လါအ့ဖြ့ၣ်(၂၁)သီ,၂၀၂၅နံၣ်
အမဲရကၤကီၫ်ခိၣ်ဒီနၢၣ်ထရၢး ဖဲတယံာ်ဒံးဘၣ်အတၫ်မၤတဖၣ်အဃိ ဒ်တၫ်ထီဒါအီၤအသိး လၢကီၫ်အမဲရကၤကီၫ်ပူၤ ပှၤလၢအကထိတဖၣ် ပာ်ဖျါထီၣ်အတၫ်ပာ်သးကဲထီၣ်၀ဲန့ၣ်လီၤ.
ကိး၀ဲလၢ”50501”တၫ်ဟူးတၫ်ဂဲၤအံၤ လၢအမဲရကၤကီၫ်ပူၤ ကီၫ်စဲၣ်အဘ့ၣ်(၅၀)လၢာ် ပာ်ဖျါထီၣ်တၫ်ပာ်သး တကတီၫ် ဃီ၀ံၤ ဘၣ်လိာ်အသးဒီးအမဲရကၤတၫ်ပၢၫ်ဆၢစးထီၣ်တ့ၫ် ပှဲၤထီၣ်(၂၅၀)နံၣ်န့ၣ်လီၤ.တၫ်ပာ်ဖျါထီၣ်တၫ်ပာ်သးတဖၣ်န့ၣ် လၢဟံၣ်၀ါတကးဘၣ် လၢတၫ်ပာ်လီၤဆါတဲးစလၣ်သိလ့ၣ်အလီၫ်တဖၣ်အပူၤစ့ၫ်ကီးကဲထီၣ်၀ဲလီၤ.
တၫ်ပာ်ဖျါထီၣ်တၫ်ပာ်သးတဖၣ်န့ၣ် ကဲထီၣ်အသးလၢ ကီၫ်အမဲရကၤ ကီၫ်စဲၣ်အဘ့ၣ်(၅၀) အပူၤ,တၫ်လီၫ် (၁၂၀၀)ဘျဲၣ် န့ၣ်လီၤ.ပှၤပာ်ဖျါထီၣ်တၫ်ပာ်သးတဖၣ် ဃ့ထီၣ်စ့ၫ်ကီး၀ဲလၢ တၫ်ကကိးက့ၤ ကံၣ်မၣ်အဘရံၣ်ကိၣ်ကၣ်စံၣ်ယၣ်လၢ တၫ်နီကမၣ်ဟးထီၣ်အီၤ လၢအဲၣ်ဆၣ်ဘ့ဒိ အပူၤန့ၣ်လီၤ.
ဖဲတယံာ်ဒံးဘၣ် Gallupအတၫ်မၤနီၣ်မၤဃါတဖၣ်အဖီခိၣ် ထရၢးအတၫ်ပၢအဆိကတၢၫ်(၃)လါအတီၫ်ပူၤ ပှၤတူၫ်လိာ် ဆီၣ်ထွဲတၫ်န့ၣ် အိၣ်၀ဲ(၄၅)မျးကယၤ၀ံၤ ဒ်အ၀ဲကဲတ့ၫ်ကီၫ်ခိၣ်လၢအမဲာ်ညါတဘျီအသိး အိၣ်၀ဲဒၣ်ထဲ(၄၁)မျးကယၤ န့ၣ်လီၤ.ဘၣ်ဆၣ်သနာ်က့ ၁၉၅၂-၂၀၂၀နံၣ်အဘၢၣ်စၢၤ တၫ်တူၫ်လိာ်ဆီၣ်ထွဲတဖၣ်န့ၣ် စှၤန့ၫ်ဒံး (၆၀)မျးကယၤ ကီၫ်ခိၣ် လၢတၫ်ဃုထၢတ့ၫ်တဖၣ်န့ၣ်လီၤ.
တၫ်အံၤန့ၣ် မ့ၫ်လၢထရၢးအမုာ်ကျိၤ၀ဲၤကွာ်တၫ်ဖံးတၫ်မၤတဖၣ်အဃိ ပှၤဘၣ်သးအီၤ စှၤလီၤ၀ဲသ့အဂ့ၫ် ပှၤအိၣ်ခိးကွၫ်တၫ်တဖၣ်တဲ၀ဲလီၤ.လၢကတီၫ်အံၤထရၢးန့ၣ် ထံကီၫ်ခဲလၢာ်လၢထၢကီၫ်အမဲရကၤတၫ်ခိတၫ်သွဲတဖၣ် က့ၤခီၣ်ဆၢထၢကဒါက့ၤတၫ်ခိတၫ်သွဲ၀ံၤ တၫ်ကူၣ်လဲၫ်မၤကၤပနံာ်တၫ်ဒုး ဆူၣ်ထီၣ်၀ဲန့ၣ်လီၤ.
လီၤဆီဒၣ်တၫ် တရူးတၫ်တီၫ်သွီနုာ်ပနံၣ် တၫ်ထၢတၫ်ခိတၫ်သွဲအဖီခိၣ် တရူးစ့ၫ်ကီး ခီၣ်ဆၢမၤဃံးထီၣ်တၫ်ထၢတၫ်ခိတၫ်သွဲတဖၣ်အဃိ ထံကီၫ်အဂံၫ်ဆူၣ်ခံဘ့ၣ်အဘၢၣ်စၢၤ တၫ်ဖ့ၣ်ဆၢတဖၣ်န့ၣ် ဆူၣ်ထီၣ်၀ဲတပယူာ်ဃီန့ၣ်လီၤ.
Ref:BBC
