လါမ့ၤ(၂၃)သီ, ၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤ, ချၢၣ်လွံၢ်ထူၣ်ကီၢ်ရ့ၣ်, မူကီၢ်ဆၣ်အပူၤ ခီဖျိသုးကီၣ်ကးအသုးခးလီၤကျိဖးဒိၣ်ဆူဒူသ၀ီကမျၢၢ်ဖိတဖၣ်အဖီခိၣ်အဃိဖိသၣ်ပိၥ်ခွါလၢအသးအိၣ်(၉)နံၣ်(၁)ဂၤသံဝဲဒီး သးနံၣ်(၁၁)နံၣ်အိၣ်ပိၥ်မုၣ်(၂)ဂၤဒီး ကမျၢၢ် (၅)ဂၤဘၣ်ဒိ၀ဲဒီး ကမျၢၢ်ဟံၣ်(၃)ဖျၢၣ်ဘၣ်ဒိဝဲအဂ့ၢ် ခ့ၣ်အဲၣ်ယူၣ် – လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ဖဲလါမ့ၤ(၁၉)သီအနံၤန့ၣ် သုးကီၣ်ကးအသုး ခမရ-၃၅၁ ဒီး ခလရ – ၆၀ အသုးသ့ၣ်တဖၣ် ခးလီၤကျိၣ်ဖးဒိၣ် ဆူ ငထွ့ၤဆိၣ်သဝီပူၤအဃိ နီၢ်တၢ်ဒိၣ်ဂ့ၤဖီ(၁၁)နံၣ် ဘၣ်ဒိကျိဖးဒိၣ်၀ံၤ စီၤမူလီၤလး ဒီး စီၤမီၤဂ့ၤဟံၣ်(၂)ဖျၢၣ် ဘၣ်ဒိၣ်ဝဲ အဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲလါမ့ၤ(၂၀)သီအနံၤစ့ၢ်ကီး သုးကီၣ်ကးအသုးလၢဆီၤလီၤအသးလၢ မုၢ်ဃါပျီ(နၣ်သၤကွ့)အံၤ ခးလီၤကျိဖးဒိၣ်(၆)ဖျၢၣ်ဆူ ဒူသ၀ီတဖၣ်ဒ်အမ့ၢ် ငနွါးဆ့ၣ်သဝီ, အညၤစူၣ်သဝီ, ယ့တဲၣ်ကိသဝီ ဒီး နီၤကိသဝီတဖၣ်အပူၤဒီး ယ့ၤလဲသဝီ ဒီး မယါစ့ၤလ့သဝီ အဘၢၣ်စၢၤစံၥ်ပျီအပူၤ ဟီၤဝ့ၤစၤ(၁)ဖျၢၣ်, စလိၣ်သဝီ ဒီးစီၤဘီလူၢ်အပူၤ(၁)ဖျၢၣ်, တီၤဆူၣ်သဝီအပူၤ ကျိဖးဒိၣ်(၃)ဖျၢၣ် ခဲလၢပၥ်ဖှိၣ်(၁၁)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တကးဒံးဘၣ် သုးကီၣ်ကးအသုးလၢ ဆီၤလီၤအသး ဖဲအိၣ်ဖၠၣ်တိၤသ့ၣ်တဖၣ် ခးလီၤ ကျိဖးဒိၣ်(၁)ဖျၢၣ်ဆူ ကၠဲၣ်တဲၣ်ညီၤပ့ၤပူၤအဃိ သဝီဖိလၢအမ့ၢ် ဒီၤမးမး(၅၃)နံၣ်, ဒီး မးအ့စိ(၃၈)နံၣ် ဘၣ်ဒိ ကျိဖးဒိၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
လၢန့ၣ်အမဲၥ်ညါ သုးကီၣ်ကးအသုး ခလရ-၆၀ ခးလီၤကျိဖးဒိၣ် (၁၂၀)မမ ဆူ မယါစ့ၤလ့သဝီအပူၤ (၁) ဖျၢၣ်, မုၢ်ထီၣ်တီၤဆူၣ်သဝီ, မုၢ်နုၥ်တီၤဆူၣ်သဝီ ဒီး ကၠိကိသဝီအပူၤ ခးလီၤကျိဖးဒိၣ်(၁၂၀)မမ (၆)ဖျၢၣ်အဃိ သဝီဖိလၢအအိၣ်လၢ မယါစ့ၤလ့သဝီ အမံၤလၢ နီၢ်မူလါဖီအဟံၣ်ဟးဂီၤ ဒီး နီၢ်မူလါဖီ သးနံၣ်(၄၀)နံၣ် ဒီး အဖိမုၣ် နီၢ်စ့ပှဲၤမူ(၁၁)နံၣ် ဘၣ်ဒိ ဒီး နီၢ်မူလၣ်ဖီ အဖိခွါ စီၤမူထီၣ်ဘးအသးအိၣ်(၉)နံၣ် ဘၣ်ဒိသံဝဲလၢ ကျိဖးဒိၣ်အဃိအဂ့ၢ် တၢ်သ့ၣ်ညါဘၣ်န့ၣ်လီၤ.
