လါယူၤ(၁၂)သီ,၂၀၂၅နံၣ်
ရၢၫ်ခၢၣ်သုးမုၫ်ဒိၣ်(AA)ဒီးသုးပာ်ဖှိၣ်တဖၣ် ပၢဆှၢဃာ်၀ဲ ယ့ၣ်ကၠံၣ်ကီၫ်ဆၣ်ပူၤ ရှီပၠၣ်ဒီးစဲးစဲးယိၣ်သ၀ီတဖၣ်န့ၣ် သုးကီၣ်ကးလဲၤဒုးတ့ၫ်လီၤမ့ၣ်ပိၫ်လၢကလံၤကျါ၀ံၤလၢကတီၫ်အံၤ ငသဲခၠီ-ကွးကျဲမုၫ်, ယ့ၣ်နးသၣ်သ၀ီကပၤဒီးကျိဖးဒိၣ်သုး (၃၄၄)ကပၤ တၫ်ဒုးကဲထီၣ်၀ဲလီၤ.
ပသံၣ်-မိၣ်ယွၣ်ကျဲမုၫ် တုၤ ယ့ၣ်ကၠံၣ်ကီၫ်ဆၣ်,စဲးစဲးယိၣ်သ၀ီဒီးရှီပၠၣ်သ၀ီန့ၣ် အပူၤကွံာ်လါအ့ဖြ့ၣ်တၫ်ဒုးတဖၣ်အပူၤ AAပၢဆှၢဃာ်၀ဲလီၤ.
“တၫ်ဒုးန့ၣ် ကဲထီၣ်ဖဲယ့ၣ်နးသၣ်ကပၤဒီး ၃၄၄ အကပၤန့ၣ်လီၤ.ကဘီယူၤမ့ၫ်ဂ့ၤ,ကျိဖးဒိၣ်မ့ၫ်ဂ့ၤ ခး၀ဲမုၫ်ဆါမုၫ်နၤလီၤ. ခး၀ဲအါလၢဟါခီတကပၤလီၤ.ပှၤခးတၫ်အကလုၫ်သီၣ်တဖၣ် နၫ်ဟူဘၣ်ပျီပျီလီၤအဂ့ၫ်”ပှၤ၀့ၫ်ငသဲခၠီဖိတဂၤတဲ၀ဲလီၤ.
ယ့ၣ်နးသၣ်သ၀ီန့ၣ် အိၣ်သူၣ်ဆီလီၤအသး ဖဲကွး-ငသဲခၠီကျဲလၢ ဒုးဘျးစဲန့ၫ် ရၢၫ်ခၢၣ်ကီၫ်စဲၣ်ဒီးအ့ၣ်ယၣ်၀တံၣ်ကီၫ်ခီ န့ၣ်လီၤ.
၂၀၂၄နံၣ်,လါဒံၣ်စ့ဘၢၣ်(၂၉)သီနံၤ,ရၢၫ်ခၢၣ်ကီၫ်စဲၣ်,၀့ၫ်ကွးန့ၣ် AAထီၣ်ဒုးမၤန့ၫ်၀ံၤအလီၫ်ခံ အ့ၣ်ယၣ်၀တံၣ်-ရၢၫ်ခၢၣ် ကီၫ်ဆၢတၫ်လီၫ်တဖၣ်ဒ်အမ့ၫ် သၣ်ပီ,၀့ၫ်ရွှ့ၣ်သီၣ်ယၣ်တဖၣ်အပူၤ တၫ်လီၫ်လၢသုးကီၣ်ကးသုးအိၣ်အလီၫ်တဖၣ် AA ထီၣ်ဒုး၀ဲလီၤ.
ကျိဖးဒိၣ်(၃၄၄)အတၫ်မဲာ်ညါတၫ်ဒီသဒၢသုးကလၢၤတနီၤ ထီၣ်ဒုးမၤန့ၫ်၀ဲဘၣ်ဆၣ် တၫ်ကစီၣ်လီၤတံၫ်လီၤဆဲး AA တ ထုးထီၣ်ဘိးဘၣ်ရၤလီၤ၀ဲဒံးဘၣ်.လ့မၠဲးနၣ်ကီၫ်ဆၣ်လၢအိၣ်ဘူးဒီး၀့ၫ်ယ့ၣ်ကၠံၣ်အံၤအပူၤစ့ၫ်ကီး သုးကီၣ်ကးခးကျိဖးဒိၣ် လီၤ.လ့မၠဲးနၣ်ကီၫ်ဆၣ်ပူၤ ဒူသ၀ီတနီၤ AAဒီးသုးပာ်ဖှိၣ်တဖၣ် ထီၣ်ဒုးမၤန့ၫ်ဃာ်၀ဲအဂ့ၫ် တၫ်ကစီၣ်ဟးထီၣ်၀ဲလီၤ.
သုးကီၣ်ကးန့ၣ် ဒူသ၀ီလၢဘၣ်ပျၫ်ကွံာ်၀ဲတဖၣ် သူကဘီယူၤဒီးကျိဖးဒိၣ်တဖၣ်၀ံၤဒုးခးလီၤ၀ဲအဃိ လီၫ်က၀ီၤကမျၢၫ် တဖၣ် ဘၣ်ဃ့ၫ်ပူၤဖျဲးအသးန့ၣ်လီၤ.
အပူၤကွံာ် လါယနူၤအါရံၤ တၫ်ဒုးဆူၣ်တ့ၫ်၀ဲ ဖဲရွှ့ၣ်သီၣ်ယၣ်ဒီးသၣ်ပီကီၫ်ဆၣ်ပူၤအံၤ ကတီၫ်အံၤန့ၣ် တၫ်ဒုးဘှ့ၣ်ထီၣ်၀ံၤ သုးကီၣ်ကးန့ၣ် မၤပှဲၤဃာ်ဂံၫ်ဘါဒီး သုးဖိအသီတဖၣ်န့ၣ်လီၤ.
အပူၤကွံာ် လါမးရှး(၂၈)သီ ဟီၣ်ခိၣ်ဟူးဆူၣ်ဆူၣ်ကလဲာ် ဖဲစကဲကီၫ်ခီဒီးမါတလ့တဖၣ်အဃိ သုးကီၣ်ကးမ့ၫ်ဂ့ၤ သိၣ်မှံၤ လၢAAပာ်ဃုာ်(၃)ဖု ပတုာ်တၫ်ခးန့ၣ်လီၤ.
လၢကတီၫ်အံၤ တၫ်ဒုးတၫ်ဂ့ၫ်တၫ်ကျိၤတဖၣ် AAတထုးထီၣ်ဘၣ်ဖျါထီၣ်၀ဲဒံးဘၣ်ဆၣ် ဖဲလါအ့ဖြ့ၣ်(၅)သီ အလီၫ်ခံက တၢၫ် တၫ်ဘိးဘၣ်ပာ်ဖျါအပူၤ မကွ့ကီၫ်ခီ,ပကိကီၫ်ခီ,အ့ၣ်ယၣ်၀တံၣ်ကီၫ်ခီဒီးရၢၫ်ခၢၣ်ကီၫ်စဲၣ်တဖၣ်အပူၤ သုးကလၢၤလၢAAထီၣ်ဒုးမၤန့ၫ်တဖၣ် သုးကီၣ်ကး ကျဲးစၢးဒုးန့ၫ်က့ၤ၀ဲ၀ံၤ မၤ၀ဲကလံၤကျါဒုးယၤတဖၣ်,ခးလီၤကျိဖးဒိၣ်တဖၣ်, ဟဲထီၣ်သုးကျိၤတဖၣ်အဃိ တၫ်ဒုးကဲထီၣ်ကဒီး၀ဲအဂ့ၫ် ပာ်ဖျါဃာ်၀ဲလီၤ.
Ref: People spring
