လါမ့ၤ(၂၃)သီ,၂၀၂၅နံၣ်
ယိၤဒိၣ်ကီၫ်စဲၣ်အပူၤ,တၫ်ခူၣ်စၢၫ်ထးတၫ်ဖံးတၫ်မၤ ဖဲကၠီၣ်တဲၣ်-ပယီၤကီၫ်ဆၢဒီတကျိၤ နးခိးထံကျိဒီးမဲၣ်ဆဲထံကျိတဖၣ်အပူၤ ဘၣ်ထွဲဒီးတၫ်စူးကွံာ်တၫ်ပီးတၫ်လီလၢတၫ်တသူ၀ဲတဖၣ်အဖီခိၣ် ကၠီၣ်တဲၣ်ပဒိၣ်န့ၣ် ကတၢၣ်ပီၣ်တဲသကိးတၫ်ဒီး သုးကီၣ်ကးအဂ့ၫ် ကၠီၣ်တဲၣ်တၫ်ကစီၣ်သန့တဖၣ်ပာ်ဖျါ၀ဲလီၤ.
တၫ်ခူၣ်စၢၫ်ထးတၫ်ဖံးတၫ်မၤအပူၤ တၫ်ပီးတၫ်လီလၢမၤဘၣ်အၢဘၣ်သီခိၣ်ဃၢၤန့ဆၢၣ်တဖၣ်န့ၣ် မ့ၫ်လၢကီၫ်ပယီၤတကပၤ တရူးတၫ်ဖံးတၫ်မၤလၢတဖိးသဲစးတဖၣ်အဂ့ၫ် ကၠီၣ်တဲၣ်တကပၤတဲဃာ်၀ဲ၀ံၤ ကၠီၣ်တဲၣ်ကိတိာ်ခိၣ်ကျၢၫ်န့ၣ် ဟ့ၣ်လီၤ၀ဲမူဒါဆူ သုး,တၫ်ပၢဆှၢရဲၣ်ကျဲၤဟီၣ်လာ်တၫ်ထူးတၫ်တီၤဒီး ခိၣ်ဃၢၤန့ဆၢၣ်ကိတိာ်ဒီးထံဂုၤကီၫ်ဂၤကိတိာ်တဖၣ် လၢကတၢၣ်ပီၣ်တဲသကိးတၫ်ဒီးသုးကီၣ်ကးန့ၣ်လီၤ.
ယိၤဒိၣ်ပှၤဂ့ၫ်၀ီခွဲးယာ်တၫ်ကရၢကရိစ့ၫ်ကီး ၀းသုးမုၫ်ဒိၣ်(UWSA)တၫ်ပၢဆှၢဟီၣ်က၀ီၤအကပၤ ၀့ၫ်မဲဆးအပူၤ ဟီၣ်ခိၣ်ကၤစၢၫ်ပူၤတၫ်ဖံးတၫ်မၤတဖၣ်အိၣ်၀ဲ၀ံၤ မဲခး,မဲယီၣ် ဟီၣ်က၀ီၤပူၤ တၫ်ခူၣ်ထူတၫ်ဖံးတၫ်မၤတဖၣ်အပူၤ စူးကွံာ်တၫ်ဖိတၫ်လံၤတဖၣ်အဃိ နးခိးထံကျိဘၣ်အၢဘၣ်သီ၀ဲ၀ံၤ လၢထံကျိဒီတဘိ ခံကပၤပှၤလီၫ်က၀ီၤဖိတဖၣ် ကွၫ်ဆၢၣ်မဲာ်ဘၣ် ဆူၣ်ချ့တၫ်မၤပျံၤမၤဖုးတဖၣ်အဂ့ၫ် လၢအ၀ဲသ့ၣ်အလံာ်ပာ်ဖျါအပူၤတဲဃာ်၀ဲလီၤ.
“လံာ်ပာ်ဖျါအံၤ တၫ်ကဟ့ၣ်၀ဲဆူ သုးကီၣ်ကး,ကီၫ်ကၠီၣ်တဲၣ်ဒီးUWSA တၫ်ရဲၣ်တၫ်ကျဲၤတအိၣ်ဘၣ်.ဟီၣ်ခိၣ်ကၤစၢၫ်ပူၤန့ၣ် တၫ်ထံၣ်၀ဲခဲအံၤလီၤ.သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤအလီၫ်ခံမးဒီး တၫ်ခူၣ်ထူ,ခူၣ်လၢၫ်သွဲၣ်လးဒီးစၢၫ်ထးအဂၤတဖၣ်အါထီၣ်၀ဲလီၤ.လီၫ်က၀ီၤဖိတဖၣ်လဲၤ၀ဲတန့ၫ်ဘၣ်ဒီးထဲပှၤတရူးဖိတဖၣ်မၤ၀ဲအဂ့ၫ်”ယိၤဒိၣ်ပှၤဂ့ၫ်၀ီတၫ်ကရၢကရိပှၤတဲတၫ်ပၢ ယ့လယါဟၣ်တဲ၀ဲလီၤ.
ကၠီၣ်တဲၣ်အဆူၣ်ချ့ကိတိာ်၀ဲၤကျိၤဒီးတၫ်ပၢဆှၢရဲၣ်ကျဲၤတၫ်ဘၣ်အၢဘၣ်သီ၀ဲၤကျိၤတဖၣ်,ကံၫ်မဲဒီးခၠ့ရဲၣ်ဟီၣ်က၀ီၤပူၤ နးခိးဒီးမဲၣ်ဆဲၣ်ထံကျိဒီတဘိအပူၤ သမံသမိးကွၫ်၀ဲထံတဖၣ်၀ံၤ ထံၣ်၀ဲအၣ်ဆ့နံးတၫ်စုၣ်တၫ်ပျၫ်တဖၣ်အဂ့ၫ် တၫ်သ့ၣ် ညါဘၣ်လီၤ.
ဖဲထံကျိ၀ဲန့ၣ်ဒီတကျိၤအပူၤ တၫ်စူးကွံာ်၀ဲစၢၫ်တၫ်ဘၣ်အၢဘၣ်သီတဖၣ်အဃိ ထံၣ်၀ဲညၣ်လၢအဘ့ၣ်ခိၣ်တၫ်ဆါကဲထီၣ်အဂ့ၫ် လံာ်ပာ်ဖျါတဖၣ်ဟးထီၣ်၀ဲ၀ံၤ ရဲၣ်ကျဲၤ၀ဲလၢ ကဒုးအိၣ်ထီၣ်၀ဲထံတမၢၣ်လၢပှဲၫ်ထံဘၣ်အၢဘၣ်သီတဖၣ် အဂ့ၫ် ကၠီၣ်တဲၣ်ပဒိၣ်တဲ၀ဲလီၤ.
ဘၣ်ထွဲဒီးနးခိးထံကျိဘၣ်အၢဘၣ်သီအဖီခိၣ် အပူၤကွံာ် လါမ့ၤ(၁၄)သီအနံၤ(ဟီၣ်ခိၣ်ဒီတဘ့ၣ်ထံကျိထံကွာ်မုၫ်နံၤ)န့ၣ် ကံၫ်မဲဟီၣ်က၀ီၤပူၤ ကၠီၣ်တဲၣ်ထံဖိကီၫ်ဖိတဖၣ် ကွဲးလီၤဃာ်၀ဲ “No Dam,No Mining”လံာ်မဲာ်ဖျၢၣ်၀ံၤ ပာ်ဖျါထီၣ်တၫ် ပာ်သးအဂ့ၫ် တၫ်သ့ၣ်ညါဘၣ်လီၤ.
Ref: Thai PBS
