လါအ့ဖြ့ၣ်(၂၂)သီ,၂၀၂၅နံၣ်
စးထီၣ်လၢလါယနူၤအါရံၤတုၤလါအ့ဖြ့ၣ်အတီၢ်ပူၤ (၄)လါအတီၢ်ပူၤ ဒုးယၤရဲၣ်ကျဲၤမၤတ့ၢ်၀ဲတဖၣ်အပူၤ သုးကီၣ်ကးတပၤ သုးခိၣ်ဒိၣ်ဖိသံၣ်ဟးအီၣ်ပၣ်ဃုၥ် အပှၤသုးဖိ(၆၀)ဂၤသံ၀ဲ၀ံၤ သုးခိၣ်စိအီၣ်ည့ခၠါ, သုးခိၣ်စိ တ့ၣ်ကိၣ်ထဲးပၣ်ဃုၥ်သုးဖိ(၁၈)ဂၤန့ၣ် တၢ်ဖီၣ်န့ၢ်မူးဒံးအီၤအဂ့ၢ်န့ၣ် ကမျၢၢ်တၢ်ပၢၢ်ဆၢသိၣ်မှံဂံၢ်ဘါကရူၢ် PRA – Magway ပှၤဘၣ်မူဘၣ်ဒါ စံး၀ဲန့ၣ်လီၤ.
PRA – Magway လၢအမၤဒုးယၤရဲၣ်ကျဲၤစးထီၣ်လၢ လါယနူၤအါရံၤတုၤလါအ့ဖြ့ၣ်(၂၀)သီဘျဲၣ်အနံၤ တၢ်ဒုးကဲထီၣ်တ့ၢ်၀ဲ(၂၃)ဘျီအပူၤပၥ်ဖှိၣ်ဒုးတၢ်ဒီးသိၣ်မှံတဖၣ်အသိးနီၢ်ကစၢ်ဒၣ်၀ဲတဖုအသိးစ့ၢ်ကီးန့ၣ်မၤတ့ၢ်၀ဲဒုးယၤရဲၣ်ကျဲၤန့ၣ်လီၤ. ဒုးယၤရဲၣ်ကျဲၤတဖၣ်အပူၤ တၢ်မၤန့ၢ်သုးကီၣ်ကး အစုက၀ဲၤကျိချံပှၥ်သၣ်တဖၣ်အသိး သုးခိၣ်ဒိၣ်ဖိအပတီၢ်ဒီးသုးဖိပတီၢ်စ့ၢ်ကီး တၢ်ဖီၣ်န့ၢ်မူးဒံးန့ၣ်လီၤ.
“ပ၀ဲတခီန့ၣ် ပမၤဒုးယၤရဲၣ်ကျဲၤတဖၣ် တပယူၥ်ဃီန့ၣ်လီၤ. ဒုးယၤရဲၣ်ကျဲၤတၢ်အိၣ်သးတနီၤဒီးဟီၣ်ခိၣ်ဟူး၀းတၢ်အိၣ်သးတဖၣ်အဃိ တၢ်တထုးထီၣ်ပၥ်ဖျါ၀ဲဘၣ်. ပၥ်ဖှိၣ်ဒုးတၢ်ဒီးသိၣ်မှံကရၢတဖၣ်အိၣ်အသိး နီၢ်ကစၢ်ဒၣ်၀ဲတဖုစ့ၢ်ကီးဟူးဂဲၤ၀ဲအိၣ်န့ၣ်လီၤ. အဂုၤအဂၤတခီတဲတန့ၢ်ဒံးဘၣ်. “အဂ့ၢ် PRA-Magway ပှၤဘၣ်မူဘၣ်ဒါစံး၀ဲန့ၣ်လီၤ.
မကွ့ကီၢ်ခီ, ငဖဲကီၢ်ဆၣ်အပူၤစ့ၢ်ကီး စးထီၣ်လၢလါယနူၤအါရံၤတုၤလါမးရှးအတီၢ်ပူၤ တၢ်ဘၣ်သဂၢၢ်လိၥ်သးအိၣ်ထီၣ်၀ဲ(၄)ဘျီအပူၤ သုးကီၣ်ကးတပၤသံ၀ဲတစှၤန့ၣ်(၂၀)ဂၤ၀ံၤ ဘၣ်ဒိ၀ဲအါအါဂီၢ်ဂီၢ်အဂ့ၢ် ကမျၢၢ်တၢ်ပၢၢ်ဆၢသိၣ်မှံဂံၢ်ဘါကရူၢ် PRA-Magway ထုးထီၣ်ပၥ်ဖျါဃၥ်၀ဲန့ၣ်လီၤ.
ကတီၢ်ခဲအံၤန့ၣ် PRA – Magwayတခီ ပၥ်ဖှိၣ်၀ဲဒီးသိၣ်မှံတၢ်ပၢၢ်ဆၢကရၢတဖၣ်၀ံၤ မၤ၀ဲဒုးယၤရဲၣ်ကျဲၤတဖၣ်ဖဲ အါ-ပဒါတပၤအသိး ဒ်သိးကမၤလဲၢ်ထီၣ်ဒုးယၤရဲၣ်ကျဲၤဟီၣ်က၀ီၤအဂီၢ် တၢ်ဟူးတၢ်ဂဲၤတဖၣ်အိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: မောင်း
