အံၣ်စရ့န့ၣ် တုၤဃီၤလၢတၢ်မၤနၢၤအကျဲအဖီခိၣ်လံအဂ့ၢ် န့ၣ်တၣ်ယၣ်ဟူးစံး၀ဲ

လါယူၤ(၁၇)သီ,၂၀၂၅နံၣ်

အံၣ်စရ့န့ၣ် တုၤဃီၤလၢတၢ်မၤနၢၤကျဲအဖီခိၣ်လံအဂ့ၢ်န့ၣ် ကိတိၥ်ခိၣ်ကျၢၢ် ဘဲးကၠမ့ၣ်န့ၣ်တၣ်ယၣ်ဟူး စံးလီၤ၀ဲန့ၣ်လီၤ.အံၣ်ရၣ်ဒီးအံၣ်စရ့ထံကီၢ်ခံဘ့ၣ်အဘၢၣ်စၢၤ ဒုးခးလိၥ်သးလၢကလံၤကျါတဖၣ်အဆၢကတီၢ် ဖဲလါယူၤ(၁၆)သီအနံၤန့ၣ် န့ၣ်တၣ်ယၣ်ဟူးလဲၤဆူအံၣ်စရ့ကလံၤသုးကလၢၤတဖျၢၣ်အကတီၢ် တဲလီၤ၀ဲဒ်အံၤန့ၣ်လီၤ.

န့ၣ်တၣ်ယၣ်ဟူးတဲလီၤတ့ၢ်ဃၥ်တၢ်ကတိၤတဖျၢၣ်လၢအမ့ၢ် အံၣ်စရ့သုးမုၢ်ဒိၣ်န့ၣ် ဒိၣ်စိဃၥ်၀ဲ အံၣ်ရၣ်၀့ၢ်ခိၣ် တၣ်ဟံၣ်ရၣ်ကလံၤကျါတၢ်ပၢအဂ့ၢ်န့ၣ် တဲလီၤကဒီး၀ဲအသီတဘျီန့ၣ်လီၤ.

ဘၣ်ထွဲဒီးအံၣ်ရၣ်န့ၣ် အံၣ်စရ့တပၤ သုးဂ့ၢ်၀ီတၢ်ပညိၣ်အိၣ်၀ဲ (၂)ခါအဂ့ၢ်, တၢ်ပညိၣ်တဖၣ်န့ၣ် တၢ်ကမၤရှဲပျီကွံၥ် နူကလံယါတၢ်မၤပျံၤမၤဖူးဒီးမျိၥ်တၢ်မၤပျံၤမၤဖူးတဖၣ်အဂ့ၢ်ဒီး တကးဘၣ် အံၣ်စရ့ၣ်န့ၣ် တုၤဃီၤလၢ တၢ်ကမၤနၢၤသုးဂ့ၢ်၀ီတၢ်ပညိၣ်အဂီၢ်လံအဂ့ၢ် န့ၣ်တၣ်ယၣ်ဟူးစံး၀ဲန့ၣ်လီၤ.

အ၀ဲန့ၣ် အံၣ်ရၣ်ဒီးအံၣ်စရ့အဘၢၣ်စၢၤ ခံခီယၢ်ပၤတၢ်ဒုးခးလိၥ်သးတဖၣ်အိၣ်ဘၣ်ဆၣ် တၢ်ပၥ်လုၢ်ပၥ်ပှ့ၤတဖၣ်တခီ တဒ်သိးလိၥ်သးဘၣ်အဂ့ၢ် စံး၀ဲန့ၣ်လီၤ. အံၣ်ရၣ်န့ၣ်ဒုးခး၀ဲ အံၣ်စရ့ၣ်ကမျၢၢ်ဖိတဖၣ်ဘၣ်ဆၣ် မ့မ့ၢ်လၢအံၣ်စရ့တခီ ဒုးခးဒၣ် သုးတၢ်ခးပနီၣ်တဖၣ်လီၤတံၢ်လီၤဆဲးလီၤအဂ့ၢ် အ၀ဲတဲထိၣ်သတြီၤ၀ဲန့ၣ်လီၤ.

၀ံၤအလီၢ်ခံ အံၣ်စရ့တခီ တချူးမၤတၢ်ဒုးခးတဖၣ်န့ၣ် ကမျၢၢ်လၢအိၣ်ဖဲ တံၣ်ဟံၣ်ရၣ်တဖၣ် ကသုးကပၤအသးအဂီၢ် ဟ့ၣ်ဒုးသ့ၣ်ညါဆိပၥ်၀ဲအဂ့ၢ်စ့ၢ်ကီး န့ၣ်တၣ်ယၣ်ဟူး တဲလီၤ၀ဲန့ၣ်လီၤ.

လၢတပၤစ့ၢ်ကီး အံၣ်စရ့ဒုးခး၀ဲတဖၣ် မ့ၢ်ဘၣ်တၢ်ခးပနီၣ်လီၤတံၢ်လီၤဆဲးန့ၣ် ဘၣ်မနုအဃိ ပိၥ်မုၣ်ဒီးဖိသၣ်တဖၣ်ပၣ်ဃုၥ် အံၣ်ရၣ်ကမျၢၢ်ဖိတၢ်သံတၢ်ပှၢ်တဖၣ် ဘၣ်အါထီၣ်၀ဲလဲၣ်အဂ့ၢ်န့ၣ် အံၣ်ရၣ်ထုးထီၣ်တၢ်သံကွၢ်၀ံၤ တဲလီၤနံၤ၀ဲ န့ၣ်တၣ်ယၣ်ဟူးန့ၣ်လီၤ. အံၣ်စရ့-အံၣ်ရၣ် သုးဂ့ၢ်၀ီတၢ်သဘံၣ်သဘုၣ် ယံၤ(၄)သီအတီၢ်ပူၤ အံၣ်ရၣ်တပၤ အစှၤကတၢၢ်ပှၤ(၂၂၄)ဂၤဘၣ်သံ၀ဲန့ၣ်လီၤ.

လါယူၤ(၁၆)သီအနံၤန့ၣ် အံၣ်စရ့လဲၤတ့ၢ်လီၤမ့ၣ်ပိၢ် ဆူအံၣ်ရၣ်အဂံၢ်ဘါဆူၣ်ကတၢၢ် ပှၤဖီၣ်စုက၀ဲၤကရၢတဖုလၢအမ့ၢ် တၢ်ပၢၢ်ဆၢသုး ဒုးယၤယူၣ်န့းလီၤဆီ Qudsသုး အ၀ဲအလီၢ်ခိၣ်သ့ၣ်န့ၣ်လီၤ.

Qudsန့ၣ် သူ၀ဲ မုၢ်ထီၣ်ချၢၣ်သးအပူၤအိၣ် အံၣ်ရၣ်အစုတီၤဖီလၥ် ပှၤဖီၣ်စုက၀ဲၤကရၢတဖၣ်၀ံၤ မၤ၀ဲတၢ်မၤပျီၢ်မၤဂီၤဒုးယၤတဖၣ်လၢ အံၣ်စရ့အဖီခိၣ်အပူၤ မ့ၢ်ကရၢတဖုလၢဖီၣ်ပျံၤလၢတၢ်လီၢ်ခံအဂ့ၢ် အံၣ်စရ့တပၤ တဲပဲၥ်ပၢပဲၥ်သီ၀ဲန့ၣ်လီၤ.

အံၣ်စရ့ စးထီၣ်မၤအံၣ်ရၣ်လၢ ကလံၤကျါဒုးယၤရဲၣ်ကျဲၤတဖၣ်အနံၤလံၤလံၤန့ၣ် ဒုးမၤသံကွံၥ်၀ဲ အံၣ်ရၣ်တၢ်ပၢၢ်ဆၢသုး ပှၤဘၣ်မူဘၣ်ဒါအထီကတၢၢ်အကျါ တဂၤလၢအမ့ၢ် ဟိၣ်စ့ၣ်ဆၣ်လၣ်မံၣ်န့ၣ်လီၤ. လၢတၢ်န့ၣ်အဃိ လၢအ၀ဲအလီၢ်န့ၣ် တၢ်ဟ့ၣ်လီၤမူဒါလီၢ်လၤလၢ အံၣ်ရၣ်သုးခိၣ်ကျၢၢ်ဂီၢ်ဂ့ၢ် အၣ်မဲးဘၣ်ဟံၣ်ဒံၣ်အဂ့ၢ် တၢ်သ့ၣ်ညါဘၣ်န့ၣ်လီၤ.

Ref: BBC