လါမ့ၤ(၂၆)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၂), တီအူကီၢ်ရ့ၣ်, တီအူကီၢ်ဆၣ်အပူၤ တၢ်ဒုးတဖၣ်ကဲထီၣ်သးအဖၢမုၢ်ဒီး မဟါအနံၤလါမ့ၤ(၂၅)သီအနံၤ, ဂီၤအဆၢကတီၢ်န့ၣ် တၢ်ဒုးကဲထီၣ်၀ဲဒၣ်လၢ တၢ်လီၢ်လၢအိၣ်စီၣ်စုၥ်ယံၤဒီး ၀့ၢ်တကူၣ်-မါတလ့သိလ့ၣ်ကျဲမုၢ်လၢအချ့ တမံၤလၤဃၣ်ဃၣ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
ဖဲလါမ့ၤ(၂၃)သီအနံၤန့ၣ် တၢ်ဒုးစးထီၣ်ကဲထီၣ်၀ဲဒၣ်ဖဲ စပါကွှဲၢ်သ၀ီလၢအိၣ်စီၣ်စုၥ်ၣ်ဒီး သိ့လၣ်ကျဲမုၢ်လၢအချ့(၁၇၄)မံၤလၤလၢ ယံၤ(၆)မံၤလၤအကပၤ၀ံၤ ဖဲလါမ့ၤ(၂၅)သီအနံၤန့ၣ် သုးဂ့ၢ်၀ီတၢ်ဖ့ၣ်ဆၢလိၥ်သးတဖၣ်အိၣ်ထီၣ်အသိး ဖဲကၠဲးတဲးညီၣ်ပ့ၣ်သ၀ီလၢ အိၣ်စီၣ်စုၥ်ယံၤဒီး သိလ့ၣ်ကျဲမုၢ်အချ့ယံၤ(၁)မံၤလၤတၢ်လီၢ်ပူၤ စးထီၣ်လၢဂီၤအဆၢကတီၢ်န့ၣ် တၢ်ဒုးကဲထီၣ်၀ဲအဂ့ၢ်န့ၣ် ၀့ၢ်တီအူကမျၢၢ်ဖိတဂၤ စံး၀ဲန့ၣ်လီၤ.
“တၢ်ဒုးတဖၣ်ဟဲကဲထီၣ်သးဘူးထီၣ်ဒီးသိလ့ၣ်ကျဲအချ့န့ၣ်လီၤ. စးထီၣ်လၢဂီၤလံၤလံၤန့ၣ် တၢ်နၥ်ဟူဘၣ်၀ဲကျိပိၢ်အကလုၢ်တဖၣ်လီၤ.ကဘီယူၤစ့ၢ်ကီး ဟဲယူၤ၀့ၤ၀ီၤဒီတဂီၤလီၤ. ပှၤအိၣ်လၢဒူသ၀ီတပၤတဖၣ် ဟဲစံၣ်ထီၣ်လၢ၀့ၢ်ပူၤအိၣ်အါမးလီၤ”အဂ့ၢ် ၀့ၢ်တီအူကမျၢၢ်ဖိစံး၀ဲန့ၣ်လီၤ.
ဖဲလါမ့ၤ(၂၅)သီအနံၤ,ဂီၤအဆၢကတီၢ်န့ၣ် ကၠဲးတဲးညီၣ်ပ့ၣ်ဒူသ၀ီ ပှၤစံၣ်သုးပှၤလီၢ်အိၣ်ကမှံဖိတဖၣ် တၢ်လဲၤဆှၢအီၤဆူ တၢ်လီၢ်လၢအပူၤဖျဲးအပူၤအဂ့ၢ် Taungoo Rescue ဂ့ၢ်ဂီၤအူတၢ်မၤပူၤဖျဲးကရၢ ပၥ်ဖျါဃၥ်၀ဲတၢ်ကစီၣ်န့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုးအံၤ လဲၤတ့ၢ်လီၤမ့ၣ်ပိၢ်ဆူ စပါကွှဲၢ်သ၀ီလၢဟံၣ်ခိၣ်အိၣ်(၄၀၀)ဘျဲၣ်၀ံၤ ဒွဲၣ်အူမၤဟးဂီၤကွံၥ်ဟံၣ်ဃီတဖၣ်အဃိ လီၢ်က၀ီၤဖိတဖၣ်ဘၣ်ဃ့ၢ်ပူၤဖျဲးအသးန့ၣ်လီၤ.
လၢတၢ်န့ၣ်တဖၣ်အဃိ တီအူကီၢ်ဆၣ်အပူၤ စပါကွှဲၢ်သ၀ီ, ကၠဲးတဲးညီၣ်ပ့ၣ်သ၀ီချၢၣ်ညးကၠဲးယိပ့ၣ်သ၀ီ, တီပူးသ၀ီ, ဆံပ့ၣ်သ၀ီ, ငိမ့သ၀ီတဖၣ်အပူၤ လီၢ်က၀ီၤဖိတဖၣ် ဘၣ်ဃ့ၢ်ပူၤဖျဲးအသးအဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ ကတီၢ်ခဲအံၤန့ၣ် တီအူကီၢ်ဆၣ်ပူၤ တၢ်ဒုးတဖၣ်ဆူၣ်ထီၣ်အသိး လၢၢ်ဒိၣ်, ဆီထံး, နးတလ့, မ့လးကီၢ်ဆၣ်တဖၣ်အပူၤစ့ၢ်ကီး သုးဂ့ၢ်၀ီတၢ်ဖ့ၣ်ဆၢတဖၣ်အိၣ်ထီၣ်၀ဲ၀ံၤ သုးကီၣ်ကးတပၤ ခးလီၤကျိဖးဒိၣ်ဒီးမၤကလံၤကျါတၢ်ဒုးတဖၣ်အိၣ်ထီၣ်၀ဲ တပယူၥ်ဃီန့ၣ်လီၤ.
