လါယူၤ(၁၁)သီ,၂၀၂၅နံၣ်
၂၀၂၅နံၣ်, လါယူၤ(၁၀)သီအနံၤ, အညၣ်ဟီၣ်က၀ီၤ တၢ်ပၢၢ်ဆၢသုးတဖၣ် ခးလီၤတဲၥ်ကွံၥ်ကဘီယူၤ(၁)ခိၣ်ပၣ်ဃုၥ် ကီၢ်ပယီၤဒီတဘ့ၣ်အပူၤတၢ်ပၢၢ်ဆၢသုးတဖၣ်ခးလီၤတဲၥ်ကွံၥ်၀ဲသုးကီၣ်ကးအကဘီယူၤဒုးသုးအိၣ်ထီၣ်လံ(၁၁)ခိၣ်လံန့ၣ်လီၤ. တၢ်မ့ၢ်ဒွးဃုၥ်ဒီးကဘီယူၤ(၁)ခိၣ်လၢ အလီၤတဲၥ် ဖဲမ့းထံၣ်လၣ်ရှါတဲကဘီယူၤသုးကလၢၤအပူၤန့ၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ သုးကီၣ်ကးအသုး ကဘီယူၤဘၣ်ဟးဂီၤကွံၥ်၀ဲ(၁၂)ခိၣ်လံန့ၣ်လီၤ.
တၢ်ပၢၢ်ဆၢထီဒါ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုး အိၣ်ထီၣ်(၄)နံၣ်ဘျဲၣ်အတီၢ်ပူၤ အညၣ်ဟီၣ်က၀ီၤအပူၤ တၢ်ပၢၢ်ဆၢသုးတဖၣ် ခးလီၤတဲၥ်ကွံၥ်သုးကီၣ်ကးအကဘီယူၤအံၤန့ၣ် မ့ၢ်ဒၣ်အဆိကတၢၢ်တဘျီန့ၣ်လီၤ.
စကဲကီၢ်ခီ,ပလဲကီၢ်ဆၣ်,ကးဒီးသ၀ီဒီးစံဖၠူၣ်သ၀ီအပူၤတၢ်ဒုးစးထီၣ်ကဲထီၣ်တ့ၢ်လၢလါယူၤ(၂)သီအနံၤဒီးတုၤခဲအံၤအတီၢ်ပူၤန့ၣ် သုးကီၣ်ကးအသုးကဘီယူၤလၢဟဲခးစၢၤတၢ်လၢကလံၤကျါအံၤ ကမျၢၢ်တၢ်ထူၣ်ဖျဲးသုးမုၢ်ဒိၣ်(PLA), ဒီကလုၥ်ဃူးဖိပဒိၣ်(NUG) တၢ်ဒီသၢဒကိတိၥ်၀ဲၤကျိၤ(MOD) အစုတီၤဖီလၥ် သုးတဖၣ်ခးလီၤတဲၥ်ကွံၥ်၀ဲန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံတၢ်ပၢၢ်ဆၢသုးတဖၣ်ခးလီၤတဲၥ်ကွံၥ်၀ဲအသုးကီၣ်ကးဟဲၣ်လံၣ်ခီးပတၢၣ်(၇)ခိၣ်ဒီးကဘီယူၤ(၄)ခိၣ်အဃိသုးကီၣ်ကးသုးဂ့ၢ်၀ီဟဲၣ်လံၣ်ခီးပတၢၣ်ဒီးကဘီယူၤ(၁၁)ခိၣ် ဘၣ်ဟးဂီၤကွံၥ်၀ဲအသိး တၢ်မ့ၢ်ဒွးဃုၥ်ဒီးဟဲၣ်လံၣ်ခီးပတၢၣ်(၁)ခိၣ်လၢအလီၤတဲၥ် ဖဲမ့းထံၣ်လၣ်ရှါတဲအပူၤန့ၣ် အိၣ်ထီၣ်တုၤ(၁၂)ခိၣ်လံန့ၣ်လီၤ.
တၢ်မ့ၢ်ကွၢ်က့ၤတၢ်ပၢၢ်ဆၢသုးတဖၣ်ခးလီၤတဲၥ်ကဘီယူၤတၢ်အိၣ်သးတခီကခၠ့ၣ်တၢ်ထူၣ်ဖျဲးသုးမုၢ်ဒိၣ်(KIA)ခးလီၤတဲၥ်ကွံၥ်အအါကတၢၢ်လီၤဒီး ခးလီၤတဲၥ်ကွံၥ်၀ဲ ဟဲၣ်လံၣ်ခီးပတၢၣ်(၄)ခိၣ်ဒီး ကဘီယူၤဒုးသုး(၁)ခိၣ်န့ၣ်လီၤ.
ဒ်န့ၣ်အသိး ကလုၥ်ဒူၣ်တၢ်ပၢၢ်ဆၢကရၢတဖၣ်ဒ်အမ့ၢ် ကရ့ၣ်နံၣ်တၢ်ပၢၢ်ဆၢသုးပၥ်ဖှိၣ်တဖၣ် ခးလီၤတဲၥ်ကွံၥ်၀ဲကဘီယူၤဒုးသုး(၁)ခိၣ်ဒီးကဘီယူၤ(၂)ခိၣ်အသိး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), ခီၣ်ဘရၣ်သုးကျိၤစ့ၢ်ကီး ခးလီၤတဲၥ်ကွံၥ်၀ဲ ကဘီယူၤ(၁)ခိၣ်န့ၣ်လီၤ.
NUG MODအစုတီၤဖီလၥ် ကမျၢၢ်တၢ်ဒီသဒၢသုး(PDF)သုးပၥ်ဖှိၣ်တဖၣ်စ့ၢ်ကီး ဖဲ၂၀၂၃နံၣ်, လါဖ့ၤဘြူၤအါရံၤအတီၢ်ပူၤန့ၣ် ခးလီၤတဲၥ်ကဘီယူၤ(၁)ခိၣ်ဃုၥ်ဒီးတုၤလၢခဲအံၤအတီၢ်ပူၤန့ၣ် Mi-17ကဘီယူၤ(၄)ခိၣ်, Eurocopter AS 365 Dauphin(၁)ခိၣ်, Mi-35ကဘီယူၤဒုးသုး(၁)ခိၣ်, FTC 2000 Gကဘီယူၤ(၁)ခိၣ်, K-8W ကဘီယူၤဒုးသုး(၂)ခိၣ်ဒီး မဟါအနံၤ အညၣ်တၢ်ပၢၢ်ဆၢသုးခးလီၤတဲၥ်ကွံၥ်ကဘီယူၤ(၁)ခိၣ်အဃိ ခဲလၥ်ပၥ်ဖှိၣ်အိၣ်ထီၣ်၀ဲ(၁၁)ခိၣ်လံန့ၣ်လီၤ.
ဟီၣ်ခိၣ်မဲၥ်ဖံးခိၣ်အပူၤ သုးကီၣ်ကးအသုးလၢတမၤနၢၤတၢ်ဒုးအံၤ မၤအါထီၣ်ကလံၤကျါတၢ်ဒုးတဖၣ်အဆၢကတီၢ် တၢ်ပၢၢ်ဆၢသုးတဖၣ်တပၤတခီ သူ၀ဲ(၀.၅)ကျိဖးဒိၣ်တဖၣ်၀ံၤ ဂုၥ်ကျဲးစၢးခးလီၤတဲၥ် သုးကီၣ်ကးကဘီယူၤတဖၣ်န့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ(၄)နံၣ်ဘျဲၣ်အတီၢ်ပူၤ ခီဖျိသုးကီၣ်ကးအသုး မၤကလံၤကျါဒုးယၤရဲၣ်ကျဲၤတဖၣ်အဃိ ထံကီၢ်ဒီတဘ့ၣ်အပူၤ ထံဖိကီၢ်ဖိကမျၢၢ် ဘၣ်သံ၀ဲ(၂၃၃၉)ဂၤအသိး တၢ်ပၢၢ်ဆၢသုးသိၣ်ဒူ (၃၈၉)ဂၤစ့ၢ်ကီး ဘၣ်သံတ့ၢ်၀ဲအဂ့ၢ် Myanmar Peace Monitorအတၢ်မၤနီၣ်ထၢဖှိၣ်အဖီခိၣ် တၢ်သ့ၣ်ညါဘၣ်န့ၣ်လီၤ.
