လါယူၤ(၂)သီ,၂၀၂၅နံၣ်
ဖဲတၫ်ကူၣ်လဲၫ်မၤကၤတၫ်ဆူအ့ၣ်ယၣ်၀တံၣ်ကီၫ်ခီပူၤအကတီၫ် သုးကီၣ်ကးန့ၣ် သမံသမိးမၤဃံး၀ဲ၀ံၤ တၫ်ပာ်ဖျါထီၣ် တၫ်တီၣ်သွီနုာ်ပနံာ်အခွဲးမ့တန့ၫ်န့ၣ် ဟံးန့ၫ်ကွံာ်၀ဲအဃိ ပနံာ်ကၤထီၣ်၀ဲအဂ့ၫ် တၫ်မၤကစၫ်ဒီးပှၤလီၫ်က၀ီၤဖိတဖၣ်တဲ၀ဲ လီၤ.
အ့ၣ်ယၣ်၀တံၣ်ကီၫ်ခီပှၤလီၫ်က၀ီၤဖိတဂၤတဲ၀ဲလၢ”ပနံာ်သိလ့ၣ်လၢဟဲက့ၤတီၣ်တၫ်ဖိတၫ်လံၤတဖၣ် တၫ်ဘၣ်ဒုးနဲၣ်အီၤ တၫ်တီၣ်သွီပနံာ်ခွဲး(လဲၣ်စ့ၣ်)တဖၣ်လီၤ.ပှၤလဲၤပှ့ၤ၀ဲလၢ၀့ၫ်တကူၣ်ကျးတဖၣ်လီၤ.မၢတၫ်ဒုးနဲၣ်လဲၣ်စ့ၣ်တဘျီ အိၣ်ဒၣ် တၫ်ဘၣ်ဒုးနဲၣ်အီၤပနံာ်လၢတၫ်ဟဲက့ၤပှ့ၤစရီတဖၣ်လီၤ.မၤ၀ဲဒ်သိးအံၤန့ၣ် တၫ်ပှ့ၤပနံာ်ကီအဃိ တၫ်ဖိတၫ်လံၤတဖၣ် ဘၣ်ကၤထီၣ်၀ဲအဂ့ၫ်”န့ၣ်လီၤ.
တၫ်မၤဃံးထီၣ်တၫ်တီၣ်သွီပနံာ်၀ံၤအလီၫ်ခံ လၢ၀့ၫ်ပသံၣ်ပူၤ ပနံာ်လၢပှၤအီၣ်၀ဲ,ကသံၣ်ကသီဒီးတၫ်ဖိတၫ်လံၤအဂၤ လၢပှၤသူ၀ဲတဖၣ် ဘၣ်ကၤထီၣ်၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
သုးကီၣ်ကးအစုတီၤဖီလာ်၀ဲၤကျိၤတဖၣ် ပာ်ဖှိၣ်ထီၣ်သး၀ံၤ ပနံာ်သိလ့ၣ်လၢအိၣ်ဘှံးလၢမုၫ်နၤ ဖဲ၀့ၫ်တကူၣ်-ပသံၣ် ကျဲမုၫ်ခိၣ်တၫ်လီၫ်အပူၤဒၣ်လဲၣ် လူၤသမံသမိး၀ဲအိၣ်အဂ့ၫ် ပနံာ်သိလ့ၣ်တၫ်မၤကစၫ်တဖၣ်တဲ၀ဲလီၤ.
၀့ၫ်ပသံၣ် ပှၤကူၣ်လဲၫ်မၤကၤတၫ်တဂၤတဲ၀ဲလၢ”ဖဲကီၫ်ခီအဆၢ ပၣ်တဲၣ်စ့ၫ်ကီးသမံသမိး၀ဲလီၤ.ဖဲဘိၣ်မၠးထိတိၤစ့ၫ်ကီး သမံသမိး၀ဲ.လၢ၀့ၫ်နုာ်လီၤတြဲၤစ့ၫ်ကီး တၫ်ဘၣ်အိၣ်ထီၣ်န့ၫ်အီၤတၫ်အခိၣ်ဒုးတဖၣ်လီၤ. ဃ့လံာ်တၫ်အုၣ်ကီၤတဖၣ်, ပာ်လီၤပနံာ်သမံသမိး၀ဲအိၣ်လီၤ.သိအီၣ်,စဲးသိမ့ၫ်ပာ်ဃုာ်န့ၣ်ဖီၣ်၀ဲလီၤ.စ့ဒုဘၣ်ဟ့ၣ်၀ဲလီၤအဂ့ၫ်”တဲ၀ဲလီၤ.
ဖဲလါမ့ၤ(၃)နွံတနွံအပူၤန့ၣ် ၀့ၫ်တကူၣ်-ပသံၣ်သိလ့ၣ်ကျဲမုၫ်ခိၣ်အပူၤ သိလ့ၣ်တီၣ်ပနံာ်(၂)ခိၣ် သုးကီၣ်ကးဖီၣ်ဃာ်၀ဲ၀ံၤ ပနံာ်တဖၣ်စ့ၫ်ကီးဟံးန့ၫ်ကွံာ်၀ဲအဂ့ၫ် တၫ်သ့ၣ်ညါဘၣ်လီၤ.
အ့ၣ်ယၣ်၀တံၣ်ကီၫ်ခီပူၤ တၫ်တီၣ်သွီပနံာ်တဖၣ် စးထီၣ်ဖဲလါမ့ၤ(၃)နွံတနွံအပူၤန့ၣ် သုးကီၣ်ကးအစုတီၤဖီလာ် ခိသွဲ၀ဲၤ ကျိၤ,တၫ်အီၣ်တၫ်အီဂ့ၫ်၀ီ,ပၢပြး၀ဲၤကျိၤ,သုးဒီးပၢၤကီၫ်တဖၣ် သမံသမိးအါထီၣ်၀ဲ၀ံၤ သုးကီၣ်ကးဒီးAAဒုးလိာ်သး တၫ် လီၫ်လၢအမ့ၫ် သၣ်ပီ,ယ့ၣ်ကၠံၣ်ဒီးအ့ကပူၣ်ကီၫ်ဆၣ်တဖၣ်အပူၤစ့ၫ်ကီး တၫ်တီၣ်သွီပနံာ်အါအါဂီၫ်ဂီၫ်န့ၣ် သုးကီၣ်ကး မၤဃံးထီၣ်၀ဲန့ၣ်လီၤ.
Ref:DVB
