လါယူၤ(၂)သီ,၂၀၂၅နံၣ်
သုးမီၤစိရိၤသုးကီၣ်ကးအသုး အကလံၤကျါတၢ်ဒုးတဖၣ်ပၣ်ဃုၥ်အတၢ်မၤသံမၤ၀ီတဖၣ်အဃိ လါမ့ၤ(၁)သီတုၤ(၃၀)သီအနံၤတလါအတီၢ်ပူၤပှၤ(၁၅၂)ဂၤဘၣ်သံ၀ဲအဂ့ၢ်တၢ်မၤစၢၤထံရူၢ်ကီၢ်သဲးပှၤလီၢ်ဃိၣ်ဖိကရၢ (AAPP) ထုးထီၣ်ပၥ်ဖျါဃၥ်၀ဲဖဲ လါမ့ၤ(၃၀)သီအနံၤန့ၣ်လီၤ.
သုးကီၣ်ကးအသုးအဃိပိၥ်မုၣ်(၈၆)ဂၤ,ပိၥ်ခွါ(၆၆)ဂၤခဲလၢၥ်ပၥ်ဖှိၣ်(၁၅၂)ဂၤဘၣ်သံ၀ဲအဂ့ၢ်,တၢ်ပၥ်ဂၢၢ်ပၥ်ကျၢၤ၀ဲန့ၢ်ဒီးအမံၤအသၣ်တဖၣ်၀ံၤဖဲလၢအကတီၢ်ပူၤလီၢ်က၀ီၤကမျၢၢ်(၁၀၀)ဂၤလၢအသံအမံၤစရီတဖၣ်တၢ်ကပၥ်ဂၢၢ်ပၥ်ကျၢၤအီၤကန့ၢ်အဂီၢ် ကမၤ၀ဲအဂ့ၢ် AAPPစံး၀ဲန့ၣ်လီၤ.
ပှၤသံ(၁၅၀)ဂၤဘျဲၣ်အပူၤဖိသၣ်ပိၥ်မုၣ်လၢသးနံၣ်အိၣ်သၢလါတဂၤပၣ်ဃုၥ်ဖိသၣ်လၢသးနံၣ်(၁၈)နံၣ်ဆူအဖီလၥ်(၅၁)ဂၤပၣ်ဃုၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ. တကးဒံးဘၣ် AAPPအလံၥ်ပၥ်ဖျါအပူၤ တၢ်ဂ့ၢ်တၢ်ကျိၤတဖၣ်အဖီခိၣ် ပှၤသံတဖၣ်အကျါပှၤအါဒၣ်တက့ၢ်န့ၣ် မ့ၢ်ပှၤလီၢ်က၀ီၤဖိတဖၣ်၀ံၤ(၇)ဂၤတခီ မ့ၢ်ပှၤဖီၣ်စုက၀ဲၤဖိတဖၣ်အဂ့ၢ် တၢ်ထံၣ်ဘၣ်၀ဲန့ၣ်လီၤ.
ပှၤသံတဖၣ်အံၤအါတက့ၢ်ဘၣ်သံ၀ဲ ခီဖျိလၢသုးကီၣ်ကးအသုး မၤကလံၤကျါတၢ်ဒုးတဖၣ်အဃိ၀ံၤ ခံဘျီတဘျီအအါကတၢၢ် ပှၤဘၣ်သံ၀ဲန့ၣ် ခီဖျိလၢခးကျိဖးဒိၣ်တဖၣ်အဃိအဂ့ၢ် ပၥ်ဖျါဃၥ်၀ဲန့ၣ်လီၤ.
“စကဲကီၢ်ခီအပူၤ ဘၣ်သံ၀ဲ(၆၈)ဂၤအဃိ ပှၤဘၣ်သံအအါကတၢၢ်လီၤဒီး မ့မ့ၢ်လၢပကိဒီးမကွ့ကီၢ်ခီတဖၣ်အပူၤတခီ သံ၀ဲ(၂၁)ဂၤစုၥ်စုၥ်အဃိ ဘၣ်သံ၀ဲခံဘျီတဘျီအအါကတၢၢ်လီၤအဂ့ၢ်” စံး၀ဲန့ၣ်လီၤ.
တကးဘၣ်လါမ့ၤတလါအတီၢ်ပူၤ သုးကီၣ်ကးအသုး ဖီၣ်န့ၢ်ဆူၣ်၀ဲ ပိၥ်မုၣ်(၅)ဂၤဒီး ပိၥ်ခွါ(၄)ဂၤလၢ ဘၣ်ထွဲဒီးတၢ်ပၢၢ်ဆၢထီဒါတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်မၤစၢၤထံရူၢ်ကီၢ်သဲးပှၤလီၤဃိၣ်ဖိကရၢ(AAPP) အလါယူၤ(၁)သီ, အလံၥ်ပၥ်ဖျါအပူၤ စးထီၣ်လၢ၂၀၂၁နံၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤဒီးတုၤ၂၀၂၅နံၣ်, လါမ့ၤ(၃၁)သီအနံၤအတီၢ်ပူၤ သုးကီၣ်ကးအသုးဒီးအပှၤမၤသကိးတၢ်ကရၢကရိတဖၣ်အဃိ ဖိသၣ်(၈၂၀)ဘျဲၣ်ပၣ်ဃုၥ် ကမျၢၢ်ထံဖိကီၢ်ဖိ(၆,၇၀၀)ဘျဲၣ် ဘၣ်သံ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
