လါမ့ၤ(၁၄)သီ,၂၀၂၅နံၣ်
ခီဖျိ သုးမီၤစိရိၤသုးကီၣ်ကးအသုး မၤကလံၤတၢ်ဒုးတဖၣ်အဃိ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤ, ဆီထံးကီၢ်ဆၣ်ပူၤ ဒူသ၀ီ(၁၁)ဖျၢၣ်, ဟံၣ်ခိၣ်(၃၈၃)ဖျၢၣ် လီၢ်က၀ီၤကမျၢၢ်ဖိဘူးထီၣ်(၂)ကထိဃၣ်ဃၣ်(၁၇၁၂)ဂၤ ဘၣ်အိၣ်ဒီးတၢ်ပျံၤတၢ်ဖုးဒီး ဘၣ်သုးလီၢ်သုးကျဲအဃိ လိၣ်ဘၣ်ဝဲ တၢ်တိစၢၤမၤစၢၤတဖၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
၂၀၂၅နံၣ် လါမ့ၤ(၈)သီ ဂီၤ(၈း၀၀)နၣ်ရံၣ်ဘျဲၣ်တုၤဟါ(၄း၀၀)နၣ်ရံၣ်ဆၢကတီၢ် သုးမီၤစိရိၤသုးကီၣ်ကးအကဘီယူၤဒုးသုး ဟဲတ့ၢ်လီၤ မ့ၣ်ပိၢ်ပီၣ်(၅၀၀) (၁၆)ဘျီ အဖျၢၣ်(၃၀) ဒီး Y-12စ့ၢ်ကီးဟဲတ့ၢ်လီၤ၀ဲ မ့ၢ်ပိၢ် (၁၄၀)ဖျၢၣ်ဆူ ခ့ၣ်အဲၣ်ယူၣ်-ဆီထံးကီၢ်ဆၣ်ပူၤ ဒူသ၀ီတဖၣ်ဒ်အမ့ၢ် ညီၤခၠ့ၤတီး, စလိၣ်ကၠံ, ညီၤသၤယၤ, ဝ့ကး, လ့လါစိၤသ၀ီတဖၣ်အပူၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤ, ချၢၣ်လွံၢ်ထူၣ်ကီၢ်ရ့ၣ်, ဆီထံးကီၢ်ဆၣ်အပူၤ ခီဖျိသုးမီၤစိရိၤသုးကီၣ်ကးအသုး ကဘီယူၤဒုးသုးဟဲဒုးခးလီၤတၢ်ဆူ ဆီထံးကီၢ်ဆၣ်ပူၤအဃိ ကမျၢၢ်ဘၣ်ဒိ(၂)ဂၤ, ကမျၢၢ်အိၣ်ဟံၣ်ဃီ(၅)ဖျၢၣ်ဒီး တၢ်သိၣ်လိကၠိဘၣ်ဟးဂီၤကွံၥ်၀ဲ(၁)ဖျၢၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ဖဲ ၂၀၂၅ နံၣ် လါမ့ၤ (၁၁) သီ ဂီၤခီ(၇း၂၀)နၣ်ရံၣ်အဆၢကတီၢ် သုးကီၣ်ကးအသုး အကဘီယူၤဒုးသုး(Jet Fighter)လဲၤတ့ၢ်လီၤမ့ၢ်ပိၢ် ပီၣ်(၃၀၀) ဆူ ခ့ၣ်အဲၣ်ယူၣ်-ဆီထံးကီၢ်ဆၣ်, သဲးတူကိသဝီအပူၤ(၂)ဖျၢၣ်,သဝီ ဝဲကၠိၣ်နိၣ်(၁၈)ချံအပူၤ (၁)ဖျၢၣ် ခဲလၢၥ်ပၥ်ဖှိၣ်အိၣ်ဝဲ(၃)အဃိ လီၢ်က၀ီၤကမျၢၢ်ဖိတဖၣ်ဒ်အမ့ၢ် (၁)အူးအ့စိ(၂) အူခၠ့ၣ်စိ (၃) အူစ့ၣ်ညိၣ် (၄) မးစန့ၣ် (၅) မီၤထိသ့ ဟံၣ်(၅)ဖျၢၣ်ဒီး တၢ်သိလိကၠိ(၁)ဖျၢၣ်ဘၣ်ဟးဂီကွံၥ် ဒီး ကိၤသါဝ့စ့ၢ်ကီး ဘၣ်ဒိအဂ့ၢ် တၢ်သ့ၣ်ညါဘၣ်န့ၣ်လီၤ.
၂၀၂၅ နံၣ် လါမ့ၤ(၁၀)သီ ဂီၤ(၁၀း၀၀)နၣ်ရံၣ်ဆၢကတီၢ် သုးမီၤစိရိၤသုးကီၣ်ကး သုးရ့ၣ်(ခမရ-၄၄၀)အသုးတဖၣ် ခးလီၤဒြိ ဆူ ကွ့ဆ့းသဝီအဃိ ဒီၣ်မ့ၤပလဲလၢသးနံၣ်အိၣ်(၅၄)နံၣ် ဘၣ်ဒိဝဲအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ကတီၢ်ခဲအံၤန့ၣ် ဆီးထံကီၢ်ဆၣ် ဒူသ၀ီတဖၣ်အပူၤ တၢ်ဒုးတဖၣ်ကဲထီၣ်လၢ သုးကီၣ်ကးအသုးဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(K.N.L.A)အဘၢၣ်စၢၤအဃိ လီၢ်က၀ီၤကမျၢၣ်ဖိတဖၣ် တၢ်ဘၣ်ဒိဘၣ်ထံးကဲထီၣ်ဒီး ဘၣ်အိၣ်ဒီး တၢ်ပျံၤတၢ်ဖုးအဂ့ၢ် တၢ်သ့ၣ်ညါဘၣ်န့ၣ်လီၤ.
