးအသုးဒီးပၢၤကီၢ်တဖၣ်, ပၢပြးကရၢတဖၣ်န့ၣ် ပၥ်လီၤ၀ဲတၢ်သမံသမိးတြဲၤတဖၣ်လၢ သ၀ီကျဲမုၢ်အဖိခိၣ်၀ံၤ ပနံၥ်တၢ်ဖိတၢ်လံၤလၢတၢ်ဟဲတီၣ်ဆူ သၣ်ပီကီၢ်ဆၣ်, သယဲးကိသ၀ီတပၤတဖၣ် သမံသမိး၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
စးထီၣ်လၢတၢ်ဒုးတဖၣ်ဟဲအိၣ်ထီၣ်လၢ အ့ၣ်ယၣ်၀တံၣ်ကီၢ်ခီအပူၤလံၤလံၤန့ၣ် အ့ၣ်ယၣ်၀တံၣ်ကီၢ်ခီ, ကီၢ်ဆၣ်တနီၤအပူၤ တၢ်ဘၣ်မၤ၀ဲလံၥ်အုၣ်သးလၢ တၢ်ပှ့ၤစဲးဖီကဟၣ်သူသိတဖၣ်အသိး တၢ်ပှ့ၤပနံၥ်တၢ်ဖိတၢ်လံၤတဖၣ်အဂီၢ်စ့ၢ်ကီးန့ၣ် တၢ်ဘၣ်မၤ၀ဲလံၥ်အုၣ်သးတဖၣ်န့ၣ်လီၤ.
ref: hlaing info
