လါယူၤ(၆)သီ,၂၀၂၅နံၣ်
သ့ၣ်ဘီဘိသုးကလၢၤလၢအိၣ်ဖဲကၠီၣ်တဲၣ်-ပယီၤကီၫ်ဆၢ တၫ်ထီၣ်ဒုးမၤန့ၫ်၀ဲအကတီၫ် တၫ်မၤန့ၫ်၀ဲကျိချံပှာ်သၣ်အါအါဂီၫ်ဂီၫ်လၢ ဟီၣ်လာ်တၫ်ပာ်ကီၤတၫ်စုက၀ဲၤအလီၫ်အဂ့ၫ် ခိၣ်ဘရၣ်သုးကျိၤ,သုးကျိၤနီၫ်ဂံၫ်(၁)သုးကျိၤခိၣ် သုးခိၣ်ဂီၫ်ဂ့ၫ်စီၤကီၫ် ပာ်ဖျါထီၣ်၀ဲလၢပှၤတ၀ၢပှာ်ဘျးစဲအပူၤန့ၣ်လီၤ.
KNLAတီခိၣ်ရိၣ်မဲသုးပာ်ဖှိၣ်တဖၣ်န့ၣ် ထီၣ်ဒုးမၤန့ၫ် သ့ၣ်ဘီဘိသုးကလၢၤ ဖဲလါယူၤ(၃)သီနံၤ၀ံၤဖဲတနံၤဃီဟါအကတီၫ်န့ၣ် ခိၣ်ဘရၣ်သုးကျိၤဒုးယၤခိၣ် သုးခိၣ်ဂီၫ်ဂ့ၫ်ဒးဘီဒီအပှၤတဖၣ် ကွၫ်သမံသမိး၀ဲ သ့ၣ်ဘီဘိသုးကလၢၤ ဟီၣ်လာ်တၫ်ပာ်ကီၤတၫ်စုက၀ဲၤအလီၫ်န့ၣ်လီၤ.
ဖဲ(၂)မံးနံးဘျဲၣ်တၫ်ဂီၤမူအပူၤ သုးခိၣ်ဂီၫ်ဂ့ၫ်ဒးဘီန့ၣ် ကၤဃာ်မုၫ်နၤဆ့ကၤ၀ံၤ နုာ်လီၤကွၫ်၀ဲဟီၣ်လာ်တၫ်ပာ်ကီၤတၫ်စုက၀ဲၤအလီၫ်ဒီးသုးဖိတဖၣ်အကတီၫ် ထံၣ်၀ဲကျိချံပှာ်သၣ်အါအါဂီၫ်ဂီၫ်န့ၣ်လီၤ.
“တၫ်အဃိ ပှၤတဖၣ်အံၤ ခးပှၤကျၢၤသူၣ်ကျၢၤသးအဂ့ၫ်”သုးခိၣ်ဂီၫ်ဂ့ၫ်ဒးဘီတဲ၀ဲလီၤ. တၫ်ပာ်ကီၤအလီၫ်ပူၤ ၆၀မမကျိချံ,၈၁ကျိချံတဖၣ်,RPGကျိချံတဖၣ်ပာ်ဃုာ် ကျိချံပှာ်သၣ်တဖၣ်,မ့ၣ်ပိၫ်တဖၣ်ဒီး ကျိချံ အကလုာ်ကလုာ်တဖၣ် တၫ်ထံၣ်ဘၣ်၀ဲလီၤ.
“ဘၣ်လူၤဃုညါတၫ်ပာ်ကီၤတၫ်စုက၀ဲၤအလီၫ်.ပှၤတဖၣ်အံၤ အကျိချံတဖၣ်သူ၀ဲတလၢာ်,ခး၀ဲတလၢာ်ဘၣ်.ကထံၣ် ဘၣ်၀ဲ.ပှၤတဖၣ်အံၤ ပက့ၤမၤကဒါက့ၤအီၤလၢတၫ်လီၫ်အဂၤတတီၤသ့လီၤအဂ့ၫ်” ခိၣ်ဘရၣ်သုးကျိၤ,သုးကျိၤ(၁) သုးကျိၤခိၣ်တဲ၀ဲလီၤ.
လၢ၁၉၉၇နံၣ်လံၤလံၤ သ့ၣ်ဘီဘိသုးကလၢၤလၢသုးကီၣ်ကးသုတဖၣ်နုာ်လီၤဆီလီၤဃာ်အသးအံၤ KNUသုးက့နီၫ်ဂံၫ် (၆)တီခိၣ်ရိၣ်မဲKNLA/KNDO/PDFသုးပာ်ဖှိၣ် ထီၣ်ဒုးမၤန့ၫ်၀ဲ ဖဲလါယူၤ(၃)သီအနံၤန့ၣ်လီၤ. သုးကီၣ်ကးတကပၤသံ(၃၀)ဂၤဒီးပာ်လီၤတၫ်စုက၀ဲၤ(၇၀)ဂၤအဂ့ၫ် KNUဂ့ၫ်ခီၣ်ထံးတၫ်ကစီၣ်တဂၤတဲ၀ဲလီၤ.
KNUသုးပာ်ဖှိၣ်န့ၣ် ဖဲလါမ့ၤ(၂၃)သီနံၤထီၣ်ဒုးမၤန့ၫ်ဘျၢၣ်ဒိၣ်သုးကလၢၤဒီးဖဲလါမ့ၤ(၂၈)သီနံၤတၫ်ထီၣ်ဒုးမၤန့ၫ် ကနဲလ့ သုးကလၢၤတဖၣ်အပူၤစ့ၫ်ကီး မၤန့ၫ်တၫ်စုက၀ဲၤအါအါဂီၫ်ဂီၫ်န့ၣ်လီၤ.
