လါယူၤ(၃)သီ,၂၀၂၅နံၣ်
မူခိၣ်စူၤဒိၣ်ဒိၣ်မုၢ်မုၢ်အဃိ အ့ၣ်ယၣ်၀တံၣ်ကျိထံဒိၣ်ထီၣ်ဃုၥ်ဒီးမၠ့းကၠံၣ်နါ၀့ၢ် ဟီၣ်ခိၣ်လီၤဘံးက၀ီၤဒ့တဖၣ်အပူၤ ထံနုၥ်လီၤ၀ဲအဃိ လီၢ်က၀ီၤတဖၣ်အံၤ တၢ်ဘၣ်သုးလီၢ်သုးကျဲန့ၢ်အီၤဒီးတၢ်ဘၣ်သူၣ်ထီၣ်န့ၢ်အီၤ တၢ်မၤပူၤဖျဲးအလီၢ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ကမျၢၢ်ဖိလၢအဘၣ်ကွၢ်ဆၢၣ်မဲၥ်ထံတၢ်တတဲၥ်တနါတဖၣ်အဂီၢ် က၀ီၤဒ့တဘ့ၣ်စုၥ်စုၥ်အပူၤ တၢ်အိးထီၣ်န့ၢ်ဃၥ်၀ဲတစိၢ်တလီၢ်တၢ်မၤပူၤဖျဲးအလီၢ်တဖၣ်၀ံၤ သူၣ်ခ့သးပှၢ်လၢအအိၣ်ကးတံၥ်သးလၢဟံၣ်အပူၤတဖၣ်စ့ၢ်ကီးပှၤတ၀ၢတၢ်မၤစၢၤကရၢတဖၣ် မၤပူၤဖျဲးထီၣ်န့ၢ်၀ဲအဂ့ၢ် စံး၀ဲန့ၣ်လီၤ.
အ့ၣ်ယၣ်၀တံၣ်ကျိအစိးခံလီၢ်က၀ီၤတဖၣ်အပူၤ စးထီၣ်ဖဲလါမ့ၤ(၂၄)သီအနံၤန့ၣ် မူခိၣ်စူၤဒိၣ်ဒိၣ်မုၢ်မုၢ်၀ံၤ ထံကျိထံဟဲဒိၣ်ထီၣ်ဒီး ထံလူၤဘၢတၢ်တဖၣ်ကဲထီၣ်၀ဲဒၣ်လၢ မၠ့းကၠံနါ၀့ၢ်အပူၤန့ၣ်လီၤ.
“တၢ်လီၢ်တနီၤလၢထံတနုၥ်လီၤဒံးဘၣ်တဖၣ်စ့ၢ်ကီး ကတီၤပၥ်အသးလံ. ထံန့ၣ်ဟဲဒိၣ်ထီၣ်ကယီကယီန့ၣ်လီၤ. ထံမ့ၢ်စးထီၣ်နုၥ်လီၤတဘျီဃီန့ၣ် အဲၣ်ဒိးလၢကသုးပၥ်အသးဆိလီၤ. ထံကျိထံတဖၣ်ဟဲဒိၣ်ထီၣ်သ့သနၥ်က့ တၢ်မၤပူၤဖျဲးတၢ်ဖံးတၢ်မၤတၢ်ပီးတၢ်လီတဖၣ်တခီ တလၢပှဲၤဘၣ်အဃိ တၢ်ဂ့ၢ်ကီအိၣ်ထီၣ်၀ဲန့ၣ်လီၤ. မၠ့းကၠံနါထံကျိတၢ်အိၣ်သးန့ၣ် ကတုၤလၢတၢ်လီၤဘၣ်ယိၣ်တၢ်ပနီၣ် ၁၂၀၀စ့ၣ်တံၣ်မံၣ်တၣ်အဂီၢ် အိၣ်တ့ၢ်ဒၣ်ထဲ ခံစုမုၢ်လီၤ”အဂ့ၢ် ပှၤလၢအမၤတၢ်မၤပူၤဖျဲးတၢ်ဖံးတၢ်မၤတဂၤ စံး၀ဲန့ၣ်လီၤ.
တၢ်မၤပူၤဖျဲးအလီၢ်တဖၣ်အံၤ တၢ်အိးထီၣ်ဃၥ်အီၤလၢ ကၠဲးပီၣ်ခၠၣ်က၀ီၤဒ့အပူၤ ရွ့ၣ်စူးပၣ်သီခါဖၠၣ်ဒီး အမက(တီၤခီၣ်ထံးကၠိ), လၢၢ်ကိက၀ီၤဒ့နီၣ်ဂံၢ်(၁)တီၤခီၣ်ထံးကၠိ, စံလိၣ် အထက(၁၂)ကၠိ, ရၣ်ပူၣ်က၀ီၤဒ့အပူၤ မၣ်ကမးသီခါဖၠၣ်, အထက(၁)ကၠိအဒ့, အီၣ်သးဒံးသီခါဖၠၣ်, ရွ့ၣ်ဘိၣ်သီခါဖၠၣ်, မၠိးသ့းကၠံက၀ီၤဒ့အပူၤ အီၣ်စ့ၣ်ယၣ်အီၣ် သီခါဖၠၣ်, မၠ့ၣ်မၠ့းက၀ီၤဒ့ မၠ့ၣ်မၠ့းသီခါဖၠၣ်တဖၣ်အပူၤန့ၣ်လီၤ.
ဘၣ်ဆၣ်ဒီး ဖဲလၢမုၢ်ဆါခီအဆၢကတီၢ်န့ၣ် မၠ့းကၠံနါ၀့ၢ်အပူၤ ထံကျိထံက့ၤလီၤကွံၥ် လွဲၢ်စုမုၢ်အဂ့ၢ် ကခၠ့ၣ်ကီၢ်စဲၣ်မူခိၣ်ကလံၤသီၣ်ဂီၤ၀ဲၤကျိၤ ထုးထီၣ်ပၥ်ဖျါဃၥ်၀ဲန့ၣ်လီၤ.
လၢန့ၣ်အမဲၥ်ညါ ကီၢ်ပယီၤထးခီဟီၣ်က၀ီၤတဖၣ်အပူၤ မူခိၣ်ကစူၤဒိၣ်အါ၀ံၤ ထံကျိထံတဖၣ် ဒိၣ်ထီၣ်တုၤလၢတၢ်လီၤဘၣ်ယိၣ်တၢ်ပနီၣ်အသိး မူခိၣ်ကစူၤဒံး၀ဲအဃိ အ့ၣ်ယၣ်၀တံၣ်ဒီးခၠ့တွ့ထံကျိလၥ်ခီတပၤ ဟီၣ်က၀ီၤတဖၣ်အပူၤ ထံဒိၣ်နိယွၤကဲထီၣ်သ့လၢသတူၢ်ကလၥ်အဂ့ၢ် မူခိၣ်ကလံၤသီၣ်ဂီၤပှၤကူၣ်သ့ကူၣ်ဘၣ်တဖၣ် ဟ့ၣ်ပလီၢ်ဃၥ်၀ဲန့ၣ်လီၤ.
