လါယူၤ(၁၆)သီ,၂၀၂၅နံၣ်
တၢ်ဒုးဆူၣ်လၢ ရၢၢ်ခၢၣ်ကီၢ်စဲၣ်, ကၠီးဖၠူၣ်၀့ၢ်တၢ်ဒုးအပူၤ သုးကီၣ်ကးအသုး ဟဲပၥ်လီၤစုက၀ဲၤလၢသုးရ့ၣ်ဒီတရ့ၣ်အဂ့ၢ် Arakan Princess media ပၥ်ဖျါဃၥ်၀ဲတၢ်ကစီၣ်န့ၣ်လီၤ.
သုးကီၣ်ကးအပှၤသုးဖိလၢဟဲပၥ်လီၤစုက၀ဲၤလၢAAသုးမုၢ်ဒိၣ်အအိၣ်တဖၣ်န့ၣ်ခီဖျိလၢသုးကီၣ်ကးဟ့ၣ်တၢ်ဆီၣ်သနံးအဃိ ဘၣ်ဒုးတၢ်၀ံၤ တအဲၣ်ဒိးဒုးတၢ်လၢၤဘၣ်အဃိ ဟဲပၥ်လီၤ၀ဲစုက၀ဲၤအဂ့ၢ် စံး၀ဲန့ၣ်လီၤ.
ကၠီးဖၠူၣ်တၢ်ဒုးအပူၤ သုးကီၣ်ကးအပှၤသုးဖိတနီၤ ပၥ်တ့ၢ်သုးရ့ၣ်သုးကလၢၤတဖၣ်၀ံၤဃ့ၢ်ပဒ့ၣ်အသးတဖၣ် အိၣ်ထီၣ်၀ဲအဃိ ကိးမုၢ်နံၤတၢ်ဘၣ်လူၤဖီၣ်အီၤအဂ့ၢ် တၢ်သ့ၣ်ညါဘၣ်န့ၣ်လီၤ.
ကၠီးဖၠူၣ်ကီၢ်ဆၣ်တၢ်ဒုးအပူၤ AA သုးမုၢ်ဒိၣ် ခးသံကွံၥ် သုးကီၣ်ကးသုးတြိၤ(၁၁)အစုတီၤဖီလၥ် ခီၣ်ချ့သုးရ့ၣ်၀ဲၤလီၢ်ခိၣ်သ့ၣ် သုးခိၣ်ကျၢၢ်ဖိကၠီၣ်မၠီအီၣ်ဒီးသုးခိၣ်ဂီၢ်ဂ့ၢ်တဂၤလၢ စုဘျၢအသိး တၢ်မၤန့ၢ်စ့ၢ်ကီး သုးကီၣ်ကးအဒုးယၤခိၣ်ဃုၥ်ဒီးတၢ်သံအစိၣ်(၃၀)ဘျဲၣ်ဒီးစုက၀ဲၤကျိချံပှၥ်သၣ်တနီၤန့ၣ်လီၤ.
ဖဲအပူၤကွံၥ် လါမ့ၤ(၃၀)သီအနံၤန့ၣ် သုးကီၣ်ကးအသုးလၢ ဟဲအိၣ်ဆီလီၤဃၥ်အသးဖဲ ကၠီးဖၠူၣ်ကီၢ်ဆၣ်, မ့တဲးတီၣ်သ၀ီ, ကလံၤစိး မံၣ်ထၢၣ်(၆၀၀)အယံၤ စဲးဖီကဟၣ်တၢ်သိၣ်လိကၠိအပူၤတဖၣ် မၤ၀ဲဒုးယၤရဲၣ်ကျဲၤအဃိ ခံခီခံကပၤတၢ်ဘၣ်သဂၢၢ်ခးလိၥ်သးတဖၣ်အိၣ်ထီၣ်၀ံၤ ဖဲတၢ်ဒုးအပူၤ တၢ်ဖီၣ်န့ၢ်မူဒံးစ့ၢ်ကီး သုးကီၣ်ကးကီၢ်ခီသုးရိၣ်မဲခိၣ်(၁) သုးခိၣ်ဒိၣ်ဂီၢ်ဂ့ၢ် ကၠီၣ်လ့ကၠဲၣ်ဒီးအပှၤသုးဖိတဖၣ်န့ၣ်လီၤ.
ဖဲလၢကၠီးဖၠူၣ်တၢ်ဒုးဆူၣ်အဆၢကတီၢ် သုးကီၣ်ကးအသုးန့ၣ် ပညိၣ်ဒုး၀ဲ AAသုးမုၢ်ဒိၣ်ပၢဆှၢဃၥ် ကီၢ်ဆၣ်,ဒူသ၀ီတဖၣ်အပူၤအိၣ် လီၢ်က၀ီၤကမျၢၢ်တဖၣ်အဃိ လီၢ်က၀ီၤကမျၢၢ်တၢ်ဘၣ်ဒိဘၣ်ထံးဒီးတၢ်သံတၢ်ပှၢ်တဖၣ်အိၣ်ထီၣ်၀ဲအသိး တၢ်ဆါဟံၣ်, တၢ်သိၣ်လိကၠိဒီးဟံၣ်ဃီ တၢ်ဟးဂုၤဟးဂီၤတဖၣ်အိၣ်ထီၣ်၀ဲန့ၣ်လီၤ.
AAသုးမုၢ်ဒိၣ်ကပၢဆှၢအီၤအိၣ်တ့ၢ်ဒံး၀့ၢ်သၢ၀့ၢ်အကျါကၠီးဖၠူၣ်န့ၣ်အိၣ်၀ဲဒၣ်ဒီးတရူးတၢ်တိၥ်ကျဲၤတဖၣ်ဒီးထံဂုၤကီၢ်ဂၤတၢ်ဘျၢလီၤတဖၣ်အအါကတၢၢ်အဃိ AAတသူ၀ဲသုးအဂံၢ်အဘါအါအါဂီၢ်ဂီၢ်ဒီးမၤ၀ဲတၢ်ထီၣ်ဒုးတဖၣ်န့ၣ်လီၤ.
