လါယူၤ(၁၀)သီ,၂၀၂၅နံၣ်
အ့ၣ်ယၣ်၀တံၣ်ကီၢ်ခီ, အ့ၣ်ကပူၣ်ကီၢ်ဆၣ်, ကွ့ကီး၀့ၢ်အကပၤ ဒူသ၀ီတဖၣ်အပူၤ သုးကီၣ်ကးအသုး မၤဃံးထီၣ်တၢ်သမံသမိးတဖၣ်အဂ့ၢ်တၢ်သ့ၣ်ညါဘၣ်န့ၣ်လီၤ.
စးထီၣ်လၢလါယူၤ တၢတနွံအတီၢ်ပူၤန့ၣ် သုးကီၣ်ကးအသုးမၤတၢ်ရှဲပျီဟီၣ်က၀ီၤတဖၣ် ဖဲအ့ၣ်ကပူၣ်ကီၢ်ဆၣ်ဒီးလ့မၠဲးနၣ်ကီၢ်ဆၣ်အဆၢ ပ့နဲကွ့, ကၣ်ကွ့,လ့လိပ့ၣ်, ကွ့လး,သပၠ့ၣ်ကိသ၀ီတဖၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
“ပသံၣ်မိၣ်ယွၣ်ကျဲမုၢ်အဖီခိၣ်သ၀ီတဖၣ်အပူၤတနွံန့ၣ်သၢသီဃၣ်ဃၣ်ဟဲလီၤ၀ဲဒ်သုးကျိၤ၀ံၤနုၥ်လီၤမၤတၢ်သမံသမိးတဖၣ်လီၤ. အ့ၣ်ကပူၣ်ဒီးလ့မၠဲးနၣ်အဆၢန့ၣ် တၢ်ဒုးတဖၣ်ကဲထီၣ်တဘျီဘျီ အိၣ်ဘှံးတဘျီဘျီန့ၣ်လီၤ. ၀့ၢ်ပူၤဒၣ်လဲၣ် တၢ်နၢ်ဟူဘၣ်၀ဲ ကျိပိၢ်အကလုၥ်တဖၣ်လီၤ. အခဲအံၤစှၤသီအတီၢ်ပူၤန့ၣ် သုးကီၣ်ကးအသုးတဖၣ် မၤတၢ်သမံသမိးဃံးဒိၣ်မးအဂ့ၢ်” ကွ့ကီးလီၢ်က၀ီၤဖိတဂၤ စံး၀ဲန့ၣ်လီၤ.
တကးဘၣ် သုးကီၣ်ကးအသုးန့ၣ် ဟဲဆီလီၤဃၥ်ကၣ်က့သုးကလၢၤတဖၣ်ဖဲ အ့ၣ်ကပူၣ်, ကွ့ကီး, မဲၢ်စလံၣ်ကိ, အိရှ့းကိ, ထူကၠံသ၀ီတဖၣ်အပူၤအဂ့ၢ် တၢ်သ့ၣ်ညါဘၣ်လၢ ဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ.
သုးမုၢ်ဒိၣ်ပတီၢ်ထီတၢ်သိၣ်လိကၠိ တတက(၅)အကပၤစ့ၢ်ကီး သုးဂ့ၢ်၀ီတၢ်ဟူးတၢ်ဂဲၤတဖၣ်ဟဲအိၣ်ထီၣ်အဃိ သုးကီၣ်ကးအသုးအံၤန့ၣ် လဲၤနုၥ်လီၤသမံသမိးတၢ်ဖဲဒူသ၀ီလၢအဘူးဒီးဖဲန့ၣ်တဖၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
ကွ့ကီးတတက(၅)အကပၤစ့ၢ်ကီးမၤအါထီၣ်ဃၥ်သုးအဂံၢ်အဘါတဖၣ်၀ံၤကိးန့ၢ်ဆူၣ်ပှၤသးစၢ်တဖၣ်ဒီးဟ့ၣ်၀ဲသုးတၢ်သိၣ်လိတဖၣ်၀ံၤ မၢခိးတၢ်ဘံၣ်တၢ်ဘၢအဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါလ့မၠဲးနၣ်ကီၢ်ဆၣ်,ပ့နဲကွ့သ၀ီအကပၤစ့ၢ်ကီးသုးကီၣ်ကးအသုးဟဲဆီလီၤဃၥ်အသုးအဂံၢ်အဘါ(၅၀)ဃၣ်ဃၣ်ဒီးသူၣ်ထီၣ်၀ဲကျိဖးဒိၣ်သုးကလၢၤတဖၣ်၀ံၤ အ့ၣ်ကပူၣ်ကီၢ်ဆၣ် မဲစလံၣ်ကိ၀့ၢ်အံၤန့ၣ် ကတီၤဃၥ်၀ဲဒ် တၢ်ခီၣ်ဆၢဒုးတၢ်အဂီၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
