လါယူၤ(၁၉)သီ,၂၀၂၅နံၣ်
ကီၢ်ကၠီၣ်တဲၣ်, တးကီၢ်ရ့ၣ်, မဲဆီး၀့ၢ်အပူၤ တၢ်စးထီၣ်မၤကဒါက့ၤ တၢ်ဖီၣ်ဟံးန့ၢ်ဂ့ၢ်၀ီလၢ တဖိးသဲစးပှၤကီၢ်ချၢဖိ တၢ်တိၥ်ကျဲၤအဃိ ပှၤကီၢ်ပယီၤဖိတဖၣ် တၢ်ဘၣ်ယိၣ်ဘၣ်ဘှီဒိၣ်ထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်တိၥ်ကျဲၤအံၤန့ၣ် တၢ်ကိးအီၤလၢ ကၠီၣ်တဲၣ်ပဒိၣ် အတၢ်တိၥ်ကျဲၤလီၤဆီ ကွၣ်လါအသိး၀ံၤ တၢ်စးထီၣ်အီၤလၢ လါယူၤ(၁၇)သီအနံၤန့ၣ်လီၤ. ပှၤလၢလံၥ်အုၣ်သးတအိၣ်တဖၣ်, ပှၤကီၢ်ချၢဖိလၢ အမၤတၢ်မၤလၢ ထဲဒၣ်ပှၤကၠီၣ်တဲၣ်မၤတၢ်သ့တၢ်မၤ (၂၇)ကလုၥ်တဖၣ် တၢ်ဖီၣ်အီၤအဂ့ၢ် ပှၤဟူးဂဲၤပှၤကီၢ်ပယီၤဖိဂ့ၢ်၀ီကမံးတံၥ် JACBA ပှၤပၢၤလီၢ်ဆ့ၣ်နီၤ အူမိကၠိ စံး၀ဲန့ၣ်လီၤ.
“ပှၤကီၢ်ချၢဖိလၢ အမၤတၢ်မၤလၢတၢ်တြီဃၥ်အီၤတဖၣ် တၢ်ဖီၣ်အီၤမ့ၢ်န့ၢ်န့ၣ် တၢ်အီၤလီးအီၤ (၅)ကထိဘးတုၤ(၅)ကလးဘးန့ၣ်လီၤ. ၀ံၤအလီၢ်ခံ Workpermitစ့ၢ်ကီး တၢ်ပတုၥ်ကွံၥ်အီၤခံနံၣ်န့ၣ်လီၤ. တကးဘၣ် တၢ်ကက့ၤဆှၢအီၤဆူ အနီၢ်ကစၢ်အထံအကီၢ်”အဂ့ၢ် ဘၣ်ထွဲဒီးတၢ်ဟံးဂ့ၢ်၀ီအဖီခိၣ် စံး၀ဲဒ်အံၤန့ၣ်လီၤ.
တကးဒံးဘၣ် ကၠီၣ်တဲၣ်တၢ်မၤကစၢ်တဖၣ်လၢ အမ့ၢ်ကိးမၢပှၤမၤတၢ်ဖိလၢ Workpermitတအိၣ်ဘၣ်တခီ တၢ်ကအီၣ်လိးအီၤ (၁)ကလးဘးတုၤ(၁)ကလီၢ်ဘး၀ံၤ တၢ်ကပတုၥ်ကွံၥ်တၢ်ကိးပှၤမၤတၢ်ဖိတၢ်ပျဲ (၃)နံၣ်အဂ့ၢ်တၢ်သ့ၣ်ညါဘၣ်န့ၣ်လီၤ.
လီၢ်က၀ီၤပှၤကၠီၣ်တဲၣ်ဖိတဖၣ်စ့ၢ်ကီး တၢ်ကဟ့ၣ်ထီၣ်ဘၣ် ပှၤကီၢ်ချၢဖိလၢ အမၤတၢ်လၢ တဖိးသဲစးတဖၣ်တၢ်ဂ့ၢ်တၢ်ကျိၤအဂီၢ် ကၠီၣ်တဲၣ်ပဒိၣ်ဆီၣ်တခုထီၣ်ဃၥ်၀ဲအဃိ ပှၤကၠီၣ်တဲၣ်ဖိတဖၣ်စ့ၢ်ကီး အလဲၤတၢထီၣ်တၢလီၤတဖၣ်စ့ၢ်ကီးအိၣ်၀ဲအဂ့ၢ် တၢ်သ့ၣ်ညါဘၣ်လၢ ကီၢ်ပယီၤခီကီၢ်ပှၤမၤတၢ်ဖိတဖၣ်အအိၣ်န့ၣ်လီၤ.
“တၢ်အိၣ်သ့ညီနုၥ်ဒၣ်န့ၣ် တၢ်ဘၣ်ဟးလၢတၢ်ပလီၢ်ပဒီအပူၤလီၤ. လံၥ်အုၣ်သးလၢပှဲၤဒၣ်လဲၣ်န့ၣ်လီၤ. တၢ်အိၣ်လၢပှဲၤဒၣ်လဲၣ်တၢ်ဖီၣ်တၢ်အဃိ ဘၣ်ယိၣ်တၢ်န့ၣ်လီၤ. တၢ်မ့ၢ်လဲၤပှဲၤတၢ်ဖိတၢ်လံၤဒၣ်လဲၣ်န့ၣ် တၢ်ဘၣ်ကွၢ်တၢ်အိၣ်သး”အဂ့ၢ် ကီၢ်ပယီၤခီကီၢ်ပှၤမၤတၢ်ဖိလၢ အတီဆါအီၣ်တၢ်တဂၤ စံး၀ဲန့ၣ်လီၤ.
“တၢ်ဘၣ်သံကွၢ်သမူသကိးတဖၣ်လီၤ. တၢ်မ့ၢ်ပၥ်လီၤဆါတၢ်လံန့ၣ် ပဆါတၢ်လၢတၢ်သဘျ့အပူၤတသ့ဘၣ်. တၢ်ဘၣ်ကွၢ်ခိၣ်ဃၢၤတၢ်အိၣ်သးတဖၣ်လီၤ. တၢ်ဘၣ်ဆါအီၣ်တၢ်လၢ တၢ်ဘၣ်ယိၣ်ဘၣ်ဘှီအပူၤလီၤ. အဃိ ပျံၤတၢ်ဒိၣ်မး. ခီဖျိလၢကအိၣ်လိးစ့ဧါ လီၢ်ခံတခါန့ၣ် ကဆှၢက့ၤဆူကီၢ်ပယီၤတပၤ၀ံၤ ကက့ၤဟ့ၣ်လီၤဆူ စကစအအိၣ်ဧါအဃိ ဘၣ်ပျံၤတၢ်ဒိၣ်မးလီၤ” အဂ့ၢ် အ၀ဲစံးအါထီၣ်၀ဲန့ၣ်လီၤ.
တၢ်တိၥ်ကျဲၤလၢတၢ်ပၥ်လီၤအီၤခဲအံၤန့ၣ် ကၠီၣ်တဲၣ်ပဒိၣ်ကရၢကရိဃၥ် ကၠီၣ်တဲၣ်တၢ်နုၥ်လီၤဟးထီၣ်ပှၤကညီ၀ဲၤကျိၤ, ကၠီၣ်တဲၣ်တၢ်မူၤတၢ်ရၢ်ပၢၤကီၢ်, သုးခိးကီၢ်ဆၢ, သုးခိး၀့ၢ်, ကၠီၣ်တဲၣ်တၢ်ရဲၣ်ကျဲၤပၥ်လီၤတၢ်ဖံးတၢ်မၤ၀ဲၤကျိၤတဖၣ် ဟူးဂဲၤမၤဖျါထီၣ်အမိၢ်လံမိၢ်ပှၢ်န့ၣ်လီၤ.
တၢ်တိၥ်ကျဲၤလၢစးထီၣ်ဖဲအပူၤကွံၥ် ၂၀၂၄နံၣ်, လါအီးကထိဘၢၣ်(၁)သီတုၤ၂၀၂၅နံၣ် လါယူၤ(၁၃)သီအတီၢ်ပူၤ ကွၢ်လါတၢ်တိၥ်ကျဲၤအံၤန့ၣ် ကၠီၣ်တဲၣ်တၢ်ဖံးတၢ်မၤကိတိၥ်အနဲၣ်လီၤအဖီခိၣ် လၢ၀့ၢ်ဘီကီၥ်အပူၤ တၢ်ဖီၣ်န့ၢ်ပှၤမၤတၢ်ဖိ (၄၄၀၀)ဘျဲၣ်၀ံၤ ဖဲန့ၣ်အကျါ ပှၤ(၄၁၇)ဂၤန့ၣ် တၢ်တီၣ်ထီၣ်ဆူစံၣ်ညီၣ်ကွီၢ်၀ဲၤဒၢးဒီးတၢ်ဟံးန့ၢ်ဂ့ၢ်၀ီတဖၣ်လံအဂ့ၢ် တၢ်သ့ၣ်ညါဘၣ်န့ၣ်လီၤ.
ကီၢ်ကၠီၣ်တဲၣ်အပူၤ ကွၢ်လါတၢ်တိၥ်ကျဲၤအံၤန့ၣ် တၢ်မၤအီၤ (၁)နံၣ်န့ၣ် (၂)ဘျီ, မ့တမ့ၢ် (၃)ဘျီဒီး တနံၣ်အံၤ၂၀၂၅နံၣ် တုၤလါယူၤ(၁၃)သီအနံၤန့ၣ် တၢ်မၤတ့ၢ်၀ဲလၢ တးကီၢ်ရ့ၣ်အဆှၢခိၣ် ၀့ၢ်ဘီကီၥ်တဖၣ်အပူၤ၀ံၤ တလါအံၤစးထီၣ်လၢ(၁၇)သီအနံၤန့ၣ် တၢ်စးထီၣ်မၤအီၤလၢ တးကီၢ်ရ့ၣ်အပူၤန့ၣ်လီၤ.
ref:than lwin khet
