လါမ့ၤ(၂၉)သီ,၂၀၂၅နံၣ်
ခီဖျိဟီၣ်ခိၣ်ဟူး၀းတၢ်တတဲၥ်တနါကဲထီၣ်တ့ၢ်၀ဲအဃိပယီၤသုးမီၤစိရိၤသုးကီၣ်ကးအသုးလၢဘိးဘၣ်ရၤလီၤဃၥ်၀ဲလၢကမၤတၢ်ပတုၥ်တၢ်ခးအံၤပညိၣ်ဒုးထံဖိကီၢ်ဖိကမျၢၢ်,ဖိသၣ်လၢတၢ်ကမၣ်တအိၣ်လၢကလံၤကျါန့ၣ် မ့ၢ်တၢ်မၤကမၣ်သုးကွီၢ်မ့ၣ်အအဃိ ဆွံၣ်ဒ့ၣ်မီၢ်သီ၀ဲၤဒၢးလၢဘၣ်ထွဲကီၢ်ပယီၤတခီ ဘၣ်ယိၣ်၀ဲဒိၣ်မးအဂ့ၢ် ထုးထီၣ်ပၥ်ဖျါဃၥ်၀ဲဖဲလါမ့ၤ(၂၈)သီအနံၤန့ၣ်လီၤ.
လံၥ်ဘိးဘၣ်ရၤလီၤအပူၤသုးကီၣ်ကးအသုးလၢအဘိးဘၣ်ရၤလီၤဃၥ်ကမၤတၢ်ပတုၥ်တၢ်ခးအံၤမၤကမၣ်က့ၤ၀ဲအတၢ်အၢၣ်လီၤဒီးပညိၣ်ဒုးတၢ်သိၣ်လိကၠိတဖၣ်,တၢ်ဆါဟံၣ်တဖၣ်ဒီးတၢ်ဘူၣ်တၢ်ဘါတၢ်သူၣ်ထီၣ်တဖၣ်ပၣ်ဃုၥ် လီၢ်က၀ီၤကမျၢၢ်တဖၣ်လၢကလံၤကျါကိးမုၢ်နံၤအဃိ ဘၣ်ထွဲဒီးလံၥ်ပၥ်ဖျါအံၤအဖီခိၣ် ဆွံၣ်ဒ့ၣ်မီၢ်သီတခီ ဘၣ်ယိၣ်၀ဲဒိၣ်မးအဂ့ၢ် ပၥ်ဖျါဃၥ်၀ဲန့ၣ်လီၤ.
တကးဘၣ် ဆွံၣ်ဒ့ၣ်မီၢ်သီ၀ဲၤဒၢးတခီ ခီဖျိသုးကီၣ်ကးအသုး ပညိၣ်ဒုးလီၢ်က၀ီၤကမျၢၢ် မၤကလံၤကျါတၢ်ဒုးတဖၣ်လၢ စကဲ,မါတလ့,ပကိ,ရၢၢ်ခၢၣ်,ခၠီဒီးကီၢ်ပယီၤပူၤကီၢ်ခီဒီးကီၢ်စဲၣ်အဂၤတဖၣ်ပူၤအဃိတၢ်သံတၢ်ပှၢ်ဒီးတၢ်ဘၣ်ဒိဘၣ်ထံးတဖၣ်အိၣ်ထီၣ်၀ဲအဖီခိၣ် သးအုးဃုၥ်ဒီးအဟံၣ်ဖိဃီဖိတဖၣ်အဂ့ၢ် ပၥ်ဖျါဃၥ်၀ဲလၢအလံၥ်ပၥ်ဖျါအပူၤန့ၣ်လီၤ.
လၢန့ၣ်အမဲၥ်ညါ တၢ်ပညိၣ်ဒုး လီၢ်က၀ီၤကမျၢၢ်တဖၣ် လီၤဆီဒၣ်တၢ်ဖိသၣ်လၢတၢ်ကမၣ်တအိၣ်တဖၣ်အံၤ မ့ၢ်ဒၣ်တၢ်မၤကမၣ်သုးကွီၢ်မ့ၣ်၀ံၤမ့မ့ၢ်လၢဆွံၣ်ဒ့ၣ်မီၢ်သီ၀ဲၤဒၢးတခီဘၣ်ထွဲဒီးဟီၣ်ခိၣ်ဒီဘ့ၣ်ပှၤဟီၣ်ခိၣ်ဖိတၢ်ဒိသူၣ်ဒိသးဂ့ၢ်၀ီသဲးစးတၢ်ဘျၢတဖၣ်ဒီသဒၢန့ၢ်ဃၥ်၀ဲထီဘိတပယူၥ်ဃီအဃိကအိၣ်ဂဲၤဆၢထၢၣ်ဃုၥ်ဒီးကီၢ်ပယီၤထံဖိကီၢ်ဖိကမျၢၢ်တဖၣ်အဂ့ၢ် စံး၀ဲန့ၣ်လီၤ.
ကီၢ်ပယီၤအပူၤ ခီဖျိဟီၣ်ခိၣ်ဟူး၀းတၢ်တတဲၥ်တနါကဲထီၣ်တ့ၢ်၀ဲအဃိ ပယီၤသုးမီၤစိရိၤအသုးလၢ အဘိးဘၣ်ရၤလီၤဃၥ် တၢ်ပတုၥ်တၢ်ခးအံၤ စးထီၣ်လၢလါအ့ဖြ့ၣ်(၃)သီတုၤလါမ့ၤ(၁၃)သီအနံၤ အသီ(၄၀)အတီၢ်ပူၤ မၤကလံၤကျါတၢ်ဒုး အိၣ်ထီၣ်တုၤ(၁၈၁)ဘျီ၀ံၤ လီၢ်က၀ီၤကမျၢၢ် ဘၣ်သံ၀ဲ(၁၈၂)ဂၤအဂ့ၢ် ဒီကလုၥ်ဒံၣ်မိၣ်ကရ့ၣ်စံၣ်ကရၢ(NLD)ထုးထီၣ်ပၥ်ဖျါဃၥ်၀ဲလၢ လါမ့ၤ(၁၅)သီအနံၤန့ၣ်လီၤ.
စးထီၣ်လၢ၂၀၂၃နံၣ်တုၤ၂၀၂၅နံၣ်လါမ့ၤ(၁၂)သီအနံၤ,ခီဖျိသုးမီၤစိရိၤသုးကီၣ်ကးအသုးမၤကလံၤကျါတၢ်ဒုးတဖၣ်အဃိ လီၢ်က၀ီၤကမျၢၢ်ဘၣ်သံ၀ဲ(၃,၀၄၃)ဂၤအဂ့ၢ် ဒီကလုၥ်ဃူဖိးပဒိၣ်( NUG) ထုးထီၣ်ပၥ်ဖျါဃၥ်၀ဲဖဲ လါမ့ၤ(၁၆)သီအနံၤန့ၣ်လီၤ.
