လါယူၤ(၁၁)သီ,၂၀၂၅နံၣ်
ဖဲ၂၀၂၅နံၣ်,လါယူၤ(၁၀)သီအနံၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်KNLAသုးက့(နီၣ်ဂံၢ်-၄)တီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်တဖၣ်ထီၣ်ဒုးမၤန့ၢ်ကွံၥ်၀ဲပယီၤသုးကီၣ်ကးသုးကလၢၤလၢအိၣ်ဆီလီၤဃၥ်အသးဖဲအမိၤကီၢ်ဆၢအံသၣ်ဃ့ၣ်ကစၢၢ်လၢဘၣ်တၢ်သ့ၣ်ညါအီၤဒ်အမ့ၢ်ပွဲး၂၅၆၆)အဂ့ၢ် ခ့ၣ်အဲၣ်ယူၣ်-ကီၢ်ရ့ၣ်ဘျံးဒ၀ဲၢ်ပၥ်ဖျါဃၥ်၀ဲန့ၣ်လီၤ.
KNLAဒီးတၢ်ပၢၢ်ဆၢသုးပၥ်ဖှိၣ်တဖၣ် စးထီၣ်ထီၣ်ဒုး၀ဲသုးကလၢၤအံၤဖဲလါယူၤ(၈)သီအနံၤဒီး မၤန့ၢ်၀ဲသုးကကလၢၤ ဖဲလါယူၤ(၁၀)သီအနံၤ, မုၢ်ထူၣ်အဆၢကတီၢ် လၢ(၃)သီအတီၢ်ပူၤန့ၣ်လီၤ.
ပယီၤသုးကီၣ်ကးအမိၤကီၢ်ဆၢသုးကလၢၤအံၤ အိၣ်၀ဲဒၣ်လၢ (ခလရ-၂၅)ဒီးထံထၣ်သုးကလၢၤ အတၢ်တီခိၣ်ရိၣ်မဲအဖီလၥ်န့ၣ်လီၤ.ပယီၤအမိၤကီၢ်ဆၢသုးကလၢၤအံၤစးထီၣ်ဟဲအိၣ်ဆီလီၤဃၥ်အသးဖဲ(၁၉၉၇)နံၣ်အလီၢ်ခံ ဖဲပယီၤသုးဟဲထီၣ်ဒုးမၤန့ၢ်၀ဲဒၣ် ဘျံးဒ၀ဲၢ်ကီၢ်ရ့ၣ် မဲၢ်သမံၢ်ခံ၀ဲၤလီၢ်ခိသ့ၣ်အလီၢ်ခံန့ၣ်လီၤ.
လၢတၢ်ထီၣ်ဒုးသုးကီၣ်ကးသုးကလၢၤတဘျီအံၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်KNLA(သုးက့နီၣ်ဂံၢ်-၄)တီခိၣ်ရိၣ်မဲဒီးပၥ်ဖှိၣ်ထီၣ်သးဒီးဂၢၤသး(KNDO)သုးရ့ၣ်(၇), သုးက့(drone)အကရူၢ်(Karen Drone Special Force/KDSF),ထံမိၢ်ပှၢ်ဟီၣ်က၀ီၤသ့ၣ်ပှၢ်၀ဲၤကျိၤ,ပၢၤကီၢ်,ဘံၣ်ဘၢ,ထံမိၢ်ပှၢ်ဟီၣ်က၀ီၤပိၥ်မုၣ်ကရၢတဖၣ်ဒီးသိၣ်မှံလၢအပၣ်ဃုၥ်(TPLF)ဒီး(FFD)တဖၣ်အဂ့ၢ် ခ့ၣ်အဲၣ်ယူၣ်-ကီၢ်ရ့ၣ်ဘျံးဒ၀ဲၢ်ပၥ်ဖျါဃၥ်၀ဲန့ၣ်လီၤ.
ဖဲအပူၤကွံၥ် လါမ့ၤ(၉)သီအနံၤစ့ၢ်ကီး KNLAသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးထံခံသုးကလၢၤလၢအိၣ်ဖဲ သုးက့(၄)ဟီၣ်က၀ီၤ, ကၠီၣ်တဲၣ်-ကီၢ်သူလ့ၤကီၢ်ဆၢအပူၤအသိး လါအ့ဖြ့ၣ်(၂၀)သီအနံၤန့ၣ် ဒုးမၤန့ၢ်ကဒီး၀ဲ ထံထၣ်သုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤ၀ံၤ လါယူၤ(၁၀)သီအနံၤန့ၣ် ဒုးမၤန့ၢ်ကဒီး၀ဲ သုးကီၣ်ကးအမိၤကီၢ်ဆၢ အံသ့ၣ်ဃ့ၣ် သုးကလၢၤ(ပွဲး ၂၅၆၆)သုးကလၢၤအံၤန့ၣ်လီၤ.
