လါယူၤ(၂)သီ,၂၀၂၅နံၣ်
ကီၫ်ပယီၤပူၤ ကလုာ်ဒူၣ်တၫ်ပၢၫ်ဆၢကရၢဖးဒိၣ်တဖုလၢအမ့ၫ် ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢန့ၣ် ကညီကီၫ်စဲၣ်ပူၤ ကၠီၣ်တဲၣ်-ပယီၤကီၫ်ဆၢဒီတကျိၤ သုးကီၣ်ကးအသုးကလၢၤတဖၣ်န့ၣ် ထီၣ်ဒုးမၤပျီကွံာ်၀ဲကွ့ၫ်ကွ့ၫ်န့ၣ်လီၤ.
လၢကတီၫ်အံၤ ကီၫ်ဆၢတၫ်ကူၣ်လဲၫ်မၤကၤ၀့ၫ်လၢအမ့ၫ် ၀့ၫ်ရၤမတံကလံၤထံးတကပၤ သုးကီၣ်ကးအကီၫ်ဆၢသုးကလၢၤ(၅)ဖျၢၣ်န့ၣ် သုးက့နီၫ်ဂံၫ်(၆)ကညီဒီကလုာ်တၫ်ထူၣ်ဖျဲးသုးမုၫ်ဒိၣ်တီခိၣ်ရိၣ်မဲသုးပာ်ဖှိၣ်တဖၣ် စးထီၣ်ထီၣ်ဒုး၀ဲ ဖဲလါမ့ၤ(၃)နွံတနွံအပူၤဒီးမၤန့ၫ်၀ဲန့ၣ်လီၤ.သုးကလၢၤတဖၣ်န့ၣ် မ့ၫ်ဘျၢၣ်ဒိၣ်,ကနဲလ့,၀ၣ်မံၤထၣ်,ဘးယ့းနီၣ်ဒီးမီာ်ခံသုးကလၢၤတဖၣ်န့ၣ်လီၤ.
သုးက့နီၫ်ဂံၫ်(၇)ဟီၣ်က၀ီၤပူၤ ၂၀၂၁နံၣ် သုးဟံးန့ၫ်ထံကီၫ်တၫ်စိတၫ်ကမီၤ၀ံၤ တၫ်ဒုးတအိၣ်ဒိၣ်ဒိၣ်မုာ်မုာ်ဘၣ်. ဘၣ် ဆၣ်သနာ်က့ ၂၀၂၄နံၣ်နံၣ်တ၀ာ်အပူၤတခီ လၢသုးက့နီၫ်ဂံၫ်(၇)အပူၤ တၫ်ဒုးစးထီၣ်ကဲထီၣ်၀ဲလီၤ.
ဖဲ၂၀၂၄နံၣ်,လါဒံၣ်စ့ဘၢၣ်(၁၇)သီအနံၤန့ၣ် မၤနၢၤပျီ၀ဲၤလီၫ်ခိၣ်သ့ၣ်လီၫ်လံၤလၢတၫ်ဘၣ်ပျၫ်ကွံာ်၀ဲယံာ်(၃၀)နံၣ်အံၤ သုးက့နီၫ်ဂံၫ်(၇)ထီၣ်ဒုးမၤန့ၫ်က့ၤ၀ဲလီၤ.
တနံၣ်အံၤအပူၤ သုးက့နီၫ်ဂံၫ်(၇)န့ၣ် ဖၣ်အၣ်ကီၫ်ရ့ၣ်,လူၫ်ပျဲၫ်ကီၫ်ဆၣ်,၀့ၫ်တၫ်ကြဲၫ်,တီနီၣ်ကစၢၫ်မုၫ်ထီၣ်တကပၤ ကၠီၣ်တဲၣ်ကီၫ်ဆၢဒီတကျိၤသုးကီၣ်ကးအသုးကလၢၤတဖၣ်လၢအမ့ၫ် ပူတူလူ,ချၢၣ်ဒ့,တခီးဘံၣ်ကွံ,မီဖါသူ, တၣ် လဲၣ်တၫ်တိာ်ကူၣ်ကျဲၤသုးကလၢၤဒီးမဲၫ်လးသုးကလၢၤတဖၣ်န့ၣ် ထီၣ်ဒုးမၤန့ၫ်က့ၤ၀ဲလီၤ.
ဖဲဟီၣ်က၀ီၤ၀ဲန့ၣ်အပူၤ အိၣ်တ့ၫ်ဒၣ် နီၫ်တယၫ်သုးကလၢၤတဖျၢၣ်လၢ သုးက့နီၫ်ဂံၫ်(၇)ကထီၣ်ဒုး၀ဲန့ၣ်လီၤ.
KNUန့ၣ် သုးက့နီၫ်ဂံၫ်(၇)ဟီၣ်က၀ီၤပူၤ သုးကီၣ်ကးအကီၫ်ဆၢသုးကလၢၤခဲလၢာ်ဃၣ်ဃၣ် ထီၣ်ဒုးမၤန့ၫ်၀ဲ၀ံၤအလီၫ်ခံ သုးက့နီၫ်ဂံၫ်(၆)ဟီၣ်က၀ီၤပူၤ သုးကီၣ်ကးအသုးကလၢၤတဖၣ် ထီၣ်ဒုး၀ဲတပယူာ်ဃီန့ၣ်လီၤ.
KNUအသုးဂ့ၫ်၀ီတၫ်ပညိၣ်န့ၣ် မ့ၫ်ဒ်သိးကဒုးဖျိးကွံာ် သုးကီၣ်ကးအသုးကလၢၤခဲလၢာ်လၢအိၣ်ဖဲဟီၣ်က၀ီၤပူၤအဂ့ၫ် KNUပှၤတဲတၫ်ပၢပဒိၣ်စီၤကျၢၤစ့တဲဃာ်၀ဲလီၤ.
