လါယူၤ(၁၃)သီ,၂၀၂၅နံၣ်
ကၠီၣ်တဲၣ်-ပယီၤကီၫ်ဆၢ,ဒ၀ဲၫ်-ထံခံကျဲဖီခိၣ် ဘီဒံးကီၫ်ဆၢသုးကလၢၤန့ၣ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ် (KNLA) ဒီးသုးပာ်ဖှိၣ်တဖၣ် ထီၣ်ဒုးမၤန့ၫ်၀ဲ၀ံၤအလီၫ်ခံ ငယးနံၣ်ကီၫ်ဆၢသုးကလၢၤ သုးဖိတဖၣ် ပာ်တ့ၫ်သုးကလၢၤဃ့ၫ်ဟးထီၣ် ကွံာ်အဂ့ၫ် KNU,သုးက့နီၫ်ဂံၫ်(၄) ကီၫ်ရ့ၣ်နဲၣ်ရွဲၣ် ပဒိၣ်စီၤအဲၣ်နၤတဲ၀ဲလီၤ.
ဘီဒံးသုးကလၢၤန့ၣ် ဖဲလါယူၤ(၁၀)သီနံၤ သုးပာ်ဖှိၣ်တဖၣ်ထီၣ်ဒုးမၤန့ၫ်၀ဲ၀ံၤအလီၫ်ခံ ယံာ်ခံသီ,လါယူၤ(၁၂)သီအနံၤ,ဂီၤ ခီအကတီၫ် ငယးနံၣ်သုးကလၢၤပူၤ သုးကီၣ်ကးအသုးဖိခဲလၢာ် (၂၀)ဂၤဃၣ်ဃၣ် ပာ်တ့ၫ်သုးကလၢၤ ဃ့ၫ်ကွံာ်ဆူကၠီၣ် တဲၣ် တကပၤအဂ့ၫ် တၫ်သ့ၣ်ညါဘၣ်လီၤ.
“အ၀ဲသ့ၣ်ခီၣ်ဆၢ၀ဲလၢအဂံၫ်အဘါတန့ၫ်လၢၤဘၣ်.၀ံၤဒၢး သုးတၫ်မၤစၢၤဟဲတတုၤလၢၤအဃိ ဃ့ၫ်ဖျိးကွံာ်လီၤ. လၢပ၀ဲ တကပၤ တလဲၤမၤပျီဘၣ် သုးကလၢၤဒံးဘၣ်အဂ့ၫ်” ပဒိၣ်စီၤအဲၣ်နၤတဲ၀ဲလီၤ.
လၢကတီၫ်အံၤ ၀့ၫ်ဒ၀ဲၫ်ဒီးကၠီၣ်တဲၣ်ကီၫ်ဆၢဒီတကျိၤ တၫ်အဲၣ်-ထံခံကီၫ်ဆၢဒီတကျိၤ သုးကီၣ်ကးအသုးကလၢၤတအိၣ် လၢၤဘၣ်အဂ့ၫ်,၀့ၫ်တၫ်အဲၣ်ဒီးတုၤထံခံကီၫ်ဆၢ ကျဲဒီတဘိ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA) ပၢဆှၢဃာ်၀ဲ အဂ့ၫ် တၫ်သ့ၣ်ညါဘၣ်လီၤ.
“ထံခံဟီၣ်က၀ီၤပူၤဒု သုးကလၢၤတအိၣ်လၢၤဘၣ်.လၢဒ၀ဲၫ်တခီ, ကၠီးမဲတီၣ်ဒီးတၫ်အဲၣ်အိၣ်တ့ၫ်ဒံးအဂ့ၫ်”ပဒိၣ်စီၤအဲၣ် နၤတဲ၀ဲလီၤ.
ငယးနံၣ်,ဘီဒံး,ထံခံ,ထံထၣ် သုးကလၢၤတဖၣ်န့ၣ် စးထီၣ်လၢ(၁၉၉၇)နံၣ်လံၤလံၤ သုးဆီလီၤဃာ်အသုးကလၢၤတဖၣ် ၀ံၤ KNLAသုးပာ်ဖှိၣ်တကပၤ စးထီၣ်ဖဲ၂၀၂၅နံၣ်,နံၣ်ခီၣ်ထံးန့ၣ် ထီၣ်ဒုးဃီၤ၀ဲဒီး မၤန့ၫ်သုးကလၢၤတဖျၢၣ်၀ံၤတဖျၢၣ်န့ၣ် လီၤ.
KNLA သုးပာ်ဖှိၣ်တဖၣ်န့ၣ် ထီၣ်ဒုးမၤန့ၫ်၀ဲ ကၠီၣ်တဲၣ်ကီၫ်ဆၢ,ရၤမတံဟီၣ်က၀ီၤပူၤ ဘျၢၣ်ဒိၣ်,ကနဲလ့,၀ၣ်မံၤထၣ်, ဘး ယ့းနီၣ်သုး ကလၢၤ,မီာ်ခံဒီးသ့ၣ်ဘီဘိသုးကလၢၤတဖၣ်န့ၣ်လီၤ.ဒ်န့ၣ်အသိးသုးကီၣ်ကးအသုးကလၢၤ ပူလူတူ,ချၢၣ်ဒ့, မီာ်ဖါသူ, ခိးဘံၣ်ကွံ,တၣ်လဲၣ်ဒုးယၤသုးကလၢၤ,မဲၫ်လးသုးကလၢၤဒီးမီာ်ဖိက့ၣ်သုးကလၢၤ သုးကလၢၤ(၇)ဖျၢၣ်န့ၣ်လီၤ.
တကးဘၣ်,KNU,သုးက့နီၫ်ဂံၫ်(၄) ဒ၀ဲၫ်ကီၫ်ရံၣ်,ဒ၀ဲၫ်ကီၫ်ဆၣ်ပူၤ ထံခံ,ထံထၣ်ဒုးယၤသုးကလၢၤတဖၣ်ဒီးဘီဒံးသုးက လၢၤတဖၣ်စ့ၫ်ကီး KNLAသုးပာ်ဖှိၣ် ထီၣ်ဒုးမၤန့ၫ်ဃာ်၀ဲလီၤ.
