လါအ့ဖြ့ၣ်(၂၈)သီ,၂၀၂၅နံၣ်
ဖဲအပူၤကွံၥ်လါမးရှး(၂၈)သီအနံၤဟီၣ်ခိၣ်ဟူးအဃိ တၢ်ဘၣ်ဒိဘၣ်ထံး,တၢ်သံတၢ်ပှၢ်အိၣ်အါ၀ဲလၢ၀့ၢ်မါတလ့ဒီးဒ်သိးတၢ်ဟ့ၣ်တၢ်အိၣ်ဆူၣ်အိၣ်ချ့တၢ်အံးထွဲကွၢ်ထွဲကန့ၢ်အဂီၢ် ဆှၢလီၤကဒီး၀ဲပှၤသၢဖုတဖုလၢအပၣ်ဃုၥ်ဒီးကသံၣ်သရၣ်တဖၣ်အဂ့ၢ် ကီၢ်ကၠီၣ်တဲၣ်တကပၤ ထုးထီၣ်ပၥ်ဖျါ၀ဲန့ၣ်လီၤ.
တၢ်ဆှၢလီၤပှၤသၢဖုတဖုလၢကအံးထွဲကွၢ်ထွဲတၢ်အိၣ်ဆူၣ်အိၣ်ချ့အဂီၢ်န့ၣ်ကသံၣ်သရၣ်ပၣ်ဃုၥ်ပှၤခဲလၢၥ်အိၣ်၀ဲ(၃၈)ဂၤဒီးကၠီၣ်တဲၣ်သုးမုၢ်ဒိၣ်(၂၅)ဂၤခဲလၢၥ်ပၥ်ဖှိၣ်အိၣ်၀ဲ(၆၃)ဂၤအဂ့ၢ် ကၠီၣ်တဲၣ်မီၢ်သီ၀ဲၤဒၢးလၢအိၣ်ဖဲကီၢ်ပယီၤပူၤထုးထီၣ်ပၥ်ဖျါ၀ဲဖဲလါအ့ဖြ့ၣ်(၂၆)သီအနံၤန့ၣ်လီၤ.
အခဲအံၤတဘျီ ပှၤလၢကအံးထွဲကွၢ်ထွဲတၢ်တဖုအံၤ တၢ်မၤအခိၣ်သ့ၣ်လၢကမၤ၀ဲန့ၣ်ကမ့ၢ်၀ဲ တၢ်တူၢ်ဘၣ်ဟီၣ်ခိၣ်ဟူးတၢ်ဘၣ်ဒိဘၣ်ထံးအဃိကမျၢၢ်ကျါတၢ်ဆါလၢအဘၣ်ကူဘၣ်ဂၥ်သ့တဖၣ် သုတရၤလီၤအသးအဂီၢ်ကဒီသဒၢန့ၢ်၀ဲအဂီၢ်,တၢ်အိၣ်တၢ်ဆိးကဘံၣ်ကဘၢအဂီၢ်ဒီးတၢ်ကဒိးန့ၢ်ဘၣ်ထံလၢအကဆှီအဂီၢ်ကမၤ၀ဲအဂ့ၢ်(Bangkok Post)တၢ်ကစီၣ်သန့ပၥ်ဖျါ၀ဲန့ၣ်လီၤ.
ဟီၣ်ခိၣ်ဟူး၀ံၤအလီၢ်ခံ ပှၤနီၢ်ဂံၢ်(၂၀၀၀)ဘျဲၣ်လၢအိၣ်ဆိးလၢတၢ်ဘှီထီၣ်တၢ်မၤပူၤဖျဲးတၢ်လီၢ်တစိၢ်တလီၢ်တဖၣ် တၢ်ဆါတၢ်ဘၣ်ကူဘၣ်ဂၥ်ကဲထီၣ်သ့တဖၣ် တၢ်မၤစှၤလီၤအီၤကသ့အဂီၢ် တၢ်ကထီထီၣ်တၢ်ထုးထီၣ်ထံကဆှီကဟၣ်အိၣ်၀ဲအဂ့ၢ် တၢ်ကစီၣ်သန့ပၥ်ဖျါ၀ဲန့ၣ်လီၤ.
ကီၢ်ကၠီၣ်တဲၣ်ဆှၢလီၤပှၤအခဲအံၤတဖုအကျါ ဂ့ၢ်ဂီၢ်အူပှၤမၤထူၣ်ဖျဲးတၢ်ခံဖုတဖုစ့ၢ်ကီးပၣ်ဃုၥ်၀ံၤ ပှၤတဖုလၢအိၣ်တ့ၢ်ဃၥ်လၢကီၢ်ပယီၤပူၤတဖၣ်တခီ ဖဲမဟါတနံၤကဟဲက့ၤတုၤလၢကီၢ်ကၠီၣ်တဲၣ်အဂ့ၢ် တဲ၀ဲစ့ၢ်ကီးန့ၣ်လီၤ.
Ref: BBC
