လါယူၤ(၆)သီ,၂၀၂၅နံၣ်
ဖဲလါယူၤ(၅)သီအနံၤ တၫ်မၤ၀ဲ(၁၁၃)၀ီတ၀ီ ဟီၣ်ခိၣ်ဒီတဘ့ၣ်ပှၤမၤတၫ်ဖိတၫ်အိၣ်ဖှိၣ်(ILC)အပူၤ သုးကီၣ်ကးန့ၣ် တၫ်ကဟံးန့ၫ်အီၤဂ့ၫ်၀ီခီဖျိ ထံဂုၤကီၫ်ဂၤပှၤမၤတၫ်ဖိကရၢခိၣ်ကျၢၫ်(ILO)ပာ်လီၤ တၫ်ဘျၢအဆၢဒိၣ်(၃၃)အဂီၫ်န့ၣ် တၫ်ထီဒါတအိၣ်ဘၣ်အဃိ တၫ်ပာ်ဂၢၫ်ပာ်ကျၢၤဆၢတဲာ်လီၤ၀ဲန့ၣ်လီၤ.
ကီၫ်ပယီၤန့ၣ် မ့ၫ်ILOကရၢထံကီၫ်အဃိ ILOအတၫ်ဆၢတဲာ်တဖၣ်န့ၣ် လိၣ်လၢကဘၣ်ဒိကနၣ်လူၤပိာ်မၤထွဲ၀ဲ၀ံၤ မ့ၫ်တဒိကနၣ်၀ဲဘၣ်န့ၣ် တၫ်ဘျၢအဆၢဒိၣ်(၃၃)အဖီခိၣ် တၫ်ဟံးန့ၫ်အီၤဂ့ၫ်၀ီသ့န့ၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤအလီၫ်ခံ ပှၤမၤတၫ်ဖိခွဲးယာ်တဖၣ်တၫ်မၤကမၣ်၀ဲတကတီၫ်ဃီ ကမျၢၫ်တၫ်ဘၣ်ကဲသုးတၫ်ဘျၢအဃိ ပှၤလၢပာ်ဃုာ်လၢတၫ်ပာ်ပနီၣ်တဖၣ် သုးကီၣ်ကးတြီဃာ်လၢကလဲၤမၤတၫ်လၢထံဂုၤကီၫ်ဂၤအသိး,ထံကီၫ်ပူၤ မၢတၫ်ကဲန့ၫ်ဆူၣ်သုး,ကရၢကရိဒုးအိၣ်ထီၣ်ပှၤမၤတၫ်ဖိကရၢ,ဖီၣ်တၫ်တဖၣ်အဃိ သုးကီၣ်ကးန့ၣ် ILO တၫ်ဘျၢအဆၢဒိၣ်(၃၃)အဖီခိၣ်တၫ်ကဟံးန့ၫ်အီၤဂ့ၫ်၀ီအဂီၫ် ကမျၢၫ်တၫ်ကရၢကရိတဖၣ် ဃ့ထီၣ်၀ဲန့ၣ်လီၤ.
တၫ်ကဟံးန့ၫ်သုးကီၣ်ကးဂ့ၫ်၀ီအဂီၫ် အပူၤကွံာ် ၂၀၂၄နံၣ်,လါနိၣ်၀့ဘၢၣ်(၆)သီနံၤ လၢကီၫ်စွ့ၣ်စလၣ်,၀့ၫ်ကၠၤနံၣ်ဘၣ် တၫ်မၤ၀ဲ (၃၅၂)၀ီတ၀ီ ILOပၢဆှၢတၫ်ကမံးတံာ်တၫ်အိၣ်ဖှိၣ်အပူၤ တၫ်ပာ်ဂၢၫ်ပာ်ကျၢၤ၀ဲ၀ံၤအလီၫ်ခံ ၂၀၂၅နံၣ်,လါယူၤ (၅)သီနံၤ တၫ်မၤ၀ဲ ILO တၫ်အိၣ်ဖှိၣ်အပူၤ တၫ်ကဟံးန့ၫ်ဂ့ၫ်၀ီအဂီၫ် ပှၤထီဒါတအိၣ်ဘၣ်အမဲာ်ညါ လၢဃူဃူဖိးဖိးအပူၤ ဆၢတဲာ်လီၤ၀ဲန့ၣ်လီၤ.
တၫ်မ့ၫ်ဟံးန့ၫ်အီၤလၢILOတၫ်ဘျၢအဆၢဒိၣ်(၃၃)န့ၣ် ပတီၫ်ထီတၫ်သ့တၫ်ဘၣ်လၢဘီမုၫ်စၢဖှိၣ်ကရၢ၀ဲၤကျိၤ အတၫ်ဆီၣ် ထွဲမၤစၢၤတဖၣ်,ပှၤတ၀ၢတၫ်ဆီၣ်ထွဲမၤစၢၤတဖၣ်,မီၫ်သီမီၫ်လါတၫ်ရ့လိာ်တဖၣ်ကပတုာ်ကွံာ်၀ဲ၀ံၤ သုးကီၣ်ကးန့ၣ် တၫ် ပာ်ပနီၣ်အီၤဒ်ပှၤမၤအၢမၤသီတၫ်ကရၢ,ပှၤလၢမၤကမၣ်တၫ်တဖၣ် တၫ်တီၣ်ထီၣ်ဟံးန့ၫ်အီၤဂ့ၫ်၀ီဆူ ထံဂုၤကီၫ်ဂၤသဲစး ၀ဲၤဒၢးတဖၣ်သ့အဂ့ၫ် ဒီကလုာ်ဃူဖိးပဒိၣ်(NUG)ပှၤဂ့ၫ်၀ီခွဲးယာ်ကိတိာ် အူအီၣ်မၠိမ့စ့ၫ်ကီး လၢအပူၤကွံာ် ၂၀၂၄နံၣ်, လါနိၣ်၀့ဘၢၣ်အပူၤန့ၣ်ကွဲးဖျါဃာ်၀ဲ လၢအပှၤတ၀ၢလံာ်ကဘျံးပၤပူၤန့ၣ်လီၤ.
တၫ်မ့ၫ်ဟံးန့ၫ်အီၤဂ့ၫ်၀ီလၢILOတၫ်ဘျၢအဆၢဒိၣ်(၃၃)လံန့ၣ်ဒီး ကီၫ်ပယီၤပူၤ ထံဂုၤကီၫ်ဂၤတၫ်မၤကစၫ်လၢဟဲဘျၢလီၤ တၫ်တဖၣ်န့ၣ်ဟးထီၣ်ကဒါက့ၤသ့အသိး ထံဂုၤကီၫ်ဂၤတၫ်မၤကစၫ်အသီတဖၣ်စ့ၫ်ကီးကဟဲနုာ်လီၤဘျၢလီၤမၤတၫ်အဂီၫ် ကီခဲ၀ဲသ့န့ၣ်လီၤ.ဒ်န့ၣ်အသိး တၫ်တီၣ်သွီပနံာ်ဆူထံဂုၤကီၫ်ဂၤပတုာ်ကွံာ်သ့အသိး,သုးကီၣ်ကးအဂီၫ် ကျိာ်စ့ဒီးမီၫ်သီမီၫ် လါတကပၤစ့ၫ်ကီး တၫ်ဘၣ်ဒိဘၣ်ထံးအိၣ်ထီၣ်သ့အဂ့ၫ် တၫ်သ့ၣ်ညါဘၣ်လီၤ.
အခဲအံၤတဘျီ တၫ်ဟံးန့ၫ်ကီၫ်ပယီၤဂ့ၫ်၀ီလၢILOတၫ်ဘျၢအဆၢဒိၣ်(၃၃)န့ၣ် မ့ၫ်(၂)၀ီတ၀ီ၀ံၤ အပူၤကွံာ် ၂၀၀၀နံၣ်န့ၣ် မ့ၫ်တၫ်အဆိကတၢၫ်တဘျီလၢတၫ်ဟံးန့ၫ်အီၤဂ့ၫ်၀ီခီဖျိလၢILOတၫ်ဘျၢအဆၢဒိၣ်၃၃န့ၣ်လီၤ.ဟီၣ်ခိၣ်ချၢထံကီၫ်လၢတၫ်ဟံးန့ၫ်အီၤဂ့ၫ်၀ီလၢILOတၫ်ဘျၢအဆၢဒိၣ်၃၃န့ၣ် အိၣ်ဒၣ်ကီၫ်ပယီၤဒီးဖဲ၂၀၂၄နံၣ်အပူၤ ကီၫ်ဘဲလရူး ထံကီၫ်ခံဘ့ၣ်ဒံး န့ၣ်လီၤ.
